¹ Koi au ko Paula, na talatala i Jisu Karisito, sa kacivi mei apositolo, ka lesi meu tukunia nai tukutuku vinaka ni Kalou ² ko koya sa yalatakia i liu ko koya ka ra vosatakia na nona parofita ena Vola Tabu ³ ena vuku ni luvena o Jisu Karisito na noda Turaga, o koya sa sucu mai na kawa i Tevita me vaka na yagona ⁴ ko koya sa vatakilai vakaukauwa ena tu cake voki mai na mate, ni sa Luve ni Kalou, me vaka na yagona savasava ⁵ ko koya kitou sa rawa voki lia kinia na loloma vata na cakacaka vaka i apositolo me ra vabautia ka talairawarawa kinia ko ira na lewe ni vi vanua kece lia, ena vuku ni yacana ⁶ dou sa kacivi oti va voki lia kinia ko ikodou mo dou nei Karisito. ⁷ vi ikodou kece lia sa tiko mai Roma, o ikodou sa dau lomania na Kalou, ko ikodou sa kacivi me yalosavasava: me nomudou na loloma vata na vacegu mai vua na Kalou ko Tamada, vata kei Jisu Karisito na Turaga. ⁸ Me vatekivu, ko Jisu Karisoto au sa vavinavinaka kinia vua na noqu Kalou, ena vukumudou kece lia ni sa tukunia i vuravura taucoko na nomudou vabautia. ⁹ NI sa noqu i vadinadina na Kalou, ko koya au sa qaravia ena vu ni yaloqu enai tukutuku vinaka ni Luvena, ni sa yali ni mudu ni cavuti ikodou ena visiga ena noqu masu ¹⁰ niu sa dau masu, me dua na gauna meu kalougata kinia ena lewa ni Kalou meu yaco yani vi ikodou. ¹¹ Niu sa gadrevia valevu mei raici ikodou meu solia vi ikodou nai solisoli vayalo eso mo dou vataudeitakia kinia ¹² me da dui vacegui ena vuku ni nomudou vabautia ki na noqu voki lia. ¹³ Ia, ko iko dou na viwekani, au sa yali ni vinakatia mo dou guilecavia, niu sa nakitia valevu mei qai yani vi ikodou (ia au sa tarovia lia me yacovia na siga koya), me dua na noqu yaga ena ikodou maliwa, me va voki lia kinia ena kedra maliwa na matanitu tani. ¹⁴ Sa dodonu vi au me'u sa talatala vi ira na kai Kirisi, vi ira voki lia na lewe ni vivanua loa, vi ira na vuku, vi ira voki lia era sa yali vuku ¹⁵ sa vavoki lia kinia, me vaka au sa rawa sa yaloqu sara me'u vunautakia nai tukutuku vinaka vi ikodou voki lia mai Roma. ¹⁶ Niu sa yali maduatakia nai tukutuku vinaka kei Karisito ni sai koya koya kaukauwa ni Kalou me vabulai kinia o ira yadua era sa vabautia, sa liu vi ira na Jiu, vi ira voki lia sa matanitu tani. ¹⁷ Ni sa vatakila kinia, ni sa vadonui ira na Kalou me ra vabautia me vaka na ka sa volai. Ena bula ena vabautia ko koya sa yalododonu. ¹⁸ Ni sa vatakilai mai Lomalagi na cudru ni Kalou kei na nodra i valavala ca kece lia, vata na nodra yali ni dodonu na tamata, era sa tarovia nai vavuvuli dina enai valavala yali ni dodonu. ¹⁹ Ni sa rairai ena kedra maliwa, na ka ni Kalou sa kilai rawa, ni varaitakia vi ira na Kalou ²⁰ ni sa laurai na ka ni Kalou e vuni tu, io, na nona kaukauwa e yali ni mudu, vata na nona tu va- Kalou, ni sa kilai oti na veika sa buli, mai na gauna sa buli kinia na vuravura, ko koya gona sa yali dua kinia na nodra ulubale. ²¹ Io ni ra sa kila tiko na Kalou, era sa yali ni varokorokotakia me vaka ni Kalou, se vavinavinakatakia, ia sa lialia mai na nodra nanumia, a sa butobuto mai na yalodra sa lialia. ²² NI ra sa tukunia tiko ni ra sa vuku, era sa lialia mai ²³ a ra sa vaisosomitakia na serau ni Kalou sa yali ni mate rawa, ena matakau me vaka na tamata sa ra mate loa, vata na manumanu, vata na manumanu yavai va, vata na veika qasi voli. ²⁴ Ko koya sa daini ira kinia na Kalou me ra vavitaliatakia ena dodomo ni yalodra, me ra vavelavelatakia kinia na yagodra vakai ira ²⁵ era sa vaisosomitakia nai vavuvuli dina ni Kalou, ena ka lasu loa lia, a ra sa soro kinia ka qaravia na ka sa buli, ka yali ko koya sa bulia, ko koya sa nona varokoroko sa yali ni mudu. Emeni ²⁶ Ko koya sa daini ira kinia na Kalou me ra muria na dodomo vasisila, ni ra sa vaisosomitakia ko ira na nodra yalewa nai valavala ca sa lesi e duatani a yali lesi ²⁷ sa va voki lia kinia ko ira na tagane, ni ra sa dainia nai valavala. Sa lesi vata na yalewa, sa waqa na nodra vidomoni vakai ira, a ra sa caka ko ira na tagane ka velavela sara vata kei ira na tagane, sa yaco kinia vi ira nai sau dodonu ni nodra caka cala ²⁸ ra sa yali ni vinakatia mera kila tiko na Kalou, sa daini ira na Kalou me ra lomavata, me ra caka na veika e yali dodonu vi ira ²⁹ me ra sinai ena ka kece lia e ca, na yalo ca, na daukocokoco, na dauvivacacani, me ra sinai ena vuvu, na laba, na vivala, na daivivakaisini, na yalo cudrucudru, me ra dau vosa vakai lo, ³⁰ me ra daukakase, me ra catia na Kalou, me ra vosa levu, me ra viavialevu, me ra dau dokai ira, me ra dauvavunia na ca, me ra dau talaidredre vi ira na nodra matua ³¹ me ra yali ni yalomatua, me ra yalayala ka lasu voki, ka ra sa caca viwekani, era sa yali ni yalololoma ³² ia ni ra sa kila tiko na lewa ni Kalou ni sa dodonu me ra mate o ira era caka na koya, era sa yali ni caka loa lia ko ira, era sa dau vinakati ira voki lia era dau caka.