18 ¹ Sa oti na veika koya, sa qai tani e Aceni ko Paula, ka yaco ki Korinica; ² a sa kunea kinia e dua na kai Jiutia a yacana ko Akuila, sa sucu mai Ponito, a sa qai walega mai Itali, kei na watina ko Pirisila; ni sa vakarotakia ko Kilotiu me qai tani e Roma na kai Jutia kecelia; a sa qai vei rau ko koya. ³ Ka ni ratou sa matai vata, sa tiko vata kei rau ko koya, ka cakacaka: ni ratou sa matai ni vale-laca. ⁴ A sa vunau e na vale ni lotu ena veisiga ni vakacecegu kecelia, a sa rawai ira na kai Jutia kei ira na kai Kirisi. ⁵ Ia ni sa qai mai Masitonia ko Sailasa kei Timoci, sa vakauqeti ko Paula, a sa dua tukunia vei ira na kai Jutia ni sa Karisito lia ko Jisu. ⁶ Ni ra sa qai vorata ka vosa vakacaca sa kureitakia na nonai sulu kokoya ka tukunia vei ira, "Ena baleti kodou lia na nomudou rusa; au sa yali ni cala kinia: kau sa qai qai vei ira na veimatanitu tani." ⁷ A sa qai tani eke, ka curu ki na nona vale e dua a yacana ko Taito Jusitu, a tamata sa lotu tiku vua na Kalou, a sa voleka ki na vale ni lotu na nona vale. ⁸ A sa vakabautia na Turaga ko Kirisipo, na turaga ni vale ni lotu, kei ira vokilia na nona lewe ni vale; a sa lewe vuqa na kai Koronica ni ra sa rogocia, e ra sa vakabautia, ka ra sa papitaisotaki. ⁹ Sa qai tukunia vei Paula na Turaga ena bogi ena raivotu, kakua ni rere, mo tukunia lia, kakua ni ko galu; ¹⁰ ni kau sa tiko vata kei iko, ka na yali e dua me sagai iko me vakacacani iko: ni sa lewe vuqa na noqu tamata ena koro koya. ¹¹ A sa tiko mai kea ko koya ka yabaki dua ka vula ono, ka dau vakavulici ira ena vosa ni Kalou. ¹² Ia ni sa turaga mai Akaia ko Kalio, era sa lomavata na Jiu me ra tauri Paula vakaukauwa, a ra sa yadia ki na mata ni tikotiko ni veilewai, ¹³ ka tukunia, ko koya koya sa vakavulici ira na tamata me ra masu vakatani vua na Kalou ka yali ni vaka na vunau. ¹⁴ Ia ni sa vakarau vosa ko Paula, sa tukuia vei ira na Jiu ko Kalio, "Oi kodou na Jiu, kevaka sa dua na ka e kovei, se dua na ca levu, e dodonu me'u vosoti kemudou: ¹⁵ ia kevaka e veiletitaki nai vakavuvuli, kei na yaca eso, kei na nomudou vunau, dou lewa lia; ni ka'u sa yali ni via lewa na veika vakakoya." ¹⁶ A sa vakasevi ira tani ena mata ni tikotiko ni veilewai. ¹⁷ A ra sa qai tauri Sosiceni na turaga ni vale ni lotu, ka vaculakia ena mata ni tikotiko ni veilewai. A sa weletakia na ka kecelia koya ko Kalio. ¹⁸ Sa oti oqori sa tikolia ko Paula ka dede, a sa qai tatau vei ira na veiwekani, ka soko ki Siria, ko iratou vokilia ko Pirisila, kei Akuila; a sa tasia mada na uluna mai Kenikiria ni sa bubului eliu ko koya. ¹⁹ A sa yaco ki Epeso ka daini rau kinia: a sa curu ko koya ki na vale ni lotu, ka vakavulici ira na Jiu. ²⁰ Ia ni ra sa masuta me tiko dede vei ira, sa yali ni vinakatia ko koya; ²¹ ia sa tatau lia vei ira ka tukunia, Au na lesu voki mai vei kodou, kevaka e vinakatia na Kalou, a sa soko tani e Efeso ko koya. ²² Ia ni sa sobu ki Sisaria, ka qai cake, ka veikidavaki kei ira nai soqosoqo lewe ni lotu, sa qai qai sobu ki Anitioki. ²³ Ia ni sa tiko dede vakalailai, sa qai qai tani, a sa qaivia vakadodonu voli ena vanua ko Kalatia kei Firijia, a sa vakataudeitaki ira vokilia era sa lotu. ²⁴ A sa dua na Jiu na yacana ko Apolosa, sa sucu mai Alekisadria, a tamata sa dauvosa vakavuku, a sa rawatia sara me tukunia nai Vola Tabu ko koya, sa tadu ki Efeso. ²⁵ Sa vakavulici ko koya koya enai vakavuvuli ni Turaga, ia sa katakata na yalona, a sa tukunia ko koya ka vunautakia vagumatua na veika ni Turaga, ia sa kila lia na papitaisoi Joni. ²⁶ A sa vakatekivu me vosa doudou ena vale ni lotu: ia ni rau sa rogocia ko Akuila kei Pirisila, erau sa yadia vei rau, a rau sa tukunia vakadodonu cake vei koya nai vakavuvuli ni Kalou.