¹ Sa kilikili voki lia kei ita, o ita sa kaukauwa, me da vosotia na nodra malumalumu era sa yali ni kaukauwa, me da kakua voki lia ni caka na ka sa vinaka vi ita lia. ² Me da caka yadua na ka e vinaka vua na kai noda, na ka e yaga me vatavulici kinia ko koya. ³ Ia na Karisito voki lia sa yali ni caka na ka sa vinakatia lia ko koya; ia me vaka lia sa volai, Sa tau vi au na nodra vosa ca era sa vosavacacataki iko. ⁴ Io, na ka kece lia sa volai eliu sa volai me da vatavulici kinia, me noda na vosotia kei na vacegui sa vu mai nai Vola Tabu, me rawa kinia nai nuinui. ⁵ Ia me solia mada vi ikodou na Kalou, o koya na vu ni vosotia kei na vivacegui, mo dou lomavata va i ikodou me vataki Karisito Jisu: ⁶ mo dou lomavata ka domovata ni dou sa varokorokotakia na Kalou, o koya na Tama i Jisu Karisito na noda Turaga. ⁷ O koya mo dou qai vivacegui va ikodou, me vaka sa vacegui ikodou na Karisito, me varokorokotaki na Kalou. ⁸ Ia ka'u sa tukunia ni sai talatala ko Jisu Karisito vi ira era sa cili, me vatakila ni sa dina na Kalou, me vadinadinatakia na vosa ni yalayala vi ira na qase: ⁹ me ra varokorokotakia na Kalou ko ira vokia na vimatanitu tani ena vuku ni nona loloma; me vaka sa volai, Ena vuku ni ka koya, ka'u na vatusai iko kinia ena kedra maliwa na vimatanitu tani, Ka sere ki na yacamuni. ¹⁰ A sa tukunia voki, Dou reki vata na vimatanitu tani, kei ira na nona tamata. ¹¹ Sa dua voki. Dou varokorokotaki Jiova, na vimatanitu kece lia: Ia dou varokorokotaki koya valevu, oi ikodou na vivanua kece lia. ¹² Ko Aisea voki lia sa tukunia, Ena tubu na waka i Jese, kei koya ena tu cake me lewa na vimatanitu tani; Era na vararavi vi koya ko ira na vimatanitu tani. ¹³ Ia me vasinaiti ikodou mada na Kalou, o koya na vu ni nuinui, ena reki kece lia kei na vacegu ni dou sa vabautIa, me levu sara na nomudou i nuinui ena vuku ni nona kaukauwa na Yalo Tabu. ¹⁴ Ia koi au voki lia, au sa vakasami ikodou, na wekaqu, ni dou sa sinai ena yalololoma, ni dou sa sinai ena vuku kece lia, ni dou sa rawatia voki lia me dui vivatavulici va ikodou. ¹⁵ Ia ka'u sa doudou lia, me'u volavola valailai yani vi ikodou, na viwekani, me'u vananumi ikodou voki ena vuku ni loloma sa solia mai vi au na Kalou, ¹⁶ me'u yaco mei talatala i Jisu Karisito vi ira na vimatanitu tani, me'u caka na cakacaka enai tukutuku-vinaka ni Kalou, me vinakati nai cabocabo ni vimatanitu tani, ni sa vasavasavataki ira na Yalo Tabu. ¹⁷ Ko koya sa tu kinia vi au na ka me'u valevulevui au kinia ena vuku i Jisu Karisito ena veika ni Kalou. ¹⁸ Ni'u na yali ni doudou loa lia me'u cavutia na ka tani; na ka lia sa vayagataki au kinia na Karisito, me vatalairawarawataki ira na vimatanitu tani, ena vosa kei nai valavala, ¹⁹ ena vuku ni sa kaukauwa na veika-mana kei na veika e vivakurabuitaki, sa caka ena kaukauwa ni Yalo Tabu, ia ka'u a vatekivu kinia mai Jerusalemi, ka qai voli ka yaco ki Iliriko, ni'u sa vunautakia kece nai tukutuku-vinaka kei Karisito. ²⁰ Ia ka'u sa gumatua sara vakinia, me'u vunautakia nai tukutuku-vinaka, ia ka yali lia ena vanua sa tukuni oti kinia na yaca i Karisito de'u tara loa lia na ka e dela ni yavu ni tamata tani: ²¹ ia me vaka lia sa volai, ko ira sa yali ni tukunia mada vi ira ko koya, era na raicia: Ia ko ira era sa yali ni rogocia, era na kila, ²² Ko koya koya sa tarovi valevu kinia na noqu qai vi ikodou. ²³ Ia ni sa qai yali na ka me'u tiko kinia ena yasana koya, ka sa levu na yabaki ka'u a gadrevia kinia me'u qai vi ikodou; ²⁴ ni na yaco na noqu qai ki Sipeini: ni'u sa nanumia me'u raici ikodou ena noqu qai, ka mo dou yadi au ena noqu i qaiqai kinia, ni sa oti mada na nomudou vacegui au valailai ni da tiko vata. ²⁵ Ia ka'u sa qai qai ki Jerusalemi, me'u yadia na soli vi ira era sa lotu. ²⁶ Ni ra sa vinakatia ko ira na kai Masitonia kei Akaia, me ra caka e dua nai solisoli loloma me nodra na dravudravua era sa lotu mai Jerusalemi: ²⁷ io, era sa vinakatia; a sa dodonu me ra soli ka vi ira. Io, kevaka era sa rawatia mai vi ira na nodra veika vayalo ko ira na vimatanitu tani, sa qai dodonu kinia vi ira me ra solia vi ira na veika vayago. ²⁸ Ia ni'u sa caka oti mada na ka koya, ka solia vi ira na ka ni loloma koya me ra tauria, au na qai taka vi ikodou ka qai yani ki Sipeini. ²⁹ Ia ka'u sa kila, ni'u na qai yani vi ikodou, au na qai ki na vivakalougatataki taucoko kei Karisito. ³⁰ Ia ka'u sa vamasuti ikodou, na viwekani, ena vuku ni noda Turaga ko Jisu Karisito, ena vuku voki lia ni loloma ni Yalo Tabu, me da gumatua vata ena masu vua na Kalou ena vukuqu; ³¹ me'u vabulai mai vi ira mai Jutia era sa yali ni talairawarawa; me ra vinakatia voki lia ko ira era sa lotu na noqu cakacaka ena caka mai Jerusalemi; ³² me'u qai kinia vi ikodou ena reki ena lewa ni Kalou, ka me'u vacegui vata kei ikodou. ³³ Ia me tiko vata kei ikodou kece lia na Kalou ni vivacegui. Emeni.