Me da kakua ni varokorokotaki ira na tamata vutuniyau ka beci ira era sa dravudravua, 1-13. Sa yali ni yaga me da vararavi ki na noda vabauta, kevaka eda sa yali ni valavala vinaka, 14-26.
1
Oi ikodou na wekaqu, dou kakua ni tauria vata na digitaki ira na tamata, ki na vabauti Jisu Karisito, na noda Turaga sa varokorokotaki.
2
Ia kevaka sa curu ki na nomudou vale-ni-lotu e dua na tamata sa vamama koula, ka vaisulu e nai sulu vaiukuuku, a sa curu voki lia kinia na tamata dravudravua, e nai sulu ca;
3
ia dou sa varokorokotaki koya sa vaisulu e nai sulu vaiukuuku, ka tukunia vua, Mo tiko e na yasana vinaka koya; ia dou sa tukunia vua na tamata dravudravua, Mo mani tu yani ki kea, se mai tiko e ruku ni tutu-ni-yavaqu:
4
dou sa qai yali li ni ia na vidigidigi, ka sa yaco kinia mo dou daulewa e na vasama ca?
5
Dou rogocia, oi ikodou na wekaqu lomani, Sa yali beka ni digitaki ira na Kalou era sa dravudravua e na ka vavuravura me ra vutuniyau e na vabauta me ra taukenia voki lia na matanitu sa yalataka ko koya vi ira era sa lomani koya?
6
Ia dou sa beca na tamata dravudravua.
7
Era sa yali beka ni vasaurarataki ikodou ko ira na vutuniyau, ka yarataki ikodou ki na vale ni vilewai? Era sa yali beka ni vosavacatakia na yaca varokoroko dou sa vatokai kinia?
8
Kevaka dou na muria sara na vunau vaturaga me vaka nai Vola Tabu, Mo lomania na kai nomu me vataki iko, dou na qai caka vinaka:
9
ia kevaka dou sa digitaki ira na tamata, dou sa qai valavala ca, ka sa bitakia vi ikodou na vunau nai valavala ca.
10
Ia ko koya ena muria na vunau taucoko, ka sa cala lia e na tikina e dua loa lia, sa bitaki me vaka sa talaidredre ki na vunau kece lia.
11
Ni sai koya lia sa tukunia, Kakua ni dauyalewa, sa tukunia voki lia, Kakua ni laba. Ia kevaka ko sa yali ni dauyalewa, ia ko sa laba lia, ko sa qai talaidredre ki na vunau.
12
Dou vosa vakakina, kai valavala vakakina, me vakataki ira era na lewai me vaka na vunau ni veisereki.
13
13Ni na lewai ka sega ni lomani, ko koya sa sega ni ia na loloma; ia na dauloloma sa rawa na veilewai.
14
Ena yaga vacava, oi ikodou na wekaqu, kevaka sa tukunia e dua ni sa tu vua na vabauta, kevaka sa yali vua na cakacaka? ena vabulai koya beka na vabauta?
15
Ia kevaka sa dua na viwekani se yalewa se tagane sa yali na nonai sulu, ka yali na kena ena visiga,
16
a ka dua vi ikodou sa tukunia vi ira, Dou qai e na vacegu, dou tatalai ka vamamautaki; ia dou sa yali ni solia na veika e yaga ki na yagodra; a cava na betena?
17
Sa vaka voki lia kinia na vabauta kevaka sa yali ni tu vata ki na cakacaka, sa mate lia, ni sa tu dualoa lia.
18
Ia ena tukunia beka e dua, Sa tu lia vi iko na vabautia, sa tu lia vi au na cakacaka; mo vatakila mai vi au na nomu vabauta ni sa yali lia na nomu cakacaka, ia ka'u na vatakila vi iko na noqu vabautia e na noqu cakacaka.
19
O sa vabautia beka ni sa dua na Kalou; o sa caka vinaka: ia ko ira voki lia na tevoro era sa vabautia, a ra sa sautaninini voki lia.
20
O sa via kila beka, o iko na tamata sesewa, ni sa mate lia na vabautia ni sa yali na cakacaka:
21
e yali beka ni vadonui ko Eparaama na tamada e na vuku ni cakacaka, ni sa vacaboria na luvena ko Aisake e dela ni cabocabo-ni-soro?
22
O sa raicia beka ni sa vivuke na vabauta ki na nona cakacaka, a sa taucoko sara mai na vabautia e na vuku ni cakacaka?
23
A sa vayacori kinia nai Vola Tabu o koya sa tukunia, Sa vabautia na Kalou ko Eparaama, a sa wili vua mei valavala dodonu; a sa vatokai me Weka ni Kalou.
24
Ia dou sa qai raicia ni sa vadonui na tamata e na vuku ni cakacaka, a sa yali lia e na vuku ni vabautia dua loa lia.
25
Sa vaka voki lia kinia ko Reapi na yalewa ka dautagane, sa yali li ni vadonui e na vuku ni cakacaka, ni sa vacegui rau nai talaki, ka vatala yani e na sala tani?
26
Me vaka sa mate na yago ni sa takali na yalo, sa mate vakina na vabautia ni sa takali na cakacaka.