2
1
Ia koi au, niu sa qai yani vi ikodou, na vi wekani, au sa yali ni qai e na vosa vinaka se na vuku, niu sa vunautakia vi ikodou na vosa sa tukuni kinia na Kalou.
2
Ni sa dei na yaloqu meu kakua ni kila e na ikodou maliwa e dua na ka tani, ko Jisu Karisito lia, ki na nona lauvako kina kauveilatai.
3
Ia kau a tiko vata ki ikodou e na malumalumu, kei na rere, kei na sautaninini levu.
4
Ia na noqu vosa, niu sa vunau, sa yali ni ia e na vosa va vitemaki ni vuku va tamata, sa ia lia e na kena va dinadinataki ni Yalo Tabu, kei na kaukauwa-mana:
5
me kakua kinia ni tu na nomudou vabautia e na nodra vuku na tamata, e na kaukauwa lia ni Kalou.
6
Ia kitou sa tukunia na vuku e na kedra maliwa era sa yalomatua sara: a sa yali lia na vuku ni vuravura koya, se na nodra vuku na turaga ni vuravura koya, o koya sa yaco me ka loa lia:
7
ia na vuku lia ni Kalou kitou sa tukunia e na ka vuni, io, gona ka vunitaki eliu, ka lesia na Kalou ni sa bera ni caka ko vuravura me da vakalougatataki kinia;
8
ia ka sa yali e dua na turaga ni vuravura koya sa kila: ia kevaka era sa kila, era sa yali ni vakotia i na kauveilatai na Turaga va iukuuku.
9
Ia sa vaka nai vola, Sa yali na mata sa raicia, se na daliga sa rogocia, Ka sa yali ni curu i na loma ni tamata, Na veika sa varautakia na Kalou me nodra era sa lomani koya.
10
Ia vi ita lia sa vatakila mai na Kalou e na Yalo Tabu; ni sa raicia na ka kece lia na Yalo Tabu, io, na veika titobu ni Kalou.
11
Io, o cei na tamata sa kila na ka ni tamata, a yalo ni tamata lia sa tiko e lomana? sa vaka voki lia kinia na vika ni Kalou sa yali e dua sa kila, sa kila lia na Yalo ni Kalou.
12
Ia eda sa yali ni rawatia na yalo ni vuravura, na Yalo lia sa mai vua na Kalou; me da kila kinia na veika sa solia loa lia mai vi ita na Kalou.
13
A veika koya kitou sa tukunia voki lia, ia ka sa yali lia e na vosa sa va vulicia na vuku ni tamata, o koya lia sa vavulicia na Yalo Tabu; ni kitou sa vatautauvatatakia na veika vayalo kei na veika vayalo.
14
Ia na tamata sa vayago sa yali ni vabautia na veika ni Yalo ni Kalou: ni sa ka lialia vua, a sa yali ni kila rawa o koya, ni ra sa kilai vayalo lia.
15
Ia o koya sa vayalo sa kila na ka kece lia, a sa yali e dua sa kilai koya.
16
Io, ko cei sa kila na loma ni Turaga, me vavulici koya kinia? Ia sa tu vi ita na lomai Karisito