¹ Ena gauna sara lia ka masu tiko kinia ena dua na yasana ko Jisu, qai dua vi iratou na tisaipeli sa tukunia vua, ikonu na Turaga ni vavulici kimamu me vaka sara lia nona vavulici ira kinia na nona tisaipeli o Joni. ² A sa tukunia vi ira, ko koya, ni dou sa masu dou tukunia, "Tamai kimamu mai lomalagi me varokorokotaki na yacamuni, me yaco na nomuni lewa, me vaka sa caka na lomamuni e vuravura me vaka sa caka voki lia mai lomalagi. ³ Mo ni solia mai vi kimamu ena siga yadua na kakana me rauti kimamu. ⁴ Ia mo ni kakua ni cudruvi kimamu ena vuku ni nimamu i valavala ca, ni kimamu sa yali cudruvi ira era sai valavala ca vi kimamu. Ia mo ni kakua ni kauti kimamu kina vere, ka mo ni vabulai kimamu mai na ca. ⁵ A sa tarogi iratou ko koya, o cei vi ikodou sa dua na wekana sa qai vua ena lomaloma ni bogi ka tukunia vua, na wekaqu au kerekere mo solia mai vi au e tolu nai buli madrai. ⁶ Ni sa dua na wekaqu sa mai vacegu vi au ena nona qai tu, sa yali na ka vi au meu taucia vua. ⁷ Ena qai tukunia ko koya mai vale, kakua ni vaocai au, na darava voki lia e se sogo tu ka kitou se davo iratou na luvequ ena mocemoce, au yali rawa ni solia. ⁸ Au sa tukunia voki lia vi ikodou, kevaka e bese ni tucake ka solia vua ni sa wekana, ia ni sa cikevia tiko ko koya ena tucake ka solia na ka ena rauti koya. ⁹ Au sa via tukunia vi ikodou, dou kerekere ka na soli vi ikodou, dou vaqara ka dou na raicia, dou tukituki ka na dola vi ikodou. ¹⁰ Ni sa soli vi koya yadua sa kerekere ka sa raicia ko koya sa vaqara, ia ena dolavi vua sa tukituki. ¹¹ E dua li vi ikodou na tama ni gone, kevaka sa mai kere madrai vi iko na luvemu, o na solia beka vua e dua na vatu? ¹² Ia kevaka sa kere ika ena solia beka vua e dua na gata mei sosomi ni ika? ¹³ Ia kevaka e kere yaloka, ena solia beka vua e dua na batibasaga? Ia kevaka dou kilai ikodou sa tamata ca mo dou solia na ka vinaka vi ira na luvemudou, sa qai dina valevu cake, ni solia na Yalo Tabu ko koya na tamamudou valomalagi vi ira sa kerekere vua. ¹⁴ A sa tovocia tani tiko e dua na tevoro ko koya, a sa galu. Ia ni sa qai tani na tevoro sa vosa na galu ka kurabui ko ira na lewe levu. ¹⁵ Sa tukunia eso vi ira, sa cemuria tani na tevoro ko koya ena kaukauwa nei Pielisipupi na nodra turaga na tevoro. ¹⁶ Ia ka so voki era sa vatovolei koya, ka raicia e dua nai vatakilakila mai lomalagi. ¹⁷ Ia sa kila vinaka o Jisu na ka era sa vinanuyakia ka tukunia vi ira, na matanitu era yali ni duavata na lewena era na rusa lia, ka vaka voki lia na vuvale era yali ni duavata era na bale. ¹⁸ Kevaka voki lia e yali ni duavata na matanitu nei Setani era na tudei vakaevei? me vaka ni dou tukunia ni dou sa cemuri ira na tevoro ena kaukauwai Pielisipupi. ¹⁹ Ia kevaka kau sa cemuri ira na tevoro ena kaukauwa nei Pielisipupi, ena cemuri na kaukauwa nei cei ko ira na nomudou? o koya ena lewai ikodou kinia ko ira koya. ²⁰ Ia kevaka au sa cemuria tani na tevoro ena dua lia nai qaqalo ni Kalou, sa kenai balebale na matanitu Kalou sa tu vi ikodou. ²¹ Ni sa vaiyaragi vinaka tu e dua na qaqa ka yadravia tu na nona vale, sa na tu vinaka tu lia na nonai yaya. ²² Ia ni sa qai mai vua e dua e qaqa cake vua sa vamalumalutakia ka kalirakia na nonai yaragi ka dau vararavi tu kinia ka vivotayakia na nonai yau. ²³ O koya sa yali ni to vata ki au sa noqu meca, kei koya e yali ni kumunia vata ki au sa vidaiyakia. ²⁴ Ni sa dainia e dua na tamata na yalo velavela, sa na viqaiyaki voli ena vanua talasiga me vaqara e dua na vanua me vacegu kinia. Ia kevaka sa yali ni raicia, ena tukunia, "au na qai voki ki na noqu vale kau a qai mai kinia". ²⁵ Ni sa yaco kinia, a sa raicia ni sa samaki vinaka tu ka tuvani vamatau. ²⁶ Sa qai ko koya ka yadia vata mai e vitu voki na tevoro eratou ca valevu cake mai vua. E ratou sa curu ka tiko kinia, ka sa yaco e muri me ca valevu cake sara na tamata koya mai na nona bula eliu. ²⁷ NI sa cavutia tiko na veika koya ko Jisu, sa qai rogo cake mai na domona e dua na yalewa mai vi ira na lewe levu ka tukunia vua, "sa kalougata na kete ko ni sa sucu mai kinia ki na matanisucu ko ni a sucumia. ²⁸ Ia sa qai saumia o Jisu ka tukunia, "era sa kalougata cake ko ira era rogocia na vosa