¹ O koya koya, au sa vamamasu vei ikodou, na veiwekani, e na vuku ni loloma valevu ni Kalou, mo dou solia na yagomudou mei madrali bula, me savasava, me vinaka vua na Kalou, me nomudou i soro vayalo. ² Ia dou kakua ni vatauvatani ikodou kei ira era sa vavuravura: ia dou mataliataki lia ni sa vavoui na yalomudou, mo dou kila rawa kinia na loma ni Kalou, sa yaga, ka vinaka, ka dodonu sara. ³ Ia e na loloma sa soli mai vei au, au sa tukunia vei ira na tamata yadua vei ikodou, me kakua e dua me dokai koya me vaka sa yali ni dodonu me dokai koya; me yalomatua lia na nona nanuma, me vaka nai varau ni vabauta sa vota na Kalou vei ira yadua. ⁴ Me vaka sa dua loa lia na yagoda, ka levu na tikida, ia ka sa yali ni vaitavi vata na tikida kece lia; ⁵ sa vakinia ko ita, na lewe levu, eda sa yago vata ni da tu vata kei Karisito, eda sa veitikina vaka voki lia vai ita. ⁶ Ni da sa rawatia na veisolisoli sa duidui me vaka na loloma sa soli vei ita: kevaka sa parofisai, me da parofisai me vaka nai varau ni noda vabauta; ⁷ se na dauveivota, me da ia na veivota; se ko koya sa dauvatavuvuli, me vavuvuli tiko; ⁸ se ko koya sa dauvunau, me vunau tiko; o koya sa ia na dausolisoli, me dina na lomana; o koya sa daulewa, me gumatua kinia; o koya sa dauloloma, me ia e na reki. ⁹ Me kakua ni vaikalasu na loloma. Mo dou catia sara na ka ca; mo dou kabitia sara na ka vinaka. ¹⁰ Dou veilomani sara e na veilomani ni veitacini; dou veiuasiviti e na veivarokorokotaki; ¹¹ e na gumatua mo dou kakua ni vucesa mai: me katakata na yalomudou; mo dou qaravia na Turaga; ¹² dou reki e nai nuinui; vosotia na ka rarawa; ia tiko lia na masu: ¹³ veivotayaka vei ira na dravudravua era sa lotu; dauvacegui ira na vulagi. ¹⁴ Dou vosavakalougatataki ira era sa vacacani ikodou: vosavakalougatatakia lia, ka kakua ni rukaka. ¹⁵ Dou reki vata kei ira era sa reki, ka tagi vata kei ira era sa tagi. ¹⁶ Dou lomavata tiko vakai ikodou. Kakua ni nanumia na veika vaturaga, ia mo dou veiriti kei ira na tamata lalai. Dou kakua ni vakasami ikodou ni dou sa vuku. ¹⁷ Kakua ni veisausaumitakia na nona ca e dua. Nakitia eliu na veika sa dodonu e na matadra na tamata kece lia. ¹⁸ Kevaka sa rawa, mo dou vatovolea me veilomani kei ira na tamata kece lia. ¹⁹ Oi ikodou sa lomani dou kakua ni saumia na ca sa caka vei ikodou, ia mo dou dainia vua na Kalou me saumia; ni sa volai; A noqu i tavi me'u cudruvakia; au na saumia koi au, sa tukunia na Turaga. ²⁰ O koya mo qai vakania na nomu meca, kevaka sa viakana; kevaka sa viasomi, mo vasomi koya: ko na binia kinia ki na uluna na qilaiso sa waqa tu ni ko sa caka vakoya. ²¹ Me kakua ni rawai iko na ca, mo rawa lia na ca e na vinaka.