¹ Yawe amonekele kuli Abrahamu mupepi ne miti ikulu iya oki iyakwa Mamure ilyo aikele pa mwinshi we tenti lyakwe ninshi akasuba nakabalikisha nganshi. ² Cilya ainuna amenso, amona abaume batatu beminine mupepi napo ali. Ilyo abamona afuma ulubilo pa mwinshi we tenti lyakwe aya kukubakumanya, elyo akontamina panshi, ³ asosa ati, “We mfumu napapata, nga cingamusekesha, wipitafye pa mubomfi obe. ⁴ Lekeni balete utumenshi utwakusamba ku makasa yenu, elyo mutuusheko mwisamba lya muti. ⁵ Lekeni muleteleko utwakulya, pakuti mubweshe amaka, lyena elyo mukonkanyepo ubulendo bwenu, pantu mwaisa pita pa mubomfi wenu.” Nabo bamwasuka abati, “Cisuma, cita ifyo fine walanda.” ⁶ 6Kanshi Abrahamu aile bwangu bwangu mwitenti kuli Sara, amweba ati, “Endesha, buula ifikopo fitatu ifya bunga ubwapeleka bwino, ukasawile elyo upangeko imikate.” ⁷ Elyo abutukila ukwali iŋombe, asalapo iciponti icisuma kabili icanakilila, acipeela na ku mubomfi. Umubomfi nao bwangu bwangu acipekanya. ⁸ Elyo Abrahamu abuula umukaka uwatimba no wasongoloka ne nama apekenye, afiteka napo bali. Ilyo balelya Abrahamu aiminine mupepi nabo mwisamba lya muti. ⁹ 9Abo bantu bamwipushe abati, “Bushe Sara umukashi obe ali kwi?” Abrahamu abasuka ati, “Ali mwitenti.” ¹⁰ Elyo umo pa beni bakwe asosa ati, “Icine cine uyu mwaka uleisa nga pa nshita ino ine nkesa kupempula, kabili umukashi obe Sara akaba no mwana umwaume.” Kanshi Sara ali pa mwinshi we tenti ilyali kunuma yakwa Abrahamu alekutika. ¹¹ Abrahamu na Sara bali abakote ne myaka iyingi nganshi. Sara nao inshita yakufyala ninshi yalipita. ¹² Kanshi Sara epakuseka uko ali eka, pantu aletontonkanya ati, “Ilyo ninakuka na shikulu nao mukote, bushe nine ningaibika nakabili mu fyakuisansamusha!” ¹³ Elyo Yawe aebele Abrahamu ati, “Cinshi ico Sara asekela no kusosa ukuti, ‘Bushe cine cine nine ningakwata umwana nomba ilyo ndi umukote?’ ¹⁴ Bushe kwaliba icintu ico Yawe engafilwa? Uyu mwaka uleisa pa nshita ilya nandilepo nkabwela nakabili, elyo Sara akaba no mwana umwaume.” ¹⁵ Sara ico aumfwa umwenso, abepa ati “Awe ine nshaciseka.” Lelo Yawe amweba ati, “Ee waciba nuseka.” ¹⁶ Ilyo balya bantu baimine ukuti baleya, ico bali apasansama, baloleshe lwa panshi ku Sodoma. Abrahamu nao aya alebashindika. ¹⁷ Elyo Yawe asosa ati, “Bushe mfise kuli Abrahamu ifyo nalacita? ¹⁸ Pantu Abrahamu akaba umushobo ukalamba kabili uwamaka. Kabili imishobo yonse iya pano isonde ikapaalilwa muli ena. ¹⁹ Pantu nalimusala pakuti akalange abana bakwe na ba mu ŋanda yakwe abakamukonkapo ukulakonka inshila yakwa Yawe, mukucita ifyalungama no kuba no mulinganya, pakuti Yawe akacitile Abrahamu ifyo amulaya.” ²⁰ Elyo Yawe atila, “Ukuilishanya kwa pali Sodoma na Gomora nakukulisha nganshi, no bubifi bulimo nabubipisha nganshi, ²¹ eco nalailako kukumona ifyo bacita nga nafibipa ukulingana no kuilishanya kwafika kuli ine. Elyo nga teifyo, ndeya ishiba.” ²² Elyo balya bantu bapilibuka, balaya lwa ku Sodoma, lelo Abrahamu ena ashala naiminina pa cinso cakwa Yawe. ²³ Elyo Abrahamu apalama, aipusha Yawe ati, “Bushe cine cine walaonaula abalungami pamo na babifi? ²⁴ Bushe nga cakuti mu musumba mulimo abantu abalungami amakumi yasano, bushe uleonaula umusumba? Bushe tekuti uleke ube pa mulandu wa aba bantu abalungami abalimo amakumi yasano ? ²⁵ Nacitaluke kuli iwe ukucita ica musango uyu, ukwipaya abalungami pamo na babi, teti ucitile abalungami cimo cine na babi. Nacitaluke kuli iwe! Bushe kapingula we sonde lyonse tali nakucita mulinganya?” ²⁶ Yawe amwasuka ati, “Nga nasanga mu musumba wa Sodoma muli abantu abalungami amakumi yasano, nshaye onaula musumba pa mulandu wabo.” ²⁷ Abrahamu asosele nakabili ati, “Ine ne ulifye ulukungu, kabili imito, nine napama ukulanda ku Mfumu, ²⁸ bushe nga cakuti pa balungami amakumi yasano pabulilafye basano, bushe kuti waonaula umusumba pa mulandu wakuti pabulila abantu abalungami basano?” Yawe ayasuka ati, “Iyoo tekuti ngonaule musumba nga nasangamo abantu abalungami amakumi yane na basano.” ²⁹ Abrahamu asosa nakabili ati, “Nga cakuti mwasangamofye amakumi yane?” Yawe ayasuka ati, “Tekuti ngonaule musumba pa mulandu wa makumi yane .” ³⁰ Kabili Abrahamu ati, “We Mfumu wifulwa, nalalanda nakabili. Nga cakuti mwasangwafye amakumi yatatu?” Yawe amwasuka ati, “Tekuti ngonaule musumba nga cakuti nasangamo amakumi yatatu.” ³¹ Abrahamu asosa ati, “Apo nomba nimpama ukulanda ku Mfumu, nga cakuti mwasangwafye amakumi yabili?” Yawe amwasuka ati, “Pa mulandu wa abo amakumi yabili tekuti ngonaule musumba.” ³² Kabili Abrahamu asosa ati, “Nga cakuti Imfumu tayafulwe, kanjipushekofye umuku umo uwakulekelesha, nga cakuti mwasangwafye ikumi limo epela?” Yawe amwasuka ati, “Pa mulandu wa abo ikumi limo tekuti ngonaule musumba.” ³³ Cilya Yawe apwa ukulanda na Abrahamu, aya no kuya, Abrahamu nao abwelamo kumwakwe.