2 ¹ Ia ni sa yaco na siga ni Penitiko, era sa tiko lomata ko ira kece lia ena dua na tikina. ² Sa qai vakasauri mai lomalagi e dua na rorogo, e vaka lia na cagi vakacevaruru kaukauwa, a sa vakasinaita na vale taucoko era a tiko kinia. ³ A sa rairai ve iira na ka e vakalia na veiyameyame ni buka waqa sa dui veisebayaki, a sa tiko yadua vei ira vakaaduaga. ⁴ A ra sa vakasinaiti kece lia ena Yalo Tabu, a ra sa vakatekivu me vosatakia na vosa tani eso, me vaka lia sa solia vei ira na Yalo Tabu me ra cavutia. ⁵ E ra a tiko mai Jerusalemi e so na kai Jutia, ra tamata lotu mai na veivanua kece lia e rukui lomalagi. ⁶ Ia ni sa rogovaki yani na ka koya, a ra sa soqoni vata na lewe vuqa, a ra sa kurabui lia ni ra sa dui rogoci ira na tamata yadua ni ra sa vosatakia na nona vosa. ⁷ A ra sa kidacalatakia kece lia ka kurabui, ka kaya vakai ira, Raicia, era sa yali beka li ni kai Kalili ko ira kece lia koya era sa vosa? ⁸ ia ka vakaevei koya ni da sa rogocia koi kede kece lia ena noda vosa eda sucu kaya? ⁹ (ko ira na kai Paricia, kei Mitia, kei Ilama, kei ira sa tiko mai Mesopotemia, kei Jutia kei Kapatosia, mai Ponito, kei Esia, ¹⁰ mai Firijia kei Pamifilia, mai Ijipita kei na yasayasa vaka-Lipea e voleka ki Kirini kei ira na vulagi mai Roma, ko ira na kai Jutia, kei ira sa vuki ki na lotu vaka Jiu, ¹¹ ko ira na kai Kiriti kei Arepea) e da sa rogoci ira ni ra sa tukunia ena noda vosa na nona cakacaka e veivakurabuitaki na Kalou. ¹² A ra kurabui kece lia, ka taqaya, ka sa veikayaka vakai ira, A cava nai balebale ni ka koya? ¹³ A sa vakalialia ko ira eso tani, ka kaya, Era sa mateni lia ena waini vou. ¹⁴ Sa qai tucake lia ko Pita, kei ira na le tinikadua, ka sa tabalakia i colo na domona, ka tukunia ve ira, Oi kodou na kai Jutia, kei kodou kece lia sa tiko e Jerusalemi, mo do kila na ka koya ka rogocia na noqu vosa: ¹⁵ ni ra yali ni mateni o ira koya me vaka n ka dou sa nanumia, ni se qai kenai katolu lia ni aua. ¹⁶ Ia ni sai koya lia koya sa tukuna na parofita ko Joeli: ¹⁷ 'Sa tukunia na Kalou, ena yaco ena gauna mai muri kau na sovarakia na Yaloqu kivei ira na tamata kece lia: A ra na parofisai kinia ko ira na nomudou gone yalewa, Ia, ena raicia na raivotu eso ko ira na nomudou qase: ¹⁸ Io, vei ira voki lia na noqu tamata kei na noqu vada kau na sovarakia na yaloqu ena gauna ko ya, a ra na parofisai kinia: ¹⁹ Ia kau na vakatakila lia na ka e vei vakidacalataki eso mai lomalagi e colo, kei nai vakatakilakila e so e vuravura era; A dra, kei na buka waqa, kei na kubou; ²⁰ Ena vuki lia na matanisiga me butobuto, kei na vula me dra, Ena qai yaco lia e muri na siga i Jiova, sa levu ka rogo tiko: ²¹ Ia ena yaco, o koya yadua lia ena masuta na yaca i Jiova, ena bula. ²² Oi kodou na tamata na Isireli, rogocia na vosa koya; ko Jisu na kai Nasareci, a tamata sa vakadinadinatakia vei kodou ni Kalou ena cakacaka-mana, kei na ka e veivakurabuitaki eso, kei na vakatakilakila lia eso, sa solia na Kalou kivei koya me cakava ena kodou maliwa, me vaka dou sa kila: ²³ o koya ni sa soli oti yani vei kodou, ve vaka ka nakita dina lia na Kalou ka lewa e liu, dou sa tauria ka vakotia ki na kauveilatai ka vakamatea ena ligadra na tamata ca; ²⁴ o koya lia sa vatura i colo na Kalou ni sa serekia nai vau ni mate: ni sa yali ni rawa me vauci tiko lia kinia o koya. ²⁵ Ni sa vosataki koya