Kivei koya na Marama lomani kei ira na luvena, o ira ka'u sa lomania vakaidina. Ia sa yali lia ni oi au taudua, o ira kece voki lia era sa kila na dina,
2 baletia ni sa tiko lia vei taa na dina, io ena tiko liga vei ita ka yali ni mudu.3 Me qai solia vei ita na Kalou o Tamada kei na Luvena o Jisu Karisito na loloma-savu, na yalololoma kei na vakacegu; ka me sa noda ga na veika ko ya ena dina kei na loloma. 4 Au sa reki vakalevu dina e noqu raicia ni ra sa muria tiko na dina eso vei ira na luvemu, me vaka sa vakaroti ita kinia na Tamada. 5 E na ka koya ka'u sa kerei ikonu kinia vaka ko ya, na Marama lomani: me da ia lia na veilomani. Au sa yali ni vola yani ko ya vei konu e dua na i vakaro vou; ia na kena lia eda sa taukenia mai na i vakatekivu. 6 Na loloma au sa tukunia tiko ko ya sai koya me da muria na i vakaro ni Kalou. Na i vakaro, me vaka o ni a sa rogocia mai na i vakatekivu, o ya mo ni bula veilomani tiko lia. 7 Sa lewe levu na dauveivakacalai era sa lako voli e vuravura, ko ya o ira na tamata era sa yali ni vakadinatia ni sa lako mai o Jisu Karisito ena yago vakatamata. O ira na tamata vaka ko ya era sa dauveivakacalai, ni ra sa meca i Karisito. 8 Ni qarauni kemuni vinaka, mo ni kakua kinia ni vakayalia na veika eda cakacakatakia oti, ia mo ni na tauria lia na kena i sau taucoko sara. 9 O koya vakayadua sa yali ni vakadeitaki koya ena i vakavuvuli i Karisito, ia sa qai sivita lia, sa yali ni tiko vua na Kalou. O koya lia sa muria dei tiko na i vakavuvuli i Karisito, sa tiko vua na Tamana kei na Luvena voki lia. 10 Ena ka ko ya, ni kevaka sa lako yani vei konu e dua na tamata ka yali ni vakatavuvulitakia na i vakavuvuli ko ya, ni kakua ni ciqomi koya se vakacurumi koya ki na nomuni vale. 11 Ni o koya lia sa ciqomi koya sa wasea vata voki lia kei koya na nona cakacaka ca. 12 Sa levu sara na ka me'u tukunia vei kemuni, ia au sa liali ga ni via vola kece yani, baletia ni'u sa nuitakia lia me'u na la'ki sikovi konu yani ka me da veivosaki sara lia ena matana votu, me noda kece sara kina na reki.
13 Sa loloma yani vei iko o ira na luvena na marama tacimuni lomani.