¹ Au sa qai tarogia, Sa dainia tani na nona tamata na Kalou, se yali? E yali sara. Oi au na luve i Isireli, a kawa i Eparaama, mai na yavusa i Penijamini. ² Sa yali ni dainia na nona tamata na Kalou, o ira sa kila eliu ko koya. Dou sa yali li ni kila na ka sa tukunia nai Vola Tabu ni sa tukuni Ilaija? ni sa beitaki ira na Isireli ko koya vua na Kalou, a sa tukunia, ³ I Jiova, era sa vamatei ira na nomuni parofita, a ra sa keli rukuta sobu na nomuni veicabocabo-ni-soro; ia koi au dua loa lia, au sa bula, ka ra sa qarai au me'u mate? ⁴ Ia ka cava sa tukunia vua na vosa ni Kalou? Au sa maroroya me noqu e lewe vitu na udolu na tamata, era sa yali ni tekiduru vei Peali. ⁵ Sa va voki lia kinia e na gauna koya, sa tu lia na kena vo era sa digitaki e na loloma. ⁶ Ia kevaka sa ka-ni-loloma, sa qai yali ni ka-ni-cakacaka: ke sa yali ni vakakoya, sa yali ni loloma na loloma. ⁷ Sa qai vaevei? Sa yali ni rawatia na ka era sa vasaqara ko ira na Isireli; ia ko ira na digitaki era sa rawatia; a sa vadomoqatakia na kena vo, ⁸ me vaka na ka sa volai, Sa solia vei ira na Kalou na yalo sa daumoce, na mata sa yali ni rai rawa, kei na daliga sa yali ni rogo rawa; ka yacovia na siga koya. ⁹ Sa tukunia voki lia ko Tevita, Me yaco na nodra tepeli me kedrai cori, ki na tudai, Kei na ka me ra tarabe kinia, me kedrai sau voki lia ni ca. ¹⁰ Me vabutobutotaki na matadra, me ra kakua ni rai rawa, Ka mo vakalairorotakia tiko lia na dakudra. ¹¹ Au sa qai tarogia, Era sa tarabe me ra bale sara, se yali? E yali sara: ia e na nodra bale, sa rawa na bula vei ira na veimatanitu tani, me vavuvutaki ira. ¹² Ia kevaka sa vutuniyau mai ko vuravura e na vuku ni nodra bale, a sa vutuniyau mai na veimatanitu tani ni sa valailaitaki ko ira koya; ena qai vatanievei ni ra sa valevui mai? ¹³ Ni'u sa qai vosa vei ikodou sa matanitu tani; ni'u sa nodra i apositolo na veimatanitu tani, au sa doka na cakacaka ka'u sa lesi kinia: ¹⁴ de ka'u vavuvutaki ira na wekaqu vayago, ka me'u vabulai ira kinia eso. ¹⁵ Ia kevaka sa vinakatia mai ko vuravura ni sa dai tani ko ira koya, ena yali li ni vaka na bula mai na mate na nodra lomani voki? ¹⁶ Ia kevaka sa savasava nai sevu, ena va voki lia kinia na kena taucoko; ia kevaka sa savasava na vuna, ena va voki lia kinia na veitabana. ¹⁷ Ia kevaka sa musuki dai eso na tabana ia ko iko, na taba ni olive ni veikau, sa mai sema vata kei ira, mo bula vata kei ira e na vu ni olive sa uro; ¹⁸ mo kakua ni valevulevui iko cake vei ira na tabana dina. Ia kevaka ko sa valevulevui iko, sa yali ni bula na vuna e na vukumu, o iko lia sa bula e na vuku ni vuna. ¹⁹ O na qai tukunia, Sa musuki dai na veitabana dina, me'u sema kinia. ²⁰ E dina; sa musukia dai ko ira ni ra sa yali ni vabautia, ia ko iko ko sa tu dei lia ni ko sa vabautia. Kakua ni yalolevu, mo rere lia. ²¹ Kevaka sa yali ni vosotia na veitabana dina na Kalou, de qai yali voki lia ni vosoti iko. ²² O koya mo qai raicia ruarua, na loloma, kei na cudru, ni Kalou: a cudru vei ira sa bale: kei na loloma vei iko, kevaka ko sa tu dei e na nona loloma: ia kevaka e yali ko na musuki dai voki lia ko iko. ²³ O ira voki lia, kevaka era sa yali ni tawa vabautia tiko, era na sema vata: ni sa rawarawa vua na Kalou me vasemai ira vata voki. ²⁴ Ia kevaka ko sa musukia mai na olive sa ka lia ni veikau, ia ko sa sema vata kei na olive vinaka drau sa yali ni tovo vata kaya: ena qai rawarawa cake, me sema vata ki na nodra vu ni olive dina ko ira sai tovo vata kaya. ²⁵ Ni'u sa yali ni vinakatia, na veiwekani, mo dou lecavia na ka vuni koya, de dou vakasami ikodou ni dou sa vuku; ni ra sa yaco na Isireli eso me ra domoqa, ka malua me curu mada na lewe levu maivei ira na veimatanitu tani. ²⁶ Ia sa vaka koya, era na vabulai ko ira kece lia na Isireli: me vaka na ka sa volai, Ena qai mai Saioni ko koya nai Vakabula, Ka na yadia tani nai valavala ca maivei ira na Jekope; ²⁷ Ia sa noqu veiyalayalati koya vei ira, Ni'u sa yadia tani na nodra i valavala ca. ²⁸ E nai tukutuku-vinaka, era sa veimecaki ko ira e na vukumudou: ia e nai lesilesi lia, era sa vinakati e na vukudra na qase. ²⁹ Ni sa yali ni veivutuni voki na Kalou e na vuku ni nonai solisoli se nona kacivi ira. ³⁰ Me vaka ni dou a yali ni vabautia na Kalou eliu, a sa qai yaco vei ikodou na loloma e na vuku ni nodra vatitiqa: ³¹ sa na va voki lia kinia ko ira era sa yali ni vabautia e na vuku ni sa yaco vei ikodou na loloma me yaco kinia vei ira voki lia na loloma. ³² Ni sa sogolati ira vata na Kalou e na vatitiqa, me lomani ira kece lia ko koya. ³³ A ka vaidina na kena titobu ni nona vutu ni vuku kei na nona yalomatua na Kalou! sa yali ni kilai rawa na nona lewa, a sa yali ni kune na nonai valavala! ³⁴ O cei sa kila na loma ni Turaga? se ko cei me nonai vavuvuli? ³⁵ se ko cei sa solia mada vua, me na qai saumi voki vua? ³⁶ Ni sa vu mai vua na ka kece lia, e na vukuna voki lia, ka me nona voki lia; me varokorokotaki ko koya ka yali ni mudu. Emeni.