1 ¹ Mai vei Saimoni Pita, na dauveiqaravi kei na i apositolo i Jisu Karisito. Kivei ira sa vakaivotavota vata kei kitou ena vabauta uasivi sa taukeni rawa ena vuku ni yalododonu ni noda Kalou ka noda i vabula ko Jisu Karisito: ² Me nomuni na lolomasavu kei na vacegu ena nomuni sa kila na Kalou kei Jisu na noda Turaga. ³ Sa solia vei ita na Kalou ena nona kaukauwa na veika kece sara eda gadrevia me baletia na noda bula kei na i tovo vakalou ena vuku ni noda kilai koya sa kacivi ita me da vakaivotavota ena nona lagilagi kei na nona vinaka. ⁴ Ena ka koya sa solia kinia o koya vei ita na i solisoli talei eso sa yalatakia me rawa kinia vei ikonu mo ni dro tani rawa mai na veigagadre ca sa dauveivarusai era sa tu oqo e vuravura, ka mo ni vakaivotavota ena i tovo ni Kalou. ⁵ Ena vuku ni veika koya, ni gumatua sara kinia mo ni vakaikuritaka na nomuni vabautia ena i valavala vinaka, kei na nomuni i valavala vinaka ena kila-ka, ⁶ na kila-ka ena i valavala malua; kei na i valavala malua ena dauvosotia, kei na dauvosotia ena i tovo vakalou, ⁷ kei na i tovo vakalou ena veilomani vaveitacini, kei na veilomani vaveitacini ena loloma. ⁸ Koya na i valavala eso o ni gadrevia, ia kevaka sa tu valevu sara vei ikonu na veika koya, era na vukei ikonu mo ni tamata gugumatua ka vuavuai ena nomuni kila na noda Turaga ko Jisu Karisito. ⁹ Ni o ira vayadua sa yali vei ira na i valavala vakoya sa lekaleka lia na nodra rai ka mataboko, ka guilecavia ni ra sa vasavasavataki oti mai na nodra i valavala ca eliu. ¹⁰ O koya koya oi ikonu na wekaqu, ni gumatua sara kinia ka vataudeitaka na veikacivi kei na veidigitaki ni Kalou ena nomuni bula; ni kevaka o ni vayacoria na veika koya, o ni na yali sara ni tarabe ka bale. ¹¹ Mai na sala koya ena soli kinia vei ikonu na dodonu taucoko sara mo ni curu kinia ki na matanitu yali ni mudu ni noda Turaga ka i Vabula ko Jisu Karisito. ¹² O koya koya ka'u na vananumia ikonu tiko lia kinia ena veika koya, ka veitalia lia kevaka o ni sa kilai ira vinaka tiko ka sa vataudeitaki ena i vavuvuli dina sa tu vei ikonu. ¹³ Au nanumia ni sa dodonu lia me'u vauqeti ikonu tiko mo ni dau nanumia na veika koya ni'u se bula tiko, ¹⁴ ni'u sa kila ni sa voleka mai na gauna me'u luvatia tani kinia na yago qele koya me vaka sa varaitakia vamatata vei au na noda Turaga ko Jisu Karisito. ¹⁵ Ia ka'u na tovolea ena noqu i gu taucoko me'u varautakia e dua na sala mo ni dau nanumia tiko lia kinia na veika koya ni'u sa mate. ¹⁶ Kitou sa yali ni vararavi ki na i talanoa buli eso ena nitou varaitakia vei ikonu na veika me baletia na qai mai ni noda Turaga ko Jisu Karisito ena nona kaukauwa, ia kitou a vadinadinatakia ena mata i kitou na nona lagilagi. ¹⁷ Kitou a tiko ena vanua gona ena gauna sa vacerecerei ka valagilagi koya kinia na Kalou na Tamana, ni sa rogo kinia vua e dua na domo mai na i Serau Lagilagi, ka vaka, “Koya na Luvequ e dua loa lia, o koya ka'u sa dau vinakatia valevu!” ¹⁸ Kitou a tiko vata kei Jisu ena ulunivanua tabu ka rogocia na domo koya ni voqa sobu mai lomalagi. ¹⁹ Ena veika koya, kitou sa vabautia valevu cake sara kinia na nodra i tukutuku na parofita. O koya koya mo ni wanonovia vinaka sara kinia na nodra i tukutuku, me vaka na nomuni wanonovia toka e dua na cina sa caudre tiko ena dua na vanua butobuto. Ia mo ni wanonovai tiko lia me yacovia na gauna sa kida cake kinia na rarama ni mataka vou ka cabe mai na kalokalo i volasiga ena yalomuni. ²⁰ Ia na ka bibi mo ni kila koya: ni sa yali ni dua na tamata ena rawa ni vamacalatakia lia vakai koya na parofisai era tu ena i Vola Tabu. ²¹ Ni sa yali ni vu na parofisai ena lewa vatamata, ia era sa tukunia lia na nona i tukutuku na Kalou o ira na tamata era sa tiko ena ruku ni veiliutaki ni Yalo Tabu.