¹ Sa qai kacivi ira mai na nona Tisaipeli e lewe Tinikarua me ra soqoni vata, A sa solia vi ira na lewa ki na kaukauwa vi ira kece lia na Tevoro, me ra vabula voki lia na mate. ² Ia sa talai ira ko koya me ra vunau takia na vosa ni Kalou, ka vabulai ira na tauvi mate. ³ A sa tukunia vi ira ko koya, kakua ni yadia e dua na ka ena nomudou i qaiqai, me kua nai titoko, se na taga ni vaqa, se na madrai, se nai lavo se me yarua na nomudou kote. ⁴ Ia na vale kece lia dou curu kinia, Dou tiko lia kinia ka cavu tu yani mai kinia. ⁵ Ia ko ira kece lia era yali ni vacegui ikodou, ni dou sa qai tani ena koro koya, kureitakia sara na kuvu ni soso mai na yavamudou, mei vatakilakila vi ira. ⁶ A ra sa qai yani, ka qai kina vikoro lalai, ka vunautakia nai tukutuku vinaka, ka caka na vivabulai ena viyasana kece lia. ⁷ A sa rogocia ko Eroti na Turaga na ka kece lia sa caka, A sa kidroa kinia, ni sa tukunia eso, sa tucake voki mai na mate ko Joni. ⁸ Sa rairai mai ko Ilaijia, ka so voki, sa tucake voki e dua vi ira na Parofita e liu. ⁹ A sa tukunia ko Eroti, "Au sa tamusukia oti na ului Joni, ko cei beka koya kau sa rogocia kinia na veika ko ya?" A sa via raici koya ko koya.. ¹⁰ Ia ko ira na Apositolo, ni ra sa lesu voki mai, era sa tukunia vua na ka kece lia era sa caka. A sa yadi ira ko koya, ka qai vatikitiki ki na yasana ko Pecisaita. ¹¹ Ia ko ira na lewe levu, ni ra kila, era sa muri koya. A sa vacegui ira o koya, a sa vosatakia vi ira na ka ni matanitu ni Kalou, a sa vabulai ira era sa yali ni bula vinaka. ¹² Ia ni sa kala na siga, sa qai mai ko ira na lewe tinikarua, ka tukunia vua, vatalai ira tani na lewe levu me ra qai kinia vi koro lalai kei na viyasana sa vavolivoliti ita, me ra moce, ka qara na kedra , ni da sa tiko koya ena vanua vagalala. ¹³ A sa tukunia vi ira ko koya, dou solia vi ira me ra kana, sa yali na ka vi kitou, e lima lia nai buli madrai kei na rua na ika, ka vavo kevaka me kitou qai voli kakana me kedra kece lia na lewe levu ko ya. ¹⁴ Ni ra sa lewe lima beka na udolu na tagane, ka sa tukunia vi ira na nona tisaipeli o koya, dou raici ira me ra dabe sobu me rautia ni tauya limasagavulu ena vi wasewase yadua. ¹⁵ A ra sa caka vakinia, ka ra vatikori ira sobu kece lia. ¹⁶ Sa qai tauria o koya nai buli madrai e lima kei na ika e rua, a sa tacake ki lomalagi, ka lotutakia, ka dovia, ka solia vi ira na tisapeli me ra taucia vi ira na lewe levu. ¹⁷ A ra sa kana, ka sa mamau kece lia. A sa tomitomikia vata na vo ni kedra, a sa tinikarua nai su. ¹⁸ A sa tiko dua loa lia ko Jisu, ka masu, ka tiko vata kaya kei ira na tisaipeli. A sa tarogi ira o koya, ka tukunia, era sa tukunia ko ira na tamata se ko cei koi au. ¹⁹ A ratou sa saumia, ka tukunia, ko Joni na dauvipapitaisotaki, ia ka so era tukunia ni ko Ilaijia, ia ka so voki era tukunia ni sa tucake voki mai na mate e dua vi ira na Parofita e liu. ²⁰ Sa qai tukunia vi ira o