¹ Sa qai oti na veika koya, sa qai lesia na Turaga e vitusagavulu voki, ka talai ira me ra qai yayarua ka liu vua kinia vikoro kece lia ki na vitikina sa via qai kinia ko koya. ² A sa tukunia vi ira sa matua tu na were ka sa levu na me tamusukia, ia sa lewe lailai lia ko ira me ra mai tamusukia. O koya mo dou qai masuti koya nai taukei me tala voki mai eso me ra mai vivuke ena tatamusuki. ³ Dou qai, raicia au sa talai ikodou yani me vaka na sipi ena kedra maliwa na wolifa. ⁴ Kakua ni yadia na taga i lavo se na taga kakana se nai vava, ka kakua ni valusi gauna ena veikidavaki e gaunisala. ⁵ Dou vosa vakalougatatakia na vivale yadua dou curu kinia, ka tukunia mada eliu, me yaco na vacegu kina vale koya. ⁶ Ia kevaka sa tiko kinia na tamata sa yaga me vacegui ena toka lia vi koya na nomudrau vivacegui, ia kevaka sa yali ena voki vi ikidou. ⁷ Ia na vale dou sa tiko kinia, dou kania ka gunuvia na veika era sa solia, ni sa doudou me soli vua na tamata dau cakacaka na kenai sau. Dou kakua ni vitokiyaki ki na vivale. ⁸ Ia ena koro kece dou sa curu kinia, a ra sa vacegui ikodou, dou vayagatakia na ka sa tu e matamudou. ⁹ Ka vabulai ira na tauvimate era tiko kinia, ka tukunia vi ira sa voleka na matanitu ni Kalou. ¹⁰ Ia kevaka era sa yali ni vacegui ikodou ena vi koro dou sa curumia, dou qai kina kena visala va koya, ¹¹ A kuvu ni soso ni nomudou vikoro sa kabitia na yavai kimamu, kimamu na quarakia voki vi ikodou. Dou nanumia sa voleka mai na matanitu ni Kalou. ¹² Au sa tukunia vi ikodou ena ca valailai ko Sotoma ena siga ni lewa ena ca valevu na koro koya. ¹³ Ena ca vi iko Koresini, ena ca vi iko Peciseita, ia kevaka sa caka mai Taia vata ki Saitoni na cakacaka mana ka caka vi kodrau, ke rau sa vivutuni makawa, ka daramakia nai sulu taga ka boro dravusa. ¹⁴ Ia ena ca valailai ko Taia vata ki Saitoni ena vilewai, koi kodrau, drau na ca valevu. ¹⁵ Ko iko voki lia Kapenanumi, ko sa laveti cake i lomalagi? ko na dai sobu ki etesi. ¹⁶ Ko koya sa rogoci ikodou, sa rogoci au, ia, ko koya sa beci ikodou, sa beci au, ia ko koya sa beci au, sa beci koya sa talai au mai. ¹⁷ Era sa lesu voki mai na lewe vitusagavulu ena marau, ka tukunia, Ikonu na Turaga, era sa druka vi kimamu na tevoro ena vuku ni yacamuni. ¹⁸ A sa tukunia vi ira ko Jisu, au sa raici Setani, ni sa lutu sobu mai lomalagi me vaka na livaliva. ¹⁹ Au sa solia vi ikodou na kaukauwa mo dou rawa voki lia na kaukauwa vi ira na meca, ia na yali sara ni dua na ka me vacacani ikodou. ²⁰ Ia dou kakua ni rekitakia na ka gona ni sa guca vi ikodou na yalo, ko ya gona na ka mo dou rekitakia ni sa volai mai lomalagi na yacamudou. ²¹ Ena siga ko ya, sa reki sara kinia ko Jisu ena yalona, ka tukunia, Au sa vavinavinaka vi ikonu na Tamaqu, na Turaga ni lomalagi kei vuravura, baletia ni ko sa vunitakia na veika gona vi ira na vuku, kei na yalo matua, ikonu sa vakatakila lia vi ira na gone lailai va gona. Io, Tamaqu, ni sa vinaka ena matamuni. ²² "Sa solia mai au ko Tamaqu na ka kece