13 ¹ A sa tiko vei ira nai soqosoqo lewe ni lotu mai Anitioki e so na parofita kei nai vakavuvuli: ko iratou ko Panapasa, kei Simioni, na yacana vokilia ko Nikeri, kei Lusiu na kai Kirini, kei Manaini, o koya erau sa susugi vata kei Eroti na turaga, kei Saula. ² Ia ni ratou sa cakacaka vua na Turaga, ka lolo tiko, sa tukunia na Yalo Tabu, "Lesi rau mai vei au ko Panapasa kei Saula ki na cakacaka ka'u sa kacivi rau kinia." ³ Ni sa oti lia na nodratou lolo, masu kei na veitabaki ena ligadratou, a ratou sa vakatalai rau yani. ⁴ Ia koi rau koya ni sa vakatalai rau na Yalo Tabu, erau sa qai ki Selusia; mai kea, a rau sa soko sara lia ki Saipurusi. ⁵ Ia ni rau sa tiko mai Salamisa, erau sa vunautakia na vosa ni Kalou e na nodra veivale ni lotu na Jiu; ka vukei rau kinia ko Joni. ⁶ Ia ni ratou sa qaivia taucoko na loma ni yanuyanu ka yaco ki Pafo, eratou sa qai kunea e dua na dauvakadraunikau, a parofita vakailasu ka kai Jutia, a yacana ko Pari-Jisu: ⁷ Na dauvakadraunikau koya e veimaliwai kei na turaga ni vanua, ko Serikiu Paula, a tamata yalomatua: o koya sa kacivi Panapasa kei Saula, ni sa via rogocia na vosa ni Kalou. ⁸ A sa tarovia ko Elima na dauvakadraunikau, (koya nai balebale ni yacana), ka saqati rau, ka vakatovolea me saumakia tani na turaga me kakua ni vakabautia. ⁹ Ia ko Saula, o koya voki lia sa kacivi ko Paula, ni sa sinai e na Yalo Tabu, sa vakaraici koya matua, ¹⁰ ka sa tukunia "Ko iko ka sinai e na dauveivakaisini kece kei na ca kecelia, a luve ni tevoro, a meca ni ka kecelia e dodonu, ena yali beka ni oti na nomu vukicia nai naki dodonu ni Turaga? ¹¹ ia koya, raicia, sa bikai iko na cudru ni Turaga, ko na mataboko kinia, mo yali ni raicia rawa na mata-ni-siga e na dua na gauna koya." A sa lutu vakasauri lia vei koya na kabukabu kei na butobuto; a sa vakayayamotakia voli ni qara eso me ra tubera. ¹² Ni sa raicia na turaga na ka sa caka sa vakabautia, ni sa kurabuitakia nai vakavuvuli ni Turaga. ¹³ Ia ko Paula kei iratou sa qai vata kaya, eratou sa soko mai Pafo ki Perika mai Pamifilia; a sa daini rau ko Joni, ka lesu voki ki Jerusalemi. Ko Paula kei na nonai tokani, ¹⁴ erau sa qai mai Perika ki Anitioki mai Pisitia, e ra sa curu ki na vale ni lotu e na siga ni vakacecegu, ka tiko sobu. ¹⁵ Ia ni sa wilikia oti nai vola ni vunau kei ira na parofita, sa qai talaki vei rau ko ira na turaga ni vale ni lotu, ka tukunia, "Oi kodrau na veiwekani, kevaka e tu vei kodrau e dua na vosa ni vakavuvuli vei ira na tamata, drau vosatakia lia mai." ¹⁶ Oi kemunu na Isireli, kei kemunu sa rerevakia na Kalou, ni rogocia koya. ¹⁷ A nodra Kalou na tamata koya, io na nodra na Isireli, sa ra digitakia oti na noda qase, a sa vakalevui ira na tamata, ni ra sa tiko vulagi mai na vanua ko Ijipita, a sa yadi ira maikinia ena ligana kaukauwa. ¹⁸ Ia ni sa vosotia ko koya na nodrai valavala e na veikau ka yabaki vasagavulu; ¹⁹ ka sa vakawabokotakia na matanitu e vitu e na vanua ko Kenani: sa qai solia vei ira na nodra vanua me ra taukena. Na veika kece koya a yaco tiko ena va na drau limasagavulu vakacaca na yabaki. ²⁰ Sa oti koya, sa qai lesia eso na turaga ni lewa me yacovia na gauna i Samuela na parofita. ²¹ Sa oti koya, era sa qai gadrevia me dua na nodra tui; a sa soli Saula vei ira na Kalou, ko koya sa luve i Kisi, a tamata e na yavusa i Penijamini, ka yabaki vasagavulu na nona tui. ²² Ia ni sa yadi koya tani, sa qai vakatuburi Tevita me nodra tui; a sa tukunia na ka koya na Kalou me baleti Tevita, "Au sa kunei Tevita na luve i Jese, a tamata sa muria na lomaqu o koya ena caka kecelia na ka au gadrevia." ²³ Mai na nona kawa, me vaka lia na vosa ni yalayala, sa vakatubura na Kalou vei ira na Isireli nai Vakabula, ko Jisu: ²⁴ Ni se bera na yaco mai ko Jisu, sa liutakia mai ko Joni na nona vunautakia na papitaiso ni veivutuni kivei ira kecelia na Isireli. ²⁵ Ia ni sa