6 ¹ Ia ena gauna gona, ni sa vuqa na kedrai wiliwili e ra sa lotu, era a kudruvakia ko ira lia vulagi ni veimatanitu tani vei ira na Iperiu, ni ra sa yali ni nanumia na nodra yada ena votai ni yau ena veisiga. ² Sa qai vakasoqoni ira vata lia na lewe vuqa sa lotu ko ira na le tinikarua, ka tukunia, "Sa yali ni dodonu me keitou dainia na vosa ni Kalou ka qaravia na tepeli. ³ O koya, koi kodou na veiwekani, mo dou qai qara lia vei kodou e lewe vitu na tamata sa dina, sinai ena Yalo Tabu kei na vuku, me keitou lesi iratou ki na cakacaka koya. ⁴ Ia koi keitou, keitou na gumatuatakia na masu kei na vunautakia na vosa. ⁵ Era marautakia na lewe vuqa na vosa koya ka ra digitaki Sitveni lia e dua na tamata sa sinai ena vakabauta kei na Yalo Tabu, Pirokoro, kei Nikanori, kei Taimoni, kei Parimina, kei Filipi, kei Nikola, a tamata lotu vaka-Jiu mai Anitioki: ⁶ A ra sa yadi kecelia koya e matadratou na apositolo: ia ni ra sa masu oti, era sa tabaki iratou lia e na ligadra. ⁷ A sa gumatuatakia na vosa ni Kalou; a sa vakalevutakia sara na kedrai wiliwili era sa lotu mai Jerusalemi; a sa lewe vuqa voki lia na bete era sa talairawarawa lia ki na vakabauta. ⁸ Ia ko Sitiveni, vakasinaiti tu ena vakabauta kei na kaukauwa a sa vakayacora tiko lia eso na ka e veivakurabuitaki kei na cakacaka-mana levu ena kedra maliwa na tamata. ⁹ Ia sa tucake e so mai na nodra vale ni lotu a yacadra Ko ira na Sereki, kei na kai Alekisadria eso, kei ira eso mai Silisia, kei Esia, a ra sa veiletitakia na ka a tukunia ko Sitiveni. ¹⁰ A ra sa yali ni ciqomia rawa na vuku kei na Yalo sa vosa kinia ko koya. ¹¹ E ra a qai vaqumi ira voki e so na tamata me ra tukunia "Keitou sa rogoci koya koya ni sa vosavakacacataki Mosese kei na Kalou" ¹² A ra sa vakauqeti ira na tamata, kei ira na qase, kei ira na vu-ni-vola, a ra sa tauri Sitiveni vakaukauwa ka yadi koya kina mataveilewai, ¹³ a ra sa kacivi ira mai na dau veibeitaki vakailasu, ka ratou tukunia, "Sa yali ni mudu na tamata koya ni vosavakacacatakia na tikina tabu koya kei na vunau. ¹⁴ Ni keitou a rogocia ni sa tukunia Ena vakarusa na tikina koya ko Jisu na kai Nasareci, ka na vukicia sara nai valavala sa soli vei ita ko Mosese. ¹⁵ Ko ira kecelia sa tiko ena vale ni veilewai, ni ra sa vakaraicia matua, era sa raicia na matana ni sa tautauvata kei na mata ni agilose.