¹ Nomba insoka yali iya cenjelesha ukucial pa nama sha mwibala shonse isho Yawe Lesa apangile. Yasosele ku mwanakashi aiti, "Bushe icine cine Lesa asosele ati, "tamuli nokulyako ku muti uulo onse mwibala'?" ² Umwanakashi ayasuka insoka ati, "kuti twalya ifitwalo ukufuma kufimuti ifya mwibala, ³ lelo ukulosha kucitwalo ica kucimuti icaba pakati kebala, Lesa asosele ati, 'tamufwile ukulyako, nangufye ukwikatako, pantu mukafwa."' ⁴ Insoka epakisosa ku mwanakashi aiti, "tamwakafwe mucine fye. ⁵ Pantu Lesa alishiba ubushiku mukalya icitwalo amenso yenu yakesuka, elyo mukaba nga Lesa, mukeshiba ububi nobusuma." ⁶ Ilyo umwanakashi amona ukuti ifitwalo fya muti fisuma ukulya, nokuti fyayemba, mukumoneka, kabili kuti fyakabilwa pakukwata amano, asabako ifitwalo fimo alya. Elyo kabili apelako fimo ku mulume wakwe, nao alya. ⁷ Amenso yabo bonse babili yaisuka nokwisuka ukuti bali ubwamba. Epaku bilikanya amabula ya mukunyu noku panga ifyakufwala fyabo. ⁸ Baumfwile ishiwi lyakwa Yawe Lesa aleenda mwibala ninshi nakutalala bwino, eico umwaume no mukashi wakwe babelama ukufuma kucinso cakwa Yawe Lesa mu miti yamwibala. ⁹ Yawe Lesa aita umwaume nokusosa kuli ena ati, "bushe ulukwe?" ¹⁰ Elyo umwaume ayasuka ati, naci myumfwa mwibala, nacikwata umwenso, pantu ndi ubwamba. Eico nacibelama." ¹¹ Lesa asosa kuli ena ati, "nga nani akwebele ati ulu ubwamba? Bushe naulya ku cimuti ico nakukonkomeshe ukukana lyako?" ¹² Umwaume ayasuka ati, "umwanakshi mwampele ukuba nankwe eumpele icitwalo ca muti, naine nalya." ¹³ Yawe Lesa aipusha umwanakashi ati, "nga ici ucitile ni cinshi?" Umwanakashi ayasuka ati, "Ninsoka eimbepele, naine elyo nalya." ¹⁴ Yawe Lesa epakweba insoka ati, pamulandu wacita ici cintu, walapishiwa iwe weka pafitekwa fyonse napa nama sha mpanga shonse, wakulaikulafye pe fumo lyobe, kabili ulukungu elo wakulalya inshiku shonse isha mweo obe. ¹⁵ Nkabika ukupatana pakati ka iwe no mwanakashi, kabili napakati ka bufyashi bobe no bufyashi bwa mwanakashi. Akashonaula umutwe obe, naiwe ukamusuma ku citende cakwe." ¹⁶ Ku mwanakashi atile, "nkafusha amacushi nganshi pakukwata abana; ukalaumfwa ubukali pakupapa abana. ukalakabila umulume obe, kabili akalakuteeka." ¹⁷ Kuli Adamu atile, "Pantu wacumfwa kwi shiwi lya mukashi obe, no kulya na kumuti uo naku konkomeshe ukuti taufwile walyako,' walapishiwa umushili pa mulandu waiwe; wakulacula ukubomba pakumoan icakulya inshiku shonse isha mweo obe. ¹⁸ Umushili wakulamesha imyunga fya kukulasa ukalalya fye ifilimwa fya mwibala. ¹⁹ Ni mukupiba emo ukalamwena icakulya; mpaka ukabwelele ku mushili, pantu eko wafumine. Pantu uli lukungu kabili ku lukungu kwine eko ukabwelela." ²⁰ Umwaume ainike umukashi wakwe ishina lya Efa pantu e nyina wa bantu bonse. ²¹ Yawe Lesa epakupangial Adamu no mukashi wakwe ifyakufwala ifyampapa kabili nokubafwika. ²² Yawe Lesa epakusosa ati, "Nomba umuntu ali kwati ni umo palli ifwe, ku kwishiba ifisuma ne fibi. Eico nomba tewakusuminisha ukutambika ukuboko kwakwe, nokusaba ku muti uupela ubumi, nokulya, kabili nokwikala umuyayaya." ²³ Eico kanshi Yawe Lesa amutamfishe ukufuma mwibala lya Edeni, pakuti alelima umushili uo amufumisheko. ²⁴ Eico Lesa atamfishe umuntu ukufuma mwibala, no kubika Bakerubi kukabanga mu Edeni, no lupanga ulwalebilima umulilo ulwaleyafye konse konse, pakulinda inshila yakuya ku muti wa bumi.