¹ Vananumi ira me ra dau talairawarawa vi ira sa liu kei ira sa kaukauwa, me ra talairawarawa, me ra varau tu me caka nai valavala kece lia e vinaka, ² me ra kakua ni vosavacacatakia e dua na tamata, me ra kakua voki lia ni viba, me ra yalomalua, me ra sa yalo malumalumu sara vi ira kece lia na tamata. ³ Ni da sa lialia eliu koi ita voki lia, eda sa talaidredre, eda sa vacalai, eda sa daugolevia na gagadre ca ki na marau e levu, eda sa lomaca ka vuvu, eda sa vasisila, eda sa dauvicati vataki ita. ⁴ Ia ni sa rairai mai vei ita na tamata na yalovinaka ki na yalololoma ni Kalou na nodai Vabula, sa qai vabulai ita ko koya, ⁵ sa yali lia e na vuku ni cakacaka dodonu eda sa caka, e na vuku lia ni nona loloma, enai silisili ni sucu voki, ki na vavoui ni Yalo Tabu; ⁶ o koya sa sovarakia valevu vi ita ko koya ena vuku i Jisu Karisito na nodai Vabula: ⁷ me da vadonui kinia e na nona loloma loa lia, ka me da yaco me dai taukei ni bula yali ni mudu sa vanuinuitakia. ⁸ Sa dina na vosa, ia ka'u sa vinakatia mo vadinadinatakia tiko lia na ka koya, Me ra gumatua ni caka tiko nai valavala vinaka ko ira era sa vabautia na Kalou. Sa vinaka na ka koya, ka yaga vi ira na tamata. ⁹ Ia na ka lialia sa dau viletitakia mo dainia lia, ki nai vola ni kawa, ki na viba, ki na dauviletitakia nai vunau; ni sa yali ni yaga koya, ka sa ka loa sara lia. ¹⁰ A tamata sa dau vavuvuli vatani mo dainia, ni sa vunaucia mada eliu vadua ka varua; ¹¹ ni ko sa kila sa vacalai, ka sai valavala ca ko koya sa vakinia, ni sa beitakia koya vataki koya. ¹² Ni'u na talai Aritema vi iko, se ko Tikiko, mo gumatua mo qai mai kivei au ki Nikopoli: ni'u sa nanumia me'u tiko lia kinia ena vula i liliwa. ¹³ Gumatua mo yadi Sina na vu-ni-vunau, ki Apolosa, ena nodraui qaiqai, me kakua na ka e yali vi rau. ¹⁴ Ia ko ira voki lia na noda me ra vatavulici, mera daucaka nai valavala vinaka me vaka na ka sa yaga, mera kakua ni yali ni vua kinia. ¹⁵ O ira kece lia sa tiko vi au era sa loloma yani vi iko. Au sa loloma vi ira era sa lomani kitou ena vuku ni vabautia. Me nomudou kece lia na loloma. Emeni.