¹ Ia ni sa oti na siga ni vacecegu, ko iratou ko Meri na yalewa ni Makitala, kei Meri na tina i Jemesa, kei Salomi, eratou sa volia na waiwai vaisaluaki, me ratou qai ki lumuti koya. ² Ia e na savulaci caca enai matai ni siga ni wiki, eratou sa qai mai ki nai bulubulu ni sa qai cabe na siga. ³ A ratou sa tukunia vakai iratou, Ko cei ena vaqiqicia tani na vatu ena vukuda mai na darava ni bulubulu? ⁴ Ia ni ratou sa raicia, eratou sa raicia ni sa vaqiqici tani na vatu: ni sa vatu levu sara. ⁵ Ia ni ratou sa curu ki nai bulubulu, eratou sa raicia e dua na cauravou sa tiko ena tikinia i matau, sa vaisulu enai sulu balavu ka vulavula; a ratou sa rere. ⁶ A sa tukunia vi iratou ko koya, Dou kakua ni rere: dou sa vaqarai Jisu na kai Nasareci, ko koya ka lauvako ki na kauveilatai: sa tu cake voki ko koya: sa yali koya: raicia na tikinia era a vakotoria kinia! ⁷ ia dou qai, tukunia vi ira na nona tisaipeli, vi Pita voki lia, ni sa liutaki ikodou ko koya ki Kalili; dou na raici koya kinia, me vaka na nona vosa vi ikodou. ⁸ A ratou sa qai kusarawa yani, ka tuba mai nai bulubulu; ia eratou sa sautaninini ka kidroa; eratou sa yali voki lia ni tukunia e dua na ka vua e dua; ni ratou sa rere. ⁹ Ia ni sa tu cake voki ko koya ena savulaci caca enai matai ni siga ni wiki, sa rairai eliu ko koya vi Meri na yalewa ni Makitala, ko koya ka tovocia tani vua ko koya e lewe vitu na tevoro. ¹⁰ Sa qai qai ko koya ka tukunia vi ira era dautiko vata kaya eliu, ni ra sa rarawa ka tagi. ¹¹ Ia ko ira, ni ra sa rogocia sa bula ko koya ka sa rairai vi koya, era sa yali ni vadinatia. ¹² Sa qai rairai ko koya ia sa dua tani na yagona ki na lewe rua vi ira, ni rau sa qai tiko ki na dua na yasana ki vanua: ¹³ a rau sa qai ka tukunia vi ira sa vo; a ra sa yali voki lia ni vadinati rau. ¹⁴ Sa oti, sa rairai ko koya vi ira na lewe tinikadua ni ra sa kana tiko, a sa vunauci ira ena vuku ni nodra yali ni vabautia ki na nodra loma kaukauwa, ni ra sa yali ni vadinati iratou eratou sa raici koya ni sa tu cake voki. ¹⁵ A sa tukunia vi ira, Dou qai yani ki vuravura taucoko, ka vunautakia nai tukutuku-vinaka kivei ira na tamata kece lia. ¹⁶ O koya sa vabautia ka sa papitaisotakia ena bula: ia ena cudruvi lia ko koya sa yali ni vabautia. ¹⁷ Ia na vivatakilakila koya era na caka ko ira sa vabautia: Era na tovocia tani na tevoro eso ena yacaqu; era na vosatakia na vosa ni vivanua tani; ¹⁸ era na tomikia na gata eso; ia kevaka era somia na ka e gaga sara, era na yali ni ca kinia; era na tabaki ira voki lia sa tauvi-mate ena ligadra, a ra na bula kinia. ¹⁹ Ia ni sa vosa oti vi ira na Turaga ko Jisu, sa yadi cake ki lomalagi, ka sa tiko sobu ena liga i matau ni Kalou. ²⁰ Ia ko ira, era sa qai yani, ka vunau ena viyasana kece lia, a sa cakacaka vata kei ira na Turaga, a sa vadinadinatakia na vosa ena vivatakilakila sa muri. Emeni.