¹ Era a tiko eso na tamata ena gauna vata ko ya ka ra tukunia vi Jisu na ka e baleti ira na kai Kalili ka a vamatea o Pailato ena gauna era vacaboisoro tiko kinia vua na Kalou. ² qai tukunia vi ira ko Jisu, “ Ko ni nanumia beka ni ra sai valavala ca valevu cake o ira sa mate va gona mai vi ira na vo ni kai Kalili? ³ E yali sara!; Ka'u sa tukunia koya vi ikodou ni kevaka ko ni sa yali ni vivutuni mai na nomuni i valavala ca, o ni na rusa kece lia me vataki ira. ⁴ Sa evei ko iratou na lewe tinikawalu ka mate ni a lutuki ira na doka ni vale cecere mai Sailoama, ko ni sa nanumia ni ra sai valavala ca valevu mai vi ira na tamata mai Jerusalemi? ⁵ Sa tukunia ko Jisu, e yali sara lia, ia kevaka ko ni sa vivutuni, ko ni na mate voki lia kinia. ⁶ Sa qai tukunia ko Jisu na vosa vatautauvata koya, "E dua na tamata sa teya e dua na vunilolo ena loma ni nona loganivaini, ni sa qai mai me mai vaqara na vuana, sa yali ni raicia e dua, ⁷ 'Sa qai tukunia vua nai vatawa ni vaini, raicia sa tolu na yabaki na noqu dau qai mai meu mai vaqara na vua ni vunilolo ka yali niu se bau raicia kinia e dua na vuana. Musukia dai, na cava e mai vamaumautakia kinia na qele.?' ⁸ A saumia na dauteitei ka tukunia, "Dainia saka me dua voki na yabaki, meu na qai cukirakia vavolivolita ka dainia kinia nai vabulabula ni qele. ⁹ Kevaka e vua ena yabaki vou ka vinaka, ia kevaka e yali ni vua, musukia ki ra. ¹⁰ A vavuvuli tiko ko Jisu ena dua na valenilotu ena siga ni vacecegu. ¹¹ Ka raicia e dua na goneyalewa ka curumia tu na nona bula na yalo velavela me tinikawalu na yabaki, sa vakalairoro ka yali ni duri cake rawa. ¹² Ni sa raicia ko Jisu, sa kacivia ka tukunia vua, "Yalewa ko sa sereki mai na nomu tauvimate." ¹³ Sa qai tauria na ligana ko Jisu, ka vasauri na nona tu vadodonu ka varokorokotakia na Kalou. ¹⁴ A sa cudru na i liuliu ni valenilotu ni sa ia ko Jisu na vivabulai ena siga ni vacecegu. A saumia ka tukunia vi ira na tamata, "E ono na siga mo cakacaka kinia. Qai mai mo vabulai, ia, me kakua lia ena siga ni vacecegu." ¹⁵ A sa saumia vi koya na Turaga, ka tukunia, "Dou tamata dauvivakaisini, dou sa yali li ni dui serekia na nona pulumakau ki asa mai na vanua e vesu tu kinia ka yadia me qai ki somi ena siga ni Vacecegu? ¹⁶ Io vi na goneyalewa koya, na luvei Eparama, ka vesukia tu o setani me tinikawalu na yabaki, raicia, sa yali beka ni dodonu sereki mai nai vesu koya ena siga ni Vacecegu? ¹⁷ Ena nona sa tukunia na veika kece lia, o ira kece lia era saqati koya era sa madua, ia na tamata kece lia sa reki ena vuku ni veika lagilagi sa caka o koya. ¹⁸ Sa qai tukunia o Jisu, "Na cava nai rairai na Matanitu ni Kalou ki na cava e rawa ni vatautauavatatakia kinia? ¹⁹ Sa tautauvata ki na dua na sore ni mosita, sa tauria e dua na tamata ka teya ena nona i teitei, sa tubu ka yacovia me dua na vunikau levu kara caka sova kinia na manumanu vuka ena vitabana" ²⁰ A sa tukunia voki ko Jisu, meu vatautauvatatakia ki na cava na matanitu ni Kalou? ²¹ Sa tautauvata ki na vatubu sa tauria e dua na yalewa me viwakitakia ki na tolu nai varau madrai droka, ka yacovia ni sa tubu vinaka." ²² Sa viqaiyaki voli ko Jisu ena vikoro lelevu vata ki na vikoro lalai ka vatavuvuli tiko, ka qai tiko ki Jerusalemi. ²³ Sa qai tukunia vi koya e dua, Ikonu na Turaga, era lewe lailai era na bula?, ²⁴ "Dou gumatua sara mo dou curumia na matamata ni koro qiqo niu sa tukunia vi ikodou, era lewe levu era vatovolea me ra curumia, ia era na yali ni rawatia. ²⁵ Na gauna sa tucake kinia nai taukei ni vale me sogotia na darava, ia dou sa tu e tautuba ka tukituki ki na darava, ka tukunia, 'Turaga, Turaga, nu vacurumi kimamu.' "Sa qai saumia mai ka tukunia, 'au sa yali kilai ikodou se dou sa qai mai vei.' ²⁶ Ia dou na qai tukunia, kimamu a dau kana ka somi vata ena matamuni ka dau vatavuvuli voli ena nimamu vi tolo ni sala.' ²⁷ Ia ena qai saumia, ka tukunia vi ikodou, Au sa yali ni kila na vanua ikodou qai mai kinia. Qai tani mai vi au, koi ikonu na tamata i valavala ca!' ²⁸ Ia ena yaco na vitagicaki ka vasequruquru bati ena gauna dou raici Eparama, Aisake, Jekope vata ki ira kece lia na profita ena matanitu ni Kalou, ia koi ikodou na tovoci kinia i tuba. ²⁹ Era na qai mai ko ira mai natokalau, mai na ra voki lia, mai na vualiku voki lia vata ki na ceva, ka ra vadaberi ena dua na teveli sa varautakia na matanitu ni Kalou. ³⁰ Ka raicia, eso era sa tu e muri era na qai ki liu, ka so era tu e liu era na qai ki muri." ³¹ Ena siga koya sa qai mai eso na Farisi, ka tukunia vua, "Mo qai tani ka dainia na vanua koya baletia ni sa via vamatei ko Eroti." ³² Sa tukunia ko Jisu, " Qai ka qai ki tukunia vua na fokisi koya, "Raicia, Au na vatalai ira tani na tevoro ka caka na vivabulai ena siga koya ki na savulaci kau na qai vaotia na noqu cakacaka ena i ka tolu ni siga. ³³ Ena vuku ni veika koya, e yaga vi au meu tomania na siga koya, savulaci vata ki na siga vitaravi, ni sa yali ni dodonu me mate e dua na parofita ena taudaku ki Jerusalemi. ³⁴ Isa Jerusalemi, Isa Jerusalemi! o iko a vamatei ira na parofita ka virilakia na vatu vi ira na i talatala ka talai yani vi iko. E levu na siga au na via vasoqoni ira kinia na luvemu me vaka sa soqonia na luvena na toa yalewa ena ruku ni tabana, ia dou sa yali ni vinakatia. ³⁵ Raicia, sa lala tu na nomudou vale. Au sa tukunia vi ikodou, dou na yali raici au me yacovia na gauna dou sa tukunia kinia, 'Sa kalougata ko koya sa qai mai ena yaca ni Turaga."