1 ¹ Koi au ko Paula, nai apositolo i Jisu Karisito, e nai lesilesi ni Kalou na nodai Vabula, ko Jisu Karisito, na vu ni nodai nuinui; ² vi Timoci, na luvequ dina e na vabautia: Me sa nomu na loloma, na yalololoma, na vacegu, mai vua na Kalou ko Tamada, kei na noda Turaga ko Karisito Jisu. ³ Ena gauna au sa qai kinia ki Masitonia, au vauqeti mo tiko lia e Efeso me rawa ni ko varotia eso na tamata me ra kakua ni vavulicia eso nai vavuvuli tani, ⁴ ka yali ni sala vata ki kena edatou vatavuvulitakia. ka yali ni ra vayagatakia na nodtra gauna ki na nodra i vola ni kawa ka yali ni mudu. Ia na veika ko ya sa rawa ni vavunia na visei vataki ira ia ka yali ni vukei ira me ra kila na nona i tuvatuva ni vivabulai na Kalou, ka yavutakia ena vabautia ⁵ Ia ko ya, nai naki levu ni ka kitou ka varotia vi iko mo vatavuvulitakia me da lomania na Kalou ena vuni yaloda savasava, ki na vatulewa vinaka e loma, ki na vabauta yali ni vailasu; ⁶ ka so na tamata sa cegu na nodra caka na ka vinaka, ka goleva na ka sa yali ni yaga. ⁷ A ra vinakatia me ra vu-ni-vunau, ia, ka ra sa yali ni kila rawa nai naki ni vunau. ⁸ Ia eda sa kila ni sa vinaka nai vunau, kevaka eda muria vavinaka tamata na i varau. ⁹ Eda sa kila kece ni yali ni caka na vunau me baleti ira na tamata yalo dodonu, ia ka sa vunacia na tamata sa yali ni muria nai vunau ka idautalaidredre vakinia, vi ira voki lia era sa yali ni lotu kei ira sa dau ia nai valavala ca, kei ira sa yali ni yalosavasava ka ra sa vakasisila lia; vei ira sa labatia na tamadra, a ra sa labatia na tinadra, ka ra sa daulaba. ¹⁰ Ia na vunau sa beitaki ira na tamata sa daudara, ko ira era sa vimoceri vatagane, ko ira sa daubutakocia na tamata me ra bobula, ko ira sa daulasu, ko ira sa daububului vailasu ki na ka tani kece lia sa yali ni vaka nai vavuvuli vinaka: ¹¹ Nai varo ko ya sa salavata kei na i tukutuku vinaka ni nona vivakalougataki na Kalou, ka'u sa lesi iko kinia mo vunautakia. ¹² Au sa vavinavinaka vi Karisito Jisu na noda Turaga o koya sa vakaukauwataki au, o koya sa nanumia na noqu vabautia, ka au ki na cakacaka vaitalatala; ¹³ Ko i au e liu sa dauvosavacaca, ki na dauvacaca, kei na dauvivasewasewani; ¹⁴ ia ka'u sa lomani, ni'u a caka gauna ni lialia kei na yali ni vabautia. Ia ka sa uasivi sara na loloma ni noda Turaga, ka vabauti Karisito Jisu kinia. ¹⁵ Ia nai tukutuku ko ya sa yaga ka dina me vabauti, ni qai mai ko Jisu Karisito ki na vuravura ko ya me vabulai ira na tamata i valavala ca. ¹⁶ Ia ena vuku lia ni ka ko ya, au sa lomania kinia, ka varaitakia ko Jisu Karisito vi au ka uasivi cake ena vosotia valevu sara, meu i varau vi ira era na vabauti koya emuri me ra bula yali ni mudu kinia. ¹⁷ ia, vua na Tui yali ni tubu, sa yali ni mate rawa, sa yali ni rairai, na Kalou vuku dua loa lia, me ia na varokoroko ki na vidokadokai ka yali ni mudu. Emeni. ¹⁸ Ai varo ko ya, au sa solia vi iko, na luvequ Timoci, me vaka na parofisai ka tukuni kinia e liu me baleti iko, mo ia kinia na vivala vinaka. ¹⁹ Tauria matua na vabauta ki na lewa-eloma vinaka. Eso era sa yali ni via varorogo ki na nodra lewa-eloma ka sa vacacani kinia na nodra vabautia. ²⁰ E rau vaka koya ko Imeneo kei Alekisada, koi rau ka'u a totogitakia ena noqu soli rau vi Setani; me rau na vulicia kinia me rau mudukia na nodrau vosavacacatakia na Kalou.