20 ¹ Ia ni sa yali na ue, sa kacivi ira era sa lotu ko Paula, a sa tatau, ka qai tani yani me qai ki Masitonia. ² Ia ni sa qaivia oti na yasana ko ya ko koya, ka vakavulici ira vakalevu, sa qai qai ki Kirisi. ³ A sa tiko mada kinia ka vula tolu. Ia ni ra sa buki kena vere ko ira na Jiu, ni sa vakarau soko ki Siria, sa qai nakitia ko koya me gaivi Masitonia ena nona lesu voki. ⁴ A ratou sa qai vata kaya ki Esia ko Sopatero na kai Peria; kei Arisitako kei Sekudu, koi rau na kai Cesalonaika; kei Keio na kai Tapi, kei Timoci; kei Tikiko kei Tirofimo ko ira na kai Esia. ⁵ O iratou koya eratou sa qai eliu ka waraki keitou mai Tiroa. ⁶ Ia ni sa oti mada na gauna ni kana madrai tawa leveni , keitou sa qai soko tani ki Filipai, ka bogi lima keitou sa qai vauci ira mai Tiroa, keitou sa tiko mada kinia ka bogi vitu. ⁷ Ia enai matai ni siga ni wiki, ni sa soqoni vata ko ira sa lotu me ra dovi madrai, sa vunau vei ira ko Paula, ni sa vakarau qai ena savulaci, a sa vunau tiko ka lomaloma ni bogi na vanua. ⁸ A sa vuqa na cina enai taba loma ni vale e cake, kimamu sa soqoni vata kinia. ⁹ A sa dua na cauravou na yacana ko Utiko, sa tiko voleka ki na darava icolo, a sa moce lutu sara; ia ni sa vunau vakadede ko Paula, sa biti koya na moce, a sa lutu sobu mai nai ka tolu ni taba loma ni vale, ia ni sa laveti cake sa mate tu. ¹⁰ A sa qai sobu ko Paula, a sa davo ki delana ka mokota, ka tukunia "Dou kakua ni kidroatakia ni sa tiko vua na yalona." ¹¹ Ia ni sa qai cake ko koya, ka dovi madrai, ka kana, a ra sa veivosaki vakadede, ka kida na savulaci, sa qai qai tani ko koya. ¹² A ra sa yadia mai na cauravou ni sa bula, a ra sa vakacegui vakalevu. ¹³ Ia keitou sa liu yani ka vodokia na waqa, ka soko ki Aso, ni keitou sa nanumia me vakavodoki Paula kinia, sa vakakoya na nona lewa, ni sa via taubale ko koya. ¹⁴ Ia ni keitou sa sota kaya mai Aso, keitou sa vakavodokia ka yaco ki Mtilini. ¹⁵ Ia keitou sa soko tani yani eke, ka yaco me donui Kio ena siga sa taravia, ka bogi dua keitou sa yaco kinia ki Samo; ka bogi dua voki, keitou sa yaco ki Milito. ¹⁶ Ni sa lewa oti ko Paula me soko baleti Efeso, me yali ni tiko vakadede mai Esia, ni sa vakariri, kevaka e rawa vua me tiko mada mai Jeruisalemi ka qai yaco na siga ni Penitiko. ¹⁷ A sa talaki mai Milito ki Efeso me qaivi ira na nodra qa nai soqosoqo lewe ni lotu. ¹⁸ Ia ni ra sa yaco vua, sa tukunia vei ira ko koya: "Dou sa kila na noqui valavala ena veisiga vokilia ka'u tko kinia kei kodou, sa vakatekivu enai mata ni siga ka'u a qai mai kinia ki Esia; ¹⁹ niu a qaravia na Turaga ena yalo e malumalumu sara, ka levu na wai ni mataqu, kei na dauvere sa yaco vei au ni ra sa buki qau vere ko ira na Jiu: ²⁰ ni ka'u a yali ni rerevakia me'u kua kinia ni kau vakavulici kodou, ni dou sa soqoni vata, ena veivale vokilia, ²¹ ni'u a vakarotakia tiko vei ira na Jiu, vei ira vokilia na veimatanitu tani, na veivutuni vua na Kalou, kei na vakabautia na noda Turaga ko Jisu Karisito. ^{22 23 24} Ka raicia au sa qai ki Jeruisalemi ka ni sa uqeti au na yaloqu, ka'u sa yali ni kila se cava ena yaco kinia vei au; koya lia ni sa vakatakilatakia vei au na Yalo Tabu ena veikoro kecelia, ka tukunia sa waraki au nai vesu kei na rarawa. Ia ni ka'u sa yali sara ni nanumia na noqu bula me ka talei vei au ka me'u vakaotia lia na noqu cakacaka kei nai tavi sa solia mai vei au na Turaga ko Jisu, me'u vakatakila nai tukutuku-vinaka ni loloma ni Kalou. ²⁵ Ka raicia, au sa kila dou na yali ni raicia voki na mataqau, ko kodou kecelia au a qai voli ena kodou maliwa, ka vunautakia na matanitu. ²⁶ O koya lia ka'u sa vakadinadinatakia kinia vei kodou ena siga koya, ni'u sa yali ni cala ena vukuna e dua sa na cudruvi: ²⁷ ni'u sa yali ni rerevakia ni tukunia vei kodou na loma ni Kalou taucoko. ²⁸ O koya lia mo dou vakaraici kodou kei ira vokilia na qele ni sipi, sa lesi kodou kinia na Yalo Tabu mo dou nodrai vakatawa, mo dou vakania nai soqosoqo. ²⁹ Ni'u sa kila koya, ni'u sa qai tani eke ena qai cudru mai vei kodou eso na wolifa ca sara; era na yali ni lomani ira na qele ni sipi. ³⁰ E na tubu cake vokilia e so na tamata veikodou, era na vosatakia na ka e veivakacalai, me mari ira kinia era sa lotu me ra muri ira. ³¹ O koya mo dou qai vakatawa, ka nanumia ni sa tolu na yabaki ka'u a yali ni mudu kinia ni vunauci kodou kecelia ena savulaci kei na bogi, ka vakawai tiko na mataqu. ³² Oi kodou na veiwekani, au sa qai tataunaki kodou vua na Kalou, kei na vosa ni nona loloma o koya sa rawatia me vakatataki kodou ka soli vei kodou mo dou i votavota vata kei ira vokilia sa vakasavasavataki. ³³ Au sa yali ni kocovia na siliva se na koula, se nai sulu ni tamata e dua. ³⁴ Dou sa kila vokilia, ni sa daucakacaka na ligaqu koya me so na ka e yaga vei au vei iratou vokilia eratou sa tiko. ³⁵ Ena ka vokilia au sa vakatakilatakia veikodou, ni sa kilikili mo dou dau cakacaka vakakoya mo dou vukei ira sa malumalumu, mo dou nanumia vokilia na vosa ni Turaga ko Jisu ni sa tukunia ko koya, A ka ni veivakalougatataki vakalevu me soli ka, ka vakalailai lia me tauria na ka." ³⁶ Ia ni sa vosa oti vakakoya ko koya sa tekiduru, ka masu vata kei ira vakaadua: ³⁷ a ra sa tagi sara kecelia, ka mokoti Paula, ka reguci koya. ³⁸ a sa rarawa vakalevu na lomadra ena vuku ni vosa ka tukunia ko koya, ni ra sa na yali ni raici koya voki. A ra sa talatala vua ki waqa.