koya, "Ia na cava dou sa tukunia ikodou se ko cei koi au? Sa vosa ko Pita, ka tukunia, NA MESAIA NI KALOU. ²¹ Sa vadretia ka varotia me ra kua ni tukunia na ka koya vua e dua. ²² ka sa tukunia, Sa kilikili kaya na luve ni tamata me vosotia na ka e levu, me ra daini koya voki lia ko ira na qase kei ira na Bete Levu, kei ira na vunivola, ka me vamatei o koya ka vaturi cake voki enai ka tolu ni siga. ²³ A sa tukunia vi ira kece lia, kevaka e dua sa via muri au, me kakua ni muria na lomana, ia me colatia lia na nona kauveilatai e visiga, ka muri au. ²⁴ Ia o koya yadua sa via maroroya na nona bula, ena vayalia, ia o koya ena vayalia na nona bula ena vukuqu ena maroroya. ²⁵ Ia ka cava na kena yaga vua na tamata, kevaka e rawati vuravura kece, ka vayali na nona bula? ²⁶ Ia ko koya yadua ena maduataki au vata kei na noqu vosa, ena maduataki koya na luve ni tamata, ni sa qai mai ena nona i ukuuku vata kei nai ukuuku nei tamana vata kei na nodra ukuuku na Agilose yalo savasava. ²⁷ Ia kau sa tukunia vaidina vi ikodou, sa tu lia koya eso ena via yali mada ni mate, era na raicia e liu na matanitu ni Kalou. ²⁸ Sa oti na vosa koya ka bogi walu beka, sa qai yadi Pita vata kei Joni vata kei Jemesa o koya, ka qai colo ki na uluni vanua me masu. ²⁹ Ia ni sa masu tiko o koya, sa matalia na matana a sa vulavula ka lumilumisa na nona i sulu. ³⁰ Ka raicia, e lewe rua na tamata sa vivosaki vata kei rau ko Mosese vata kei Ilaija. ³¹ E rau sa rairai mai ena i ukuuku, ka rau vosatakia na nona ciba ena vayacoria ko koya mai Jerusalemi. ³² A sa biti Pita vata kei rau ka tiko kaya na via moce, ia ni ratou sa yadra sara, eratou sa raicia nai ukuuku, kirau na tamata eratou sa tu vata kaya. ³³ Ia ni rau sa qai tani tiko vua, sa tukunia vi Jisu ko Pita, "Ikonu na Turaga sa vinaka na nodatou tiko koya voki lia koya. Ia me kitou tara e tolu na vale vaka cevaceva, e dua me nomuni, ka dua me nei Mosese ka dua me nei Ilaija." (sa yali ni kila na ka sa tukunia.) ³⁴ Ni sa vosa tiko va koya, sa dua na ko sa qai mai, ka varurugi iratou, ka ratou sa rere ni ratou sa curu ki na o. ³⁵ A sa rogo e dua na vosa mai na o, ka tukunia, oqo na luvequ, na noqu gone ni toko, dou rogoci koya. ³⁶ Ia ni sa oti na vosa, sa kune dua loa lia ko Jisu. A ratou sa vunia lia, ka yali ni tukunia vua e dua ena gauna koya e dua na ka eratou raicia. ³⁷ Ia ena savulaci, ni ratou sa qai sobu mai na ulunivanua, era lewe levu sara sa vitavaki kaya. ³⁸ Ka raicia, sa dua vi ira na lewe levu sa kaci cake, ka tukunia, Vavuvuli au masuti ikonu, mo ni mai raicia na luvequ tagane, ni sa luvequ e dua loa lia. ³⁹ Ka raicia, sa dua na yalo sa tauri koya a sa qoqolou vasauri kinia: a sa bitabita laki koya, ka sa qai vuso na gusuna, a sa vamavoatakia ka dredre ni qai tani vua. ⁴⁰ Kau a masuti ira na tisaipeli me ra tovoci koya tani, ia era sa yali ni rawatia. ⁴¹ A sa vosa ko Jisu ka tukunia, Ai tabatamata