¹ O ikodou na veiwekani, au sa gadrevia e na vu ni yaloqu, au sa masu voki lia vua na Kalou e na vukudra na Isireli, me ra bula. ² Ni'u sa tukuni ira ni ra sa lomakatakata vua na Kalou, ia era sa yali ni yalomatua. ³ Ni ra sa yali ni kila na veivadonui sa vu mai vua na Kalou, a ra sa qara me dua na veivadonui vataki ira, a ra sa yali kinia ni vamalumalumutaki ira me ra vadonui mai vua na Kalou. ⁴ Ni sa vayacoria na Karisito na ka sa nakitia e na vunau, me vadonui ko ira kece era sa vabautia.

⁵ Ni sa tukunia ko Mosese na veivadonui sa yaco e na vuku ni vunau, Na tamata sa caka, ena bula kinia. ⁶ Ia na veivadonui sa yaco e na vabautia sa tukunia vakakoya, Mo kakua ni vosa e na yalomu, O cei me qai cake ki lomalagi? [ka me yadi Karisito sobu mai:] ⁷ se vaka ne, O cei me qai sobu ki na Yasana - vuni? [ka me yadi Karisito cake mai na mate.] ⁸ Ia ka cava e tukunia? Sa voleka vei iko na vosa, io e na gusumu, kei na yalomu: a vosa ni vabautia, o koya kitou sa vunautakia. ⁹ Kevaka ko na vatusa e na gusumu na Turaga ko Jisu, ka vadinatia e na vu ni yalomu ni sa vaturi koya cake voki mai na mate na Kalou, ko na bula. ¹⁰ Ni sa vadinatia na tamata e na vu ni yalona me sa vadonui kinia, ia na gusuna sa vatusa kinia me bula. ¹¹ Ni sa tukunia nai Vola Tabu, O koya yadua sa vabauti koya ena yali ni vamaduataki. ¹² Ni sa tautauvata na Jiu kei koya sa matanitu tani: ni sa dua lowa lia na Turaga vei ira kece lia, o koya sa vutu ni ka vinaka vei ira kece lia era sa masuti koya. ¹³ Ni na bula ko ira vayadua lia era sa masutia na yaca i Jiova. ¹⁴ Era na qai masu vacava vua era sa yali ni vabautia? a ra na vabauti koya vacava era sa yali ni rogocia kinia? a ra na rogocia vacava, kevaka e yali e dua me tukunia? ¹⁵ Ia era na tukunia vacava, kevaka era sa yali ni talai? me vaka na ka sa volai, Sa lagilagi sara na yavadra era sa tukunia nai tukutuku-vinaka ni veika vinaka! ¹⁶ A ra sa yali ni vabautia kece lia nai tukutuku-vinaka; ni sa tukunia ko Aisea. I Jiova, ko cei sa vabautia na nitou i tukutuku? ¹⁷ Ita sa kila kinia ni sa rawa na vabauta e na varorogo, kei na varorogo e na vosa i Karisito. ¹⁸ Ia ka'u sa tarogia, Era sa yali li ni rogocia? E dina sa vakinia, Sa qai na kedrai rogorogo ki vuravura taucoko, Kei na nodra vosa ki nai yalayala kei vuravura. ¹⁹ Ia ka'u sa tarogia, Sa yali beka ni kila ko ira na Isireli? Sa tukunia eliu ko Mosese, Au na vavuvutaki ikodou e na vukudra era yali ni noqu tamata: Au na vacudrui ikodou e na matanitu sesewa. ²⁰ A sa doudou sara ko Aisea, ka sa tukunia, Era sa kunei au ko ira era a yali ni qarai au: Au sa varairaitakia vei ira era a yali ni tarogi au. ²¹ Ia ka sa tukunia vei ira na Isireli, E na veisiga kece lia ka'u sa dodokia yani na ligaqu kivei ira na tamata dautalaidredre ka dauvatitiqa.