ni Kalou ka muria." ²⁹ Ni ra sa soqoni vata tiko vi Jisu na lewe levu, sa qai tukunia, "koya sa dua nai tabatamata ca; e varaicia e dua nai vatakilakila, ia e yali ni soli kinia e dua nai vatakilakila, vavo lia nai vatakilakila ki Jona na parofita. ³⁰ Me vaka ni a yaco o Jona mei vatakilakila vi ira na kai Ninive, ena vavoki lia kinia na Luve ni tamata vi na tabatamata koya. ³¹ Ena siga ni lewa, ena tucake mai na Radini Sipa, ka beitaki ira na tabatamata koya ena nodra cala baletia ni qai via mai o koya na sala balavu mai na yalayala ki vuravura me mai rogocia nai vavuvuli vuku i Solomoni, ia au sa tukunia vi ikonu ni sa tu koya e dua e uasivi cake sara mai vi Solomoni. ³² Era na tucake na kai Ninive ena siga ni lewa koya ka ra na beitaki ikonu kinia ni ra a vivutuni ena vunau i Jona, ia sa tu koya e dua e levu cake vi Jona. ³³ "E yali ni na tamata ni sa tutuvakia oti na cina, me qai dainia ena dua na tikina vuni se ena rukuni varau ni sila, ia e dainia lia e na kenai tutu ka me raicia rawa na kena rarama o ira era curu mai. ³⁴ A cina ni yago na mata. Ni sa vinaka tu na matamu, sa rarama kinia na yagomunu taucoko, ia ni sa ca tu na matamuni, sa butobuto kinia na yagomuni taucoko. ³⁵ O koya mo qai qaraunia de na qai butobuto na rarama ka tu vi iko. ³⁶ Kevaka sa sinai na yagomuni taucoko ena rarama, ka yali ni dua na tikina e butobuto, ena rarama taucoko sara, me vaka lia ni sa cinavi iko na cina e na kenai serau. ³⁷ Ia ni sa vosa tiko ko Jisu, sa qai sureti koya sara e dua na Farisi me rau qai kana vata. A sa curu ki loma ko koya ka dabe sobu me kana. ³⁸ E a kurabui ko ira na Farisi ni raicia ni yali ni vuluvulu ko koya ni bera ni kana. ³⁹ Sa qai tukunia vua na Turaga, "oi ikodou na Farisi ko ni dau vasavasavatakia lia na taudaku ni bilo ki na veleti, ia na lomamuni sa sinai tu ena kocokoco ki na valavala ca". ⁴⁰ Ko ni sa rui yalowai! E yali li ni caka voki lia na tikinia e loma o koya ka caka na tikinia e taudaku? ⁴¹ Ia ni sa solia me kani loloma vi ira na dravudravua na veika sa tu vi ikodou, ka raicia sa na savasava vi ikodou na ka kece lia. ⁴² Ia ni ko ni na kalouca na Farisi! Ni ko ni sa dau solia nai katini ni vimataqali kau lalai sara, nai vaboi ni kakana, ia ko ni sa dainia vatikitiki tani toka lia na lewa dodonu ki na loloma ni Kalou. E dodonu mo ni vayacoria na veika koya, ka kakua voki lia ni guilecavi ira na kena vo. ⁴³ "O ni kalouca na Farisi! ni ko ni dau domonia lia nai tikotiko cecere ena vivalenilotu, ki na vikidavaki ena vanua ni vivoli eso. ⁴⁴ O ni kalouca! Ni ko ni sa vaka nai bulubulu ka yali tu na kena vatakilakila, era qai vaka ka vaka e delana na tamata ka ra yali ni kila". ⁴⁵ Sa qai saumia lesu vua e dua na daunilawa, ka tukunia, "nai vavuvuli, ena nomuni tukunia na ka koya, o ni sa vosa vacacataki kimamu voki lia kinia." ⁴⁶ A sa saumia ko Jisu ka tukunia, "o ni na kalouca voki lia na daunilawa! ni o ni vataqara vi ira na tamata nai colacola bibi me ra cola ka yali mada lia ni bau yavalatia e dua nai qaqalo ni ligamunu mo ni bau vukei ira kinia. ⁴⁷ Ko ni sa kalouca! ni ko ni sa tara na nodrai bulubulu na parofita, ia ko ira na nomuni qase era a vamatei ira. ⁴⁸ O ni sa vadinadinatakia va koya na nomuni a tokonia na veika era a vayacoria na nomuni qase, koya na nodra a vamatei ira ka tara na kedrai bulubulu ⁴⁹ Ena vuku ni ka koya sa tukunia na vuku ni Kalou, "Au na tala eso na parofita ki na apositolo, ka ra na vamatea ka vacacania so vi ira koya. ⁵⁰ Ka me ra tarogi kinia nai tabatamata koya ena vuku ni nodra dra na parofita kece lia ka vadavei mai nai vakatekivu kei vuravura, ⁵¹ Mai na dra i Epeli, ki na drai Sakaraia, o koya ka vakamatei ena tadrua ni cabocabo ni soro ki na tikinia tabu. Io au sa tukunia vi ikonu, ena tarogi kinia nai tabatamata koya. ⁵² "Dou sa kalouca na daunilawa! Dou sa maroroya tiko lia nai dola ki na katuba ni kila ka, dou na yali ni curu kinia oi ikodou, ka dou sa tarovi ira era sa via curu kinia!" ⁵³ Ia ni sa qai tani mai ko Jisu, era sa tekivu me ra valewai koya vaca sara na daunilawa ki ira na Farisi, ka vaqaqai koya matua ena veika kece. ⁵⁴ Ka ra tovolea me ra lawakitakia ka coritia ena vosa ka lutu mai na gusuna.