1 ¹ Koya sa tu mai nai vakatekivu, o koya kitou a rogocia, o koya kitou a raicia e na mata i kitou, o koya kitou a vakaraicia sara, ia ka tara na liga i kitou, e na vuku ni Vosa ni bula; ² (ka sa vakaraitakia na vu-ni-bula, ka kitou a raicia, ka dautukunia, ka vakatakila vei kodou na vu-ni-bula yali mudu, o koya ka tiko vata kei Tamana, ka sa qai vakaraitakia mai vei kita;) ³ o koya kitou a raicia ka rogocia, kitou sa tukunia vei koou, mo dou veiwekani kinia kei kitou; ia kitou sa veiwekani kinia kei na Tamada, kei na Luvena ko Jisu Karisito. ⁴ Ia kitou sa vola na veika ko ya vei kodou, me vakayacori sara kinia na nomudou marau. ⁵ Ia ko ya nai tukutuku kitou a rogocia maivei koya, a sa tukuna vei kodou, ni sa rarama na Kalou, a sa yali sara vei koya na butobuto. ⁶ Kevaka eda sa kaya eda sa veiwekani kaya, a sa ia nai valavala butobuto, eda sa lasu lia, ka sa yali ni caka na dina: ⁷ ia kevaka eda sa ia nai valavala ni rarama, me vaka sa tu e na rarama ko koya, eda sa qai dui veiwekani vata, a sa vakasavasavataki ita mai na ca kece lia na dra i Jisu Karisito na Luvena. ⁸ Kevaka eda sa kaya sa yali ni tu vei ita na ca, eda sa vakaisini ita, a sa yali ni tu vei ita na dina. ⁹ Kevaka eda sa vakatusa na nodai valavala ca, sa yalodina ka yalododonu ko koya me bokocia na nodai valavala ca, ka vakasavasavataki ita mai na ka kece lia sa yali ni dodonu. ¹⁰ Kevaka eda sa kaya eda a yali ni valavala ca, eda sa vakalasui koya, a sa yali ni tu vei ita na nona vosa.