lia, sa yali ni dua voki e kila na luvena, ka vavo lia o Tamaqu, ka sa yali ni dua e kilai Tamana ka vavo na luvena ka vatakilai koya na luvena vi ira sa digitakia." ²³ A sa vuki vi ira na tisaipeli, ka tukunia lo, "Sa kalougata na mata sa raicia na veika dou sa raicia. ²⁴ Au sa tukunia vi ikodou, e levu na parofita kei ira na tui era sa via raicia na veika dou sa raicia, ia era se yali ni raicia, me rogocia voki lia na veika dou sa rogocia, a ra se yali ni rogocia." ²⁵ Raicia, e dua na vu-ni-vunau, sa tucake ka via vatovolei koya, ka tukunia, "Vavuvuli, a cava na ka meu caka meu rawatia kinia na bula yali ni mudu. ²⁶ Sa tukunia vua ko Jisu, "Na cava sa volai ena vunau? Ko sa wilikia vacava?" ²⁷ Ka sa saumia ka tukunia, "Mo lomani Jiova na nomuni Kalou ena lomamu taucoko, kei na yalomu taucoko, ki na nomu kaukauwa taucoko, kei na nomu nanumia kece lia; kei na kai nomu me vataki iko ²⁸ A sa tukunia vua ko Jisu, Ko sa vosa vadodonu; caka ko ya, ko na bula kinia. ²⁹ Ia ko koya sa dau vadonui koya, sa tukunia vi Jisu, "O cei na kai noqu?" ³⁰ Sa qai saumia vua ko Jisu ka tukunia, Sa dua na tamata sa qai sobu mai Jerusalemi ki Jeriko. Ena loma ni nona i qaiqai, era sikabotei koya eso na dau butako. Ka ra sa luvatia na nona i sulu, ka vamavoatakia, ka qai tani, a ra dainia ka sa voleka sara ni mate. ³¹ A sa qai sobu loa lia mai ena sala ko ya e dua na bete; ka raicia, sa qai vatikitiki tani. ³² Sa vavoki lia e dua na Livai, ni sa yacovia na tikinia gona, ka raicia na tamata, a sa qai sara ena yasana kadua. ³³ Ia sa dua na kai Samaria, ni sa qai voli mai ena yasa ni gaunisala ka davo tu kinia na tamata ko ya. Ena gauna sa raici koya kinia, sa tubu na nona loloma. ³⁴ Sa qai vavoleka vua ka vesukia ka dainia eso na waiwai kei na waini ena nona mavoa, ka vavodovodokia ki na nona asa, ka yadi koya ki na bure ni vulagi, ka ra sa qaravi koya. ³⁵ Ena savulaci sa tauria e rua na tiki ni siliva ka soli vua nai taukei ni bure, ka tukunia, 'Mo qaravi koya, ka'u na saumia vi iko na veika ko sa vayagatakia vua na tamata koya.' ³⁶ Ko cei vi iratou na lewe tolu ko ya sa kai nona o koya ka sikabotea na daubutako?" ³⁷ Sa tukunia ko koya, " ko koya sa lomani koya." Sa tukunia vua ko Jisu, "Qai ka caka voki vakinia." ³⁸ Ena gauna era sa qai jiko kinia, sa curu ko koya ki na dua na koro volekati Jerusalemi. A sa sureti koya e dua na marama, ka yacana ko Marica me qai mai kinia nona vale. ³⁹ A sa jiko vata ki koya na tacina yalewa ka gone, ko Meri na yacana, ka sa tiko voki ena yava i Jisu, ka rogocia na nona vosa. ⁴⁰ Ia ko Marica sa lomaocaocatakia ena nona varautakia na kakana. Sa qai vi Jisu ka tukunia, " Turaga, ikonu sa yali kauwaitakia ni sa daini au na taciqu meu varautakia na ka kece? Kerekere mo tukunia vi koya me mai vukei au mada!" ⁴¹ Ia sa saumia na Turaga ka tukunia vua, "Maca, Maca, ko sa lomaocaoca ena vuku ni cava. ⁴² Ia sa dua loa lia na ka e yaga. A sa digitakia ko Meri nai votavota vinaka, o koya ena yali ni yadi tani mai vua."