¹ Mo kila voki lia na ka koya, ni na yaco eso na gauna ni vivararawataki e na visiga mai muri: ² ni ra na daulomani ira wale lia na tamata, era na dauvinakatia nai lavo, era na daubole, era na viavialevu, era na dauvosavacaca, era na talaidredre kivi ira na nodra matua, era na yali ni vavinavinaka, era na yali ni yalosavasava, ³ era na caca viwekani, era na dauyalayala ka lasu voki, era na dauvibeitaki vailasu, era na yali ni daurawa na yalodra, era na daucudrucudru, era na daucati ira na tamata vinaka, ⁴ era na dauvisoliyaki me mate, era na qaqa sodrosodro, era na yalolevu, era na lomania valevu na marau a ra na lomani koya na Kalou valailai; ⁵ sa nodra lia na lotu varairai, ka yali vi ira na kena dina: ia mo qai tani maivi ira era sa vaka ko ya. ⁶ Ni sa vakinia ko ira era sa curu vailawaki ki na vivale eso, a ra sa daurawai ira na yalewa sesewa sa bini tu vi ira nai valavala ca, era sa yadi vatani e na gagadre ca e levu, ⁷ era sa dauvatavulicia tiko, ka yali ni rawatia me ra kila na ka dina. ⁸ Ia sa vakataki Jani kei Jabiri ko ira koya ni rau sa qati Mosese, era sa qatia vakinia na ka dina: a tamata lomaqeleqelewa, a sa yali ni vinakati na nodra vabautia. ⁹ Ia era na yali ni tubu cake me levu: ena vavotui vi ira kece lia na tamata na nodra sesewa, me vaka na nodrau ko ya. ¹⁰ Ia ko iko, ko sa daumuria na noqu i vavuvuli, na noqu i valavala, na noqu i naki, na noqu vabautia, na noqu vosotia vadede, na noqu loloma, na noqu vosotia na ca, ¹¹ na vivacacani, na vivararawataki; na ka sa yaco vi au mai Anitioki, mai Ikoniona, mai Lisitira; na kena levu ni vivacacani kau a vosotia; ia ka sa vabulai au na Turaga mai na ka kece lia ko ya, ¹² Io, ko ira kece lia era na via lotu dina vi Karisito Jisu, era na vacacatakia. ¹³ Ia ko ira na tamata ca ki ira na dauvitemaki, era na tubu cake me ra ca sara, ni ra sa ia na dauvivacalai, ka ra sa vacalai voki lia ko ira. ¹⁴ Ia ko iko, mo tu dei e na ka ko a vatavulici kinia, a ka sa vadinadinatakia vi iko, ni ko sa kila se ko cei sa vatavulici iko; ¹⁵ ni ko sa kila nai Vola tabu, ni ko a gone, ko ya sa vavukui iko rawa mo bula ni ko sa vabauti Karisito Jisu. ¹⁶ Sai koya na Kalou sa vavunia nai Vola Tabu kece lia, a sa yaga ko ya mei vavuvuli, me vunaucia na ca, me caka kinia na vadodonutaki, me ia kinia na vatavuvuli e na ka e dodonu: ¹⁷ me yaco kinia na tamata ni Kalou me varau tu, ni sa varautakia ki nai valavala vinaka kece lia.