vakaotia tiko na nona cakacaka ko Joni, sa tukunia, "Kemunu sa nanumia se ko cei koi au? au sa yali ni ko koya: ka raicia, e dua sa muri au mai, a nonai vava mada lia au yali ni dodonu me'u serekia." ²⁶ Oi kemunu na veiwekani, na kawa i Eparaama, kei ira kecelia vei kemunu sa rerevakia na Kalou, sa talai vei ita na vosa bula koya. ²⁷ Ko ira era sa tiko mai Jerusalemi, kei na nodra turaga, ni ra sa yali ni kilai koya, se na nodra vosa na parofita, sa wili e na veisiga ni vakacecegu, era sa vakayacora lia ni ra sa lewai koya me mate. ²⁸ Ka sa dina era sa yali ni kunea e dua na ka sa dodonu me mate kinia, ia era sa masuti Pailato lia me vakamatei ko koya. ²⁹ Ia ni ra sa vakayacora oti na ka kecelia sa volai e na vukuna, era sa kevutakia sobu mai na kau, ka bulutia ena dua nai bulubulu. ³⁰ A sa vakaturi koya cake voki mai na mate na Kalou; ³¹ ka vuqa sara na bogi sa rairai kinia o koya vei ira era a qai vata kaya mai Kalili ki Jerusalemi, a ra sa i vakadinadina ko ira gona vei ira na tamata. ³² Ia keirau sa tukunia vei kemunu nai tukutuku vinaka ni yalayala ka caka vei ira na qase, ³³ ni sa vakayacora na Kalou vei ita na luvedra, ni sa vakatuburi Jisu cake voki ko koya; me vaka na ka sa volai enai karua ni Same, 'Ko iko na Luvequ, au sa vakatuburi iko e na siga koya.' ³⁴ Ia e na vuku ni sa vakaturi koya cake mai na mate, me kakua ni vuca voki, sa tukunia vakakoya o koya, 'Au na solia vei kodou na veika sa yalatakia dina vei Tevita.' ³⁵ Ka sa tukunia vokilia kinia ko koya e na dua na voki Same, O na yali ni laiva na nomu Le dua sa yalosavasava me vuca mai. ³⁶ Ia ko ko Tevita, ni sa qaravia oti na nonai tabatamata me vaka lia na lewa ni Kalou, sa qai moce, a sa bulutia vata kei ira na nona qase, a sa vuca mai: ³⁷ ia ko koya sa vakatura cake voki na Kalou, sa yali ni vuca. ⁴⁰ O koya koya mo ni qai raici kemunu vinaka, de yaco vei kemunu na ka vosa kinia ko ira na parofita: ⁴¹ Raicia, koi kodou sa daubeca, ia mo dou kidacala, ka rusa: Ni'u sa kitakia e dua na cakacaka e na nomudou gauna, A cakacaka dou na yali sara ni vakadinatakia, kevaka sa dua e tukunia vei kemunu. ⁴² Ni rau sa dainia mai na vanua gona ko Paula kei Panapasa, era sa qai kerea me rau la'ki vunautakia voki vei ira na veika koya ena siga ni vakacecegu ka taravia. ⁴³ Ni ra sa dui suka ko ira nai vavakoso, a ra sa lewe vuqa vei ira na Jiu kei na tamata sa lotu vaka-Jiu, era sa muri Paula kei Panapasa: a rau sa vosa vei ira, ka vakadretakia vei ira, me ra tauria tudei na loloma ni Kalou. ⁴⁴ Ena siga ni vakacecegu ka taravia, e a voleka ni ko ira kece sara lia na lewe ni koro era soqoni vata me ra rogocia na vosa ni Kalou. ⁴⁵ Ia ni ra sa raicia ko ira na Jiu ni ra sa lewe vuqa, era sa vuvu vakalevu, ka ra vakalasuya na veika sa tukunia ko Paula, ka vosa vakacacatakia: ⁴⁶ A rau sa qai douvakia ko Paula kei Panapasa na vosa, ka tukunia, E dodonu lia me vunautaki eliu vei kemudou na vosa Kalou: ia ni dou sa dainia tani vei kodou, ka lewai kodou ni sa yali ni ganiti kodou na bula tawa mudu, raicia, keirau sa qai vei ira na kai matanitu tani: ⁴⁷ ni sa vakarota vakakinia vei keitou na Turaga, "Au sa vakaturi iko mo nodra rarama na veimatanitu, Mo yaco mo vu ni bula ki nai yalayala kei vuravura. ⁴⁸ Ia ni ra sa rogocia ko ira na kai matanitu tani, era sa reki, ka ra vakarokorokotakia na vosa ni Turaga: ia era sa vakabautia ko ira kecelia era sa vakarautaki tu ki na bula tawa mudu. ⁴⁹ A sa tete na vosa ni Turaga ki na veiyasana kecelia oqori. ⁵⁰ Ia ko ira na Jiu era sa vakayavalati ira lia na yalewa lotu, kei ira na marama, kei ira na turaga ni koro ka vakatubura lia na veivakacacani vei rau ko Paula kei Panapasa, ka vakasavi rau tani mai na nodra vanua. ⁵¹ A rau sa kuretakia lia vei ira na soso mai na yavadrau, a rau sa qai sara ki Ikoniona. ⁵² Ia ko ira sa lotu era sa vakasinaiti ena marau kei na Yalo Tabu.