1 ¹ Koi au ko Paula, nai talatala ni Kalou, ki nai apositolo i Jisu Karisito, e na vuku ni nodra vabautia sa digitaki ira na Kalou, kei na vatusa nai vavuvuli dina sa vaka na lotu; ² me vanuinuitakia na bula yali ni mudu, o koya sa yalatakia eliu na Kalou, o koya sa yali ni lasu rawa, a sa qai vatekivu emuri ko vuravura; ³ a sa qai varaitakia na nona vosa e na kena gauna ni sa vunautakia, ka'u sa lesi kinia me'u ia me vaka na nona vosa na Kalou na nodai Vabula; ⁴ vei Taito na luvequ dina me vaka na vabauta sa tu vi ita kece lia: Me sa nomu na loloma, na yalololoma, na vacegu, mai vua na Kalou ko Tamada ki na Turaga ko Jisu Karisito na nodai Vabula. ⁵ Au a daini iko mai Kiriti, mo vadodonutakia na veika sa vo, ka mo lesia nai talatala qase ki na vikoro yadua, me vaka ka'u a vaarotia vi iko: ⁶ kevaka e dua sa yali ni cala, sa vawati vadua, a ra sa vabautia ko ira na luvena, a sa yali ni beitakia vi ira nai valavala vatani, se na talaidredre. ⁷ Ni sa dodonu me yali cala nai talatala qase, me vaka sai talatala ni Kalou; me kakua ni domoqa, me kakua ni daucudrucudru, me kakua ni dausomi waini, me kakua ni dauviba, me kakua ni dau domonia nai yau vasisila: ⁸ me dau vacegui ira na vulagi, me dau lomani ira na tamata vinaka, me yalomatua, me yalododonu, me yalosavasava, me dau rawa na yalona; ⁹ me tauria matua nai vavuvuli dina sa vatavulici kinia, me rawatia ko koya me varotia nai vavuvuli sa vinaka, ka vunauci ira voki lia era sa vosa vatani. ¹⁰ Ni ra sa lewe levu era sai valavala vatani, era sa dau talanoa wale lia ka dau vivaisini, era sa vakinia valevu ko ira na cili; ¹¹ ia ka sa dodonu me ra vagalui, ni ra sa vacalai ira kece na lewe-ni-vale eso, ni ra sa vatavulicia na ka sa yali ni kilikili, e na vuku ni yau vasisila. ¹² E dua vi ira, a nodra parofita, sa tukunia, A nodra i tovo lia na kai Kiriti me ra dau lasu, era manumanu ca, era sa dau kana ka vucesa. ¹³ Sa dina nai tukutuku ko ya. O koya ko ya mo qai vunauci ira vararawa, me vinaka kinia na nodra vabautia; ¹⁴ me ra kakua ni nanumia nai tukuni wale lia vaka-Jiu, se na nodra vivakaro na tamata era sa lesu tani mai nai vavuvuli dina. ¹⁵ Sa savasava na ka kece lia vi ira era sa yalosavasava: ia vi ira era sa dukadukali ka yali ni vabautia sa yali na ka sa savasava; ia sa dukadukali na nodra lewa-eloma ki na yalodra. ¹⁶ Era tukunia era sa kila na Kalou: ia e na nodra i valavala era sa cakitakia, ni ra sa tamata vasisila, ka talaidredre, ka yali ni yaga ki na dua na cakacaka vinaka.