¹ Ena gauna koya ni ra sa vasoqoni vata mai e udolu na tamata ka ra sa soqoni vata mai, a ra sa vibutuqaqia lia, sa qai tukunia mada e liu vi ira na nona tisaipeli ko koya. Dou qarauni ikodou mai na nodra leveni na Farisi, koya na dauvivakaisini. ² Ia sa yali na ka sa vuni, me kakua ni varaitakia, se tabogo, me kakua ni kilai. ³ Ia na ka dou sa tukunia ena butobuto ena rogo votu, ia na ka dou sa tukunia e daligadra ena vi tikinia vuni, ena kacivaki mai na na dela ni vale. ⁴ Ia ka'u sa tukunia vi ikodou, na wekaqu, Dou kakua ni rerevaki ira era sa vamatea lia na yago, ia e muri sa yali voki na ka era caka rawa. ⁵ Ia ka'u sa tukunia vi ikodou se ko cei mo dou rerevakia: dou rerevaki koya lia sa rawatia me vamatea, ka oti sa rawatia voki lia me dainia ki eli, io, au sa tukunia vi ikodou, Dou rerevaki koya. ⁶ Sa yali li ni volitakia na separo e lima ena facigi e rua? ia ka yali e dua vi ikodou sa guilecavia ena mata ni Kalou. ⁷ Ia sa wili kece lia na drau ni ulumudou. O koya koya mo dou kakua ni rerevakia, dou sa uasivi cake vi ira na separo e levu. ⁸ Au sa tukunia voki lia vi ikodou, O koya yadua ena vatusai au ena matadra na tamata, ena vatusai koya voki lia na Luve ni tamata ena matadra na agilose ni Kalou: ⁹ ia ko koya ena cakitaki au lia ena matadra na tamata, ena cakitakia ena matadra na agilose ni Kalou. ¹⁰ Ia ko koya yadua ena vosavakacacatakia na Luve ni tamata, ena rawa me kakua ni cudruvi kinia; ia ko koya ena vosavakacacatakia na Yalo Tabu, ena yali sara ni rawatia me kakua ni cudruvi. ¹¹ Ia ni dou sa yadi ki na vivale ni lotu, vi ira na dauvilewai ki ira na turaga, dou kakua ni lomaocaocatakia, se vaevei mo dou tukunia, se cava mo dou tukunia. ¹² ni na vavulici ikodou na Yalo Tabu ena tiki-ni-siga ko ya ena ka e dodonu mo dou tukunia. ¹³ A sa dua lia vi ira na lewe levu sa vosa mai vi koya, Vavuvuli, tukunia mada vua na tuakaqu me soli vi au na noqui votavota enai yau nei koya na tama i kirau. ¹⁴ A sa tukunia vua ko koya, Ko iko, ko cei sa lesi au me'u turaga ni lewa se dauvivota vi ikodou? ¹⁵ Sa tukunia voki lia vi ira ko koya, Dou raici ikodou vinaka, ka tarovi ikodou mai na daukocokoco, ni sa yali ni kalougata na tamata ena vuku ni sa levu na ka sa tu vua ¹⁶ A sa tukunia ko koya e dua na vosa vatautauvata vi ira, ka tukunia, Sa dua na tamata vutuniyau sa valewe vinaka sara na nona vanua: ¹⁷ a sa qai vananumia e lomana ka tukunia, A cava me'u caka ni sa yali na noqu lololo me'u binia kinia na noqu lewe ni viwere? ¹⁸ Sa qai tukunia, Okoya lia na ka ka'u na caka; au na basukia na noqu lololo, ka tara voki na ka levu, au na qai binia kece lia kinia na noqu lewe ni viwere ki na noqui yau: ¹⁹ au na qai tukunia ki na yaloqu, Yaloqu, sa levu na nomui yau sa bini tu ena rautia na yabaki e levu, mo vacegu mada, mo kana, mo somi, mo marau tiko. ²⁰ Ia sa tukunia vi koya na