Sa tukunia koya ko Paula, ni sai talatala i Jisu, ka via raici ira na lewe ni lotu mai Roma, 1-15. Sa qai tukunia sa ka ni Kalou nai tukutuku-vinaka sa vatakilai kinia ni sa vadonui ira na Kalou era sa vabautia, 16,17. Sa cudru na Kalou vi ira kece lia era sai valavala ca; a sa vuqa na nodra i valavala ca na tamata, 18-32.
1
Oi au o Paula, na talatala i Jisu Karisito, sa kacivi mei apositolo, ka lesi meu tukunia nai tukutuku vinaka ni Kalou
2
o koya sa yalatakia i liu o koya ka ra vosatakia na nona parofita ena Vola Tabu
3
ena vuku ni luvena o Jisu Karisito na noda Turaga, o koya sa sucu mai na kawa i Tevita me vaka na yagona
4
o koya sa vatakilai vakaukauwa e na tu cake voki mai na mate, ni sa Luve ni Kalou, me vaka na yagona savasava
5
o koya kitou sa rawa voki lia kinia na loloma vata na cakacaka vaka i apositolo me ra vabautia ka talairawarawa kinia o ira na lewe ni vi vanua kece lia, ena vuku ni yacana
6
dou sa kacivi oti va voki lia kinia o ikodou mo dou ni Karisito.
7
vi ikodou kece lia sa tiko mai Roma, o ikodou sa dau lomania na Kalou, o ikodou sa kacivi me yalosavasava: me nomudou na loloma vata na vacegu mai vua na Kalou o Tamada, vata ki Jisu Karisito na Turaga.
8
Me vatekivu, o Jisu Karisoto au sa vavinavinaka kinia vua na noqu Kalou, ena vukumudou kece lia ni sa tukunia i vuravura taucoko na nomundou vabautia.
9
NI sa noqu i vadinadina na Kalou, o koya au sa qaravia e na vu ni yaloqu enai tukutuku vinaka ni Luvena, ni sa yali ni mudu ni cavuti ikodou e na vi siga ena noqu masu
10
nia sa dau masu, me dua na gauna meu kalougata kinia ena lewa ni Kalou meu yaco yani vi ikodou.
11
Niu sa gadrevia valevu mei raici iko dou meu solia vi ikodou nai solisoli vayalo eso mo dou vataudeitakia kinia
12
me da dui vacegui e na vuku ni nomudou vabautia ki na noqu voki lia.
13
Ia, o iko dou na veiwekani, au sa yali ni vinakatia mo dou guilecavia, niu sa nakitia valevu mei qai yani vi ikodou (ia au sa tarovia lia me yacovia na siga koya), me dua na noqu yaga ena ikodou maliwa, me va voki lia kinia e na kedra maliwa na matanitu tani.
14
Sa dodonu vi au me'u sa talatala vi ira na kai Kirisi, vi ira voki lia na lewe ni vivanua loa, vi ira na vuku, vi ira voki lia era sa yali vuku
15
sa vavoki lia kinia, me vaka au sa rawa sa yaloqu sara me'u vunautakia nai tukutuku vinaka vi ikodou voki lia mai Roma.
16
Niu sa yali maduatakia nai tukutuku vinaka ki Karisito ni sai koya koya kaukauwa ni Kalou me vabulai kinia o ira yadua era sa vabautia, sa liu vi ira na Jiu, vi ira voki lia sa matanitu tani.
17
Ni sa vatakila kinia, ni sa vadonui ira na Kalou me ra vabautia me vaka na ka sa volai. E na bula ena vabautia o koya sa yalododonu.
18
Ni sa vatakilai mai Lomalagi na cudru ni Kalou ki na nodra i valavala ca kece lia, vata na nodra yali ni dodonu na tamata, era sa tarovia nai vavuvuli dina enai valavala yali ni dodonu.
19
Ni sa rairai ena kecdra maliwa, na ka ni Kalou sa kilai rawa, ni varaitakia vi ira na Kalou
20
ni sa laurai na ka ni Kalou e vuni tu, io, na nona kaukauwa e yali ni mudu, vata na nona tu va- Kalou, ni sa kilai oti na veika sa buli, mai na gauna sa buli kinia na vuravura, o koya gona sa yali dua kinia na nodra ulubale.
21
Io ni ra sa kila tiko na Kalou, era sa yali ni varokorokotakia me vaka ni Kalou, se vavinavinakatakia, ia sa lialia mai na nodra nanumia, a sa butobuto mai na yalodra sa lialia.
22
NI ra sa tukunia tiko ni ra sa vuku, era sa lialia mai
23
ra sa qai vaisosomitakia na serau ni Kalou, sa yali ni mate rawa, ena matakau me vaka na tamata sa ra loa, vata na manumanu, vata na manumanu yavai va, vata na veika qasi voli.
24
O koya sa daini ira kinia na Kalou me ra vavitalitakia ena dodomo ni yalodra, me ra vavelavelatakia kinia na yagodra va i ira
25
era sa vaisosomitakia nai vavuvuli dina ni Kalou, ena ka lasu loa lia, a ra sa soro kinia ka qaravia na ka sa buli, ka yali o koya sa bulia, o koya sa nona varokoroko sa yali ni mudu. Emeni
26
O koya sa daini ira kinia na Kalou me ra muria na dodomo vasisila, ni ra sa vaisosomitakia o ira na nodra yalewa nai valavala ca sa lesi e duatani a yali lesi
27
sa va voki lia kinia o ira na tagane, ni ra sa dainia nai valavala. Sa lesi vata na yalewa, sa waqa na nodra vidomoni va i ira, a ra sa caka o ira na tagane ka velavela sara vata ki ira na tagane, sa yaco kinia vi ira nai sau dodonu ni nodra caka cala
28
ra sa yali ni vinakatia mera kila tiko na Kalou, sa daini ira na Kalou me ra lomavata, me ra caka na vi ka e yali dodonu vi ira
29
me ra sinai ena ka kece lia e ca, na yalo ca, na daukocokoco, na dauvivacacani, me ra sinai ena vuvu, na laba, na vivala, na daivivakaisini, na yalo cudrucudru, me ra dau vosa vai lo,
30
me ra daukakase, me ra catia na Kalou, me ra vosa levu, me ra viavialevu, me ra dau dokai ira, me ra dauvavunia na ca, me ra dau talaidredre vi ira na nodra matua
31
me ra yali ni yalomatua, me ra yalayala ka lasu voki, ka ra sa caca viwekani, era sa yali ni yalololoma
32
ia ni ra sa kila tiko na lewa ni Kalou ni sa dodonu me ra mate o ira era caka na koya, era sa yali ni caka loa lia o ira, era sa dau vinakati ira voki lia era dau caka.