10 ¹ Sa dua na tamata mai Sisaria ko Konilio na yacana, a nodra turaga na mata sotia sa vakayacani vaka-Itali, ² a tamata daulotu, a sa rerevakia na Kalou, ko koya, kei ira kecelia na nona lewe ni vale, a sa dausolia vakalevu na ka-ni-loloma vei ira lia na tamata, a sa daumasu vua na Kalou e na veisiga. ³ Sa raicia o koya ena raivotu, enai kaciwa ni aua, e dua na agilose ni Kalou ni sa curu vua, a sa tukunia vua, "I Konilio," ⁴ Ia ni sa vakaraicia, sa rerevakia, ka tukunia, "Sa vakaevei noqu Turaga?" A sa tukunia vua o koya, "A nomu masu kei na nomu ka-ni-loloma lia sa qai cake ki na mata ni Kalou mo nanumi kinia: ⁵ ia mo tala na tamata eso ki Jopa, me yadi Saimoni mai, a yacana vokilia ko Pita: ⁶ sa tiko vata o koya kei Saimoni na matai ni kuli-ni-manumanu, ka tiko e baravi na nona vale: ena tukunia vei iko o koya na ka e dodonu mo caka" ⁷ Ia ni sa lesu voki na agilose ka vosa vei Konilio, sa qai kacivia e lewe rua na nona lewe ni vale, ka dua na sotia sa daulotu, e dua vei ira sa dauqaravi koya: ⁸ ia ni sa tukunia vei iratou na ka kecelia, sa qai talai iratou ki Jopa. ⁹ Ia ena vulaci lia ni siga tarava, ena i ka ono ni aua, ni ratou sa qai tiko e na gau-ni-sala, ka toro voleka ki na koro, sa cabe cake ki dela ni vale ko Pita me masu e nai ka ono ni aua; ¹⁰ a sa viakana sara, ka garovia na ka me kania: ia ni ra sa vakarautakia tiko, sa raicia na raivotu, ¹¹ sa raicia na lomagi ni sa tawase rua, a sa dua na ka sa qai sobu mai vua, sa vaka nai tutuvi levu sa buki na tutuna vava, a sa tukucitaki sobu mai ki vuravura; ¹² a sa tiko kinia na manumanu ni vanua e yavai va e dui nodra vei mataqali kecelia, kei na manumanu kila, kei na veika lia sa dauqasi voli kei na manumanu vuka. ¹³ Sa qai rogocia e dua sa vosa vua ka tukunia "Tu cake Pita; mo vakamatea, ka kania," ¹⁴ A sa tukunia ko Pita, "Me'u kua noqu Turaga; ni'u a yali ni kania na ka sa tabu se tawa-savasava." ¹⁵ A sa vakaruatakia voki vua na vosa, "A ka sa vakasavasavatakia na Kalou, mo kakua ni vakatatabutakia." ¹⁶ E a yaco vakatolu na ka koya: a sa qai yadi voki na ka ki lomalagi. ¹⁷ Ia ni se taqayatakia tiko lia o Pita se cava nai balebale ni raivotu, raicia, sa tarogia na vale i Saimoni ko iratou na tamata sa tala ko Konilio, a ratou sa tu e na matamata-ni-koro; ¹⁸ a ratou sa kacivia, ka tarogia, se sa tiko gona se yali ko Saimoni, a yacana voki lia ko Pita. ¹⁹ Ia ni se vakananumia tiko lia na raivotu ko Pita, sa tukunia vei koya na Yalo Tabu, "Raicia, e lewe tolu na tamata sa vakasaqarai iko. ²⁰ Mo tu cake kinia ka qai sobu, ia mo qai vata kei iratou, ka kakua ni veiletitakia na qai vata kei iratou, baletia ni'u sa talai iratou mai." ²¹ Sa qai qai sobu ko Pita vei iratou na tamata; ka sa tukunia, "raicia, koi au lia koya dou sa vakasaqara: a cava na vu ni nomudou qai mai?" ²² A sa tukunia, "Sa dua na agilose yalosavasava sa vakatakilatakia vei Konilio, e dua na turaga ni valu, a tamata yalododonu, ka sa rerevakia na Kalou, a sa rogorogo vinaka vei ira kecelia na kai Jutia, me qaivi iko, mo mai qai ki nona vale, me rogocia vei iko na vosa o koya. ²³ Sa qai kacivi iratou mai o koya ka vakacegui ratou. Ia ena vulaci ka taravia, sa qai qai vata kei iratou ko Pita, kei so voki lia veiwekani mai Jopa. ²⁴ Ia, ena siga lia ka taravia, eratou sa curu ki Sisaria. A sa warakia tiko na nodratou yaco yani ko Konilio, a sa vakasoqoni ira vata na wekana kei ira na nonai tokani voleka. ²⁵ Ia ni sa curu yani ko Pita, sa tavakia mai ko Konilio, a sa cuva sobu ki yavana, ka vakarokorokotakia. ²⁶ A sa