Kalou, Ko iko na lialia? ena bogi lia koya ena tarogi voki vi iko na yalomu: ena qai nei cei na veika ko sa varautakia? ²¹ Sa vakinia ko koya sa daubinia nai yau me nona, a sa yali ni vutuniyau, ena ka ni Kalou. ²² Sa qai tukunia o koya vi ira na nona tisaipeli, O koya lia koya ka'u sa tukunia kinia vi ikodou. Mo dou kakua ni lomaocaocatakia ena vuku ni nomudou bula, ena ka mo dou kania, se na vuku ni yagomudou, ena ka mo dou vaisulu kinia. ²³ Sa ka levu na bula, a ka lailai na kakana, ia sa ka levu lia na yago, ka lailai nai sulu. ²⁴ Dou vakananumia na reveni: era sa yali ni kabukaburakia, se tatamusuki; sa yali na nodra vale ni yau se nodra lololo, ia sa vakani ira lia na Kalou: sa dina dou sa yaga valevu cake vi ira na manumanu! ²⁵ Ia ko cei vi ikodou kevaka sa lomaocaoca sa rawatia me vakuria valailai lia na siga ni nona bula? ²⁶ Ia kevaka dou sa yali ni caka rawa na ka lailai lia koya, dou sa lomaocaoca ena ka sa vo ena vuku ni cava? ²⁷ Dou vananumia na viavia, era sa tubu vaevei: era sa yani ni daucakacaka, se dautalitali; ia kau sa tukunia vi ikodou, Ko Solomoni ena nonai ukuuku kece lia sa yali ni vaisulu me vaka e dua vi ira koya. ²⁸ Ia kevaka sa vasulumia vaka koya na Kalou na co sa tu ni kua ena viwere, a sa biu ki na lovo ena savulaci caca:ena yali li ni vinakatia valevu cake me vasulumi ikodou koi ikodou sa lailai na nomudou vabautia. ²⁹ Ia dou kakua lia ni dau vaqara na ka mo dou kania, se ka mo dou somia: me kakua voki lia ni veidreyakia na lomamudou. ³⁰ Ni ra sa dauvaqara lia na ka kece lia koya ko ira na lewe ni vivanua kece lia e vuravura: ka sa kila na Tamamudou ni sa yaga vi ikodou na veika koya. ³¹ Ia mo dou vaqara lia na nona matanitu: ia ena soli me kenai kuri vi ikodou na ka kece lia koya. ³² Kakua ni rerevakia, na qele-ni-sipi lailai; ni sa vinakatia sara na Tamamudou me solia vi ikodou na matanitu. ³³ Dou volitakia na ka sa tu vi ikodou, ka solia nai loloma; varautakia vi ikodou na taga-ni-lavo ena yali ni madra, ai yau mai lomalagi ena yali ni oti rawa, sa yali na daubutako sa torovia, se na sarasara sa kania. ³⁴ Ni na tiko na yalomudou ena yasana sa tiko kinia na nomudoui yau. ³⁵ Me vauci tikolia na tolomudou; me caudre voki lia na nomudou cina; ³⁶ ia mo dou vaka na tamata era warakia na nodra turaga, me na qai voki mai na magiti ni vakawati; me ra dolavi koya vakatotolo sara, ni ra qai mai ka tukituki ko koya. ³⁷ Sa kalougata ko ira na tamata koya, ena raici ira na turaga ni ra sa vatawa tiko, ni sa qai mai ko koya; au sa tukunia vaidina vi ikodou, ena vaucia na nonai sulu, ka tukunia me ra tiko sobu, ka na qai mai o koya ka qaravi ira lia. ³⁸ Ia kevaka ena qai mai ko koya enai ka rua ni wase-ni-bogi, se qai mai enai katolu, ka raici ira ni ra sa yadra tiko, era sa kalougata lia na tamata koya. ³⁹ Ia dou kila lia koya, kevaka e kila nai taukei ni vale na