sa yali vabautia ka yalo vatani, a cava na kena dede meu tiko ki ikodou, ka vosotia voli ki ikodou? Yadia mai gona na luvemu. ⁴² Ia ni sa qai tiko mai o koya, sa vabalea na Tevoro, ka bitabitalaka. A sa vunaucia na yalo velavela ko Jisu, a sa vabula na gone ka solia voki vi tamana. ⁴³ A ra sa kurabui kece lia ena kaukauwa ni Kalou, ia ni ra sa kurabui kece lia ena vuku ni ka kece lia sa caka ko Jisu, sa tukunia vi ira na nona tisaipeli o koya. ⁴⁴ Me kasa sara ki daligamudou na vosa koya. Ni sa soli yani na luve ni tamata ki na ligadra na tamata. ⁴⁵ Ia era sa yali ni kila na vosa koya, sa vuni vi ira, ka ra sa guilecavia, ka ra sa rere ni tarogi koya ena vosa ko ya. ⁴⁶ Sa qai tubu vi ira na vileti, se ko cei vi ira sa uasivi cake. ⁴⁷ Ia ni sa raicia ko Jisu na nanumia ni yalodra, sa yadia e dua na gone lailai, ka vatura e tikinia. ⁴⁸ A sa tukunia vi ira, o koya yadua sa vinakatia na gone lailai koya ena vuku ni yacaqu sa vinakati au, sa vinakati koya sa talai au mai. Ni sa uasivi cake o koya sa lailai sara vi ikodou kece lia. ⁴⁹ Sa qai vosa ko Joni, ka tukunia, ikonu na Turaga, kitou sa raicia e dua sa vatala tani na tevoro eso ena yacamuni, ka kitou sa tarovia ni sa yali ni muri ita. ⁵⁰ A sa tukunia vua ko Jisu, kakua ni tarovi koya, baletia ni ko koya sa yali visaqasaqa ki ikodou sa noda i to. ⁵¹ Ia ni sa yaco dina na gauna me yadi cake kinia o koya, sa vaqara matua na matana me qai ki Jerusalemi. ⁵² A sa tala eso na tamata me ra liu e matana, a ra sa qai ka curu kina dua na koro lailai na kai Samaria, me ra varautakia na kena. ⁵³ Ia era sa yali ni ciqomi koya, baletia ena vuku ni nona sa vanamata tiko lia me qai ki Jerusalemi. ⁵⁴ Ia ni sa raicia koi rau na nona tisaipeli ko Jemesa vata ki Joni erau sa tukunia, na Turaga, ko ni sa vinakatia me kirau tukunia me lutu sobu mai lomalagi na bukawaqa me vakamai ira. ⁵⁵ A sa vuki o koya, ka vunauci rau, ka tukunia, kodrau sa yali ni kila nai valavala ni yalomudrau. ⁵⁶ Ni sa yali ni qai mai na luve ni tamata me vamatei ira na tamata, me vabulai ira lia. A ra sa qai ki na dua voki na koro lailai. ⁵⁷ Ia ni ra sa qai tu ena sala, sa dua e tukunia vi koya, Ikonu na turaga, au na muri ikonu ki na viyasana kece lia ko ni na qai kinia. ⁵⁸ Sa qai tukunia vua ko Jisu, sa vaqara na fokisi, ka sa vairoro na manumanu vuka, ia na luve ni tamata sa yali na tikinia me vadavoria kinia na uluna. ⁵⁹ A sa tukunia o koya vua e dua voki, muri au, a sa tukunia o koya, Ikonu na Turaga, daini au meu qai mada ka buluti tamaqu. ⁶⁰ A sa tukunia vua ko Jisu, dainia na mate me ra bulutia na nodra mate, ia ko iko mo qai vunautakia na matanitu ni Kalou. ⁶¹ A sa tukunia e dua voki, ikonu na turaga, au na muri ikonu, ia mo nu daini au lia meu qai mada meu vitatau vi ira mai nitou. ⁶² A sa tukunia vua ko Jisu, e yali ni dua na tamata sa tauria nai siviyara ka qai rai ki muri, me yaga ena matanitu ni Kalou.