vakaturi koya cake ko Pita, ka tukunia, "Tu cake; au tamata voki lia koi au." ²⁷ Ia ni rau sa vei vosaki tiko, ka curu yani e loma, ka raicia ni ra lewe vuqa era soqoni tiko kinia. ²⁸ A sa tukunia vei ira o koya, "Dou sa kila ni sa ka tabu vua na kai Jutia me veimaliwai, se me sikova na tamata sa lewe matanitu tani; ia sa vakatakilatakia vei au na Kalou me'u kakua ni vakatoka e dua na tamata me tabu se tawa savasava. ²⁹ O koya lia koya ka'u sa qai mai kinia ka yali ni veiletitakia, ni'u sa qaivi yani; au sa tarogia kinia se cava dou sa qaivi au yani kinia?" ³⁰ A sa tukunia ko Konilio, " Sa oti koya e va na siga ena gauna vata lia koya, Au a masu tiko kinia ena noqu vale enai ka ciwa ni aua, ka raicia e dua na tamata, tu cake tiko e mataqu ka serau na nonai sulu. ³¹ A sa tukunia, Konilia, sa rogocia na nomunu masu na Kalou kei na nomunu ka-ni-loloma voki lia sa nanumia na Kalou. ³² O koya lia koya mo tala e dua ki Jopa me qaivi Saimoni mai, a yacana voki lia ko Pita; sa tiko o koya ena vale nei Saimoni na matai ni kuli-ni-manumanu mai baravi: ia ni sa qai mai o koya, ena vosa vei iko. ³³ O koya lia koya ka'u talatala yani kinia vei kemunu, ia nu sa yalovinaka, ka nu sa qai mai. Keimamu sa qai tiko kecelia koya e na mata ni Kalou, me keimamu rogocia na ka kecelia sa vakarotakia vei kemunu na Kalou." ³⁴ Sa qai vosa ko Pita, ka tukunia, "E dina, ka'u sa qai kila ni sa yali ni digitakia vakailoa na tamata na Kalou: ³⁵ ia ena veivanua kecelia, o koya lia sa rerevakia ka caka dodonu, sa vinaka vua na Kalou." ³⁶ Ai vakavuvuli sa tukunia o koya vei ira na luvei Isireli, ni sa vunautakia na veivinakati e na vuku i Jisu Karisito: (o koya lia sa Turaga vei ira kecelia): ³⁷ ai vakavuvuli ko ya, dou sa kila, sa vunautakia mai Jutia taucoko, a sa tekivu mai Kalili, ni sa oti na papitaiso ka vunautakia ko Joni; ³⁸ ni sa lumuti Jisu na kai Nasareci na Kalou e na Yalo Tabu kei na kaukauwa: o koya sa qai voli ka daucaka vinaka, a sa vakabulai ira kecelia sa vakasaurarataki ira na tevoro; ni sa tiko vata kaya na Kalou. ³⁹ Ia keitou sa yaco mei vakadinadina lia e na ka kecelia sa caka o koya ena nodra vanua na kai Jutia, mai Jerusalemi voki lia; o koya era sa vakamatea ni ra sa vakarubecia e na dua na kau: ⁴⁰ ka vakaturi koya cake na Kalou e nai katolu ni siga, a sa vakatakilai koya votu; ⁴¹ e yali vei ira na tamata kecelia, vei ira lia ka digitakia taumada na Kalou, me ra dautukunia, io vei keitou, koi keitou a kana ka somi ni sa tucake voki mai na mate o koya. ⁴² A sa vakarota vei keitou me keitou vunautakia vei ira na tamata, ka vakadinadinatakia ni sai koya lia ka lesia taumada na Kalou me lewai ira na bula kei ira voki lia na mate. ⁴³ O koya era sa dautukunia ko ira kecelia na parofita, ni na bokoci na nodrai valavala ca na tamata kecelia era sa vakabautia na yacana. ⁴⁴ Ni se tukunia tiko lia na vosa koya ko Pita, sa lutu na Yalo Tabu kivei ira kece lia era sa rogocia na vosa. ⁴⁵ Ko ira sa cili ka tamata vakabauta, o ira na qai vata mai kei Pita, era sa kurbauitakia, ni sa sovaraki na Yalo Tabu ka vaka voki lia vei ira sa lewe ni matanitu tani. ^{46 47} Ni ratou sa rogocia ni ra sa vosatakia na vosa ni veivanua tani, ka vakarokorokotaka na Kalou. Sa qai tukunia ko Pita, Sa dua beka na tamata e bureitakia na wai me ra kakua ni papitaisotaki ko ira na tamata koya, ni sa lutu voki lia na Yalo Tabu vei ira me vaka taki ita? ⁴⁸ A sa qai kaya me ra papitaisotaki ena yaca i Jisu Karisito. A ra sa qai masuti koya me tiko vata mada kei ira ena vica voki na siga.