tiki-ni-bogi e qai mai kinia na daubutako, sa vatawa lia, ka yali ni dainia na nona vale me ravabasukia. ⁴⁰ Ia dou varau tu vakinia koi ikodou voki lia: ni sa qai mai na Luve ni tamata na tiki-ni-siga dou sa yali ni nanumia kinia. ⁴¹ Sa qai tukunia vua ko Pita, Ikonu na Turaga, ko ni sa tukunia beka na vosa vatautauvata koya vi kitou lia, se veira kece lia? ⁴² Sa tukunia vua na Turaga, Ko cei beka na tamata yalododonu ka vuku, ena lesia na turaga me lewai ira na nona lewe-ni-vale, me solia na kedrai votavota ena gauna dodonu? ⁴³ Sa kalougata lia na tamata koya, ko koya ena raicia na nona turaga ni sa caka vakinia, sa qai mai ko koya. ⁴⁴ Au sa tukunia vaidina vi ikodou, Ena lesi koya me lewa na nona ka kece lia. ⁴⁵ Ia kevaka ena tukunia e lomana na tamata ko ya, Sa vaberaberatakia na nona qai voki mai na noqu turaga: a sa vatekivu kinia me yaviti ira lia na lewe-ni-vale na tagane ki na vada, me daukana voki lia ka dausomi, ka daumateni; ⁴⁶ ena qai mai na turaga ni tamata koya ena siga sa yali ni nanumia kinia ki na tiki-ni-siga e yali ni kinia; ena qai varomusukia rua, ka lesi koya me votai vata ki ira sa yali ni vabautia. ⁴⁷ Ia na tamata ko ya, sa kila na loma ni nona turaga, ka yali ni varau kinia, se caka me vaka na lomana, ena yaviti lia valevu. ⁴⁸ Ia ko koya sa yali ni kila, ka caka na ka e dodonu me yaviti kinia, ena yaviti valailai lia. Ni na tarogi valevu mai vua sa soli valevu vua; ia ena taroga valevu ko ira na tamata mai vua era sa solia valevu vua. ⁴⁹ Au sa qai mai me'u dainia na buka waqa ki vuravura; ia ka cava voki me'u gadrevia, kevaka sa waqa tu? ⁵⁰ Ia sa dua na noqu papitaiso me'u papitaisotaki kinia; a sa rarawa valevu na lomaqu me oti mada koya! ⁵¹ Dou sa vakasamatakia beka ni'u sa qai mai me'u vayacora lia na vivinakati ki vuravura? au sa tukunia vi ikodou, E yali, a visei lia: ⁵² sa tekivu ena gauna koya me; lewe lima ena dua na vale eratou na vimecaki, na lewe tolu ki rau na lewe rua, na lewe rua voki lia ki iratou na lewe tolu. ⁵³ Era na vimecaki na vitamani-tagane; ki na vitinani-yalewa; ki na vivugoni yalewa. ⁵⁴ Sa tukunia voki lia vi ira na lewe levu, Ni dou sa raicia sa tubu mai ra na o, do sa tukunia sara, Sa dua na uca sa qai mai; a sa vakinia. ⁵⁵ Ia ni sa liwa na ceva, dou sa tukunia, Ena dua na katakata levu: a sa yaco lia. ⁵⁶ Na dau vivakaisini! dou sa kila rawa na mata i vuravura ki lomalagi: ia ka vaevei ni dou sa yali ni kila na gauna koya? ⁵⁷ Ia ka vaevei ni dou sa yali ni lewa va ikodou na ka e dodonu? ⁵⁸ Ni drau sa qai vata ki koya sa bitaki iko ki na turaga-ni-lewa, mo gumatua e gau-ni-sala me oti mada na nona bitaki iko, de yadi iko lia vua na turaga-ni-lewa, ka soli iko na turaga-ni-lewa vua na ovisa, ka daini iko na ovisa kina vale ni vivesu. ⁵⁹ Au sa tukunia vi iko, Ko na yali sara ni sereki mai kinia, ko na saumia kece mada nai lavo.