lia ko Tevita, ka tukunia, 'Au sa raici Jiova tiko lia ni sa tu e mataqu Ni sa tu o koya ena ligaqu i matau, me'u yali kinia ni yavavala; ²⁶ o koya lia sa reki kinia na yaloqu, a sa marau kinia na yamequ; Ena Vakacegu voki lia na lewequ enai nuinui ²⁷ Ni konu na yali ni dainia na yaloqu mai etesi, Se dainia na nomu Le dua yalosavasava me vuca mai: ²⁸ Ko ni sa vakatakila lia mai vei au na sala ni bula; ko ni na vakasinaiti au ena marau mai na matamunu. ²⁹ Oi kodou na veiwekani, dou vosotia me'u doudou lia niu sa tukuni Tevita na qase vei kodou, ni sa mate lia o koya ka bulu, ka sa tu lia vei keda na nona i bulubulu ka yacovia na siga koya. ³⁰ Ia ni sa parofita lia o koya, a sa kila ni sa bubului vua na Kalou, ni na tubu mai vua ko kira ena vakatubura mai kinia ko koya na Karisito, me vaka na lewena, me tiko lia ena nonai tikotiko vakaturaga. ³¹ Ia ni sa kila e liu, sa tukunia na nona tucake voki mai na mate na Karisito, ni na yali ni dai tu mai etesi, se na vuca mai na lewena. ³² Ko Jisu koya, sa vakatura i colo na Kalou, ka sai vakadinadina ni ka koya koi keitou kece lia. ³³ Ia ni sa yadi colo ena liga i matau ni Kalou, rawatia o koya mai vei Tamana na Yalo Tabu ka yalataki, sa qai sovarakia mai na ka koya, dou sa qai raicia ka rogocia. ³⁴ Ni sa yali ni yadi ki lomalagi ko Tevita; ia sa kaya o koya, Sa kaya lia ko Jiova vua na noqu Turaga, Mo tiko ena ligaqu i matau, ³⁵ Me'u vakamalumalumu taki ira mada na nomu meca mei tutu lia ni yavamunu. ³⁶ O koya koya me kila sara kinia na mataqali taucoko nei Isireli, ko Jisu Koya, o koya dou a vakota kina kauveilatai, sa lesia lia na Kalou me Turaga ka Karisito voki lia. ³⁷ Ia ni ra sa rogocia, sa laucoka na yalodra, a ra sa kaya vei Pita kei ira nai apositolo sa vo, Oi kodou na veiwekani, a cava me kimamu kitaka? ³⁸ Sa qai tukunia vei ira ko Pita, ''Dou veivutuni ka papitaisotaki, koi kodou yadua, ena yaca i Jisu Karisito me bokoci kinia na nomudou i valavala ca, ka dou rawatia na Yalo Tabu mei solisoli.' ³⁹ Ni na caka vei kodou na vosa ni yalayala, vei ira voki lia na nomudou gone, kei ira vakayadua lia era sa vakayawa io, vei ira yadua lia ena kacivi ira vua na Turaga na noda Kalou. ⁴⁰ Ia sa vuqa voki li na vosa sa tukunia o koya ka vakarota, ka tukunia, Dou vakabulai kodou mai nai tabatamata takelo koya. ⁴¹ Ia ko ira lia sa vakabauta na nona vosa, era sa papitaisotaki: ka sa kenai kuri vei ira sa lotu ena siga ko ya e lewe tolu beka na udolu na tamata. ⁴² A ra sa qaravia matua na nodrai vakavuvuli nai apositolo kei na veilomani, kei na dovi madrai kei na masumasu. ⁴³ A sa kani ira kece lia na rere; a sa levu na ka e veivakurabuitaki kei nai vakatakilakila era sa kitaka ko ira nai apositolo. ⁴⁴ Ia ko ira kecelia sa vakabautia era sa tiko vata, a ra sa dui solia na nonai yau yadua ve ra taukena vata; ⁴⁵ a ra sa volitakia na nodra vanua kei na nodrai yau, a ra sa vota kivei ira kece lia me vaka lia na nodra dui dravudravua. ⁴⁶ A ra sa gumatua sara lia ena qai kina vale ni soro e na veisiga, a ra sa lomavata, a ra sa dovi madrai ena vei vale, a ra sa kania na kedra ena marau kei na yalo dina, ⁴⁷ ni ra sa vakavinavinakatakia tiko vua na Kalou, a sa vinakati ira ko ira na tamata vakayadua lia. Ia na Turaga sa vakaikuritakia kivei ira nai soqosoqo lewe ni lotu, ena veisiga, na tamata era sa vakabulai tiko.