2 IA kau sa dokai ikodou, na veiwekani, ni dou sa nanumi au e na ka kece lia, ka vabautia nai vavuvuli, me vaka kau a solia vei ikodou. 3 Ia kau sa vinakatia mo dou kila ni sa ulu ni tamata yadua na Karisito; ia na ulu ni yalewa na tagane; kei na ulu i Karisito na Kalou. 4 A tagane yadua, sa masu se parofisai, ni sa ubi na uluna, sa yali ni doka na uluna. 5 Ia na yalewa yadua sa masu se parofisai ni sa yali ni ubi na uluna, sa yali ni doka na uluna: ni sa tautauvata lia ni sa tasi. 6 Ia kevaka sa yali ni ubi na yalewa, me tasi voki lia: ia kevaka sa ka ni veivamaduataki me koti na yalewa se tasi, me qai ubi. 7 Ni sa yali sara ni dodonu vua na tagane me ubia na uluna ni sai yaloyalona kei na kenai ukuuku ni Kalou ko koya: ia na yalewa nai ukuuku ni tagane. 8 Sa yali ni vu mai vua na yalewa na tagane; sa vu mai vua na tagane na yalewa. 9 Ni sa yali ni buli na tagane me nona na yalewa; sa buli lia na yalewa me nona na tagane. 10 O koya ko ya sa dodonu kinia me tu nai ubi e na ulu ni yalewa mei va takilakila ni kena malumalumu, e na vukudra na agilose. 11 Ia sa yali ni tu dua loa lia na tagane ka me tu tani na yalewa, se tu dua loa lia na yalewa me tu tani na tagane e na Turaga. 12 Ni sa vu mai vua na tagane na yalewa, sa vaka voki lia kinia na tagane e na vuku ni yalewa; ia sa vu mai vua na Kalou na ka kece lia. 13 Dou lewa vakai ikodou: sa kilikili kaya na yalewa li me yali ni ubi ni sa masu vua na Kalou? 14 Sa yali ni vavulici ikodou na nodai tovo va tamata, kevaka sa balavu na drau ni uluna na tagane, sa ka ni veivamaduataki vua? 15 ia kevaka sa balavu na drau ni uluna na yalewa, sa nonai ukuuku lia: ni sa soli vua na drau ni uluna me kenai ubi?
16 Ia kevaka sa via dauveileti e dua, sa yali ni nitou i valavala koya, se na nodra na veisoqosoqo lewe ni lotu ni Kalou. 17 Ia niu sa varotia tiko koya, au sa yali ni dokai ikodou, ni dou sa yali ni vinaka cake ni dou sa soqoni vata, ia dou sa ca sobu kinia. 18 Io, na kenai matai, ni dou sa soqoni vata vaisoqosoqo lewe ni lotu, au sa rogocia ni dou sa dauveisei; ia kau sa vadinatia eso: 19 ni sa dredre me yali ni tubu na dauveiba vei ikodou me rairai kinia ko ira vei ikodou era sa vinakati. 20 Ia ni dou sa soqoni vata e na dua na yasana, dou sa yali ni ia dina nai va yakavi ni Turaga. 21 Ia ni dou sa kana, dou sa dui kania yadua eliu na kenai va yakavi: a sa viakana kinia e dua, ka mateni e dua. 22 Oi? sa qai yali beka na nomudou veivale mo dou kana ka somi kinia? se dou va maduataki ira beka sa yali na nodra, ka becia nai soqosoqo lewe ni lotu ni Kalou? A cava meu tukunia vei ikodou? meu dokai ikodou li e na ka koya? Au sa yali ni dokai ikodou. 23 Niu a rogocia mai vua na Turaga na ka kau a tukunia voki lia vei ikodou, Ni sa tara nai buli madrai na Turaga ko Jisu e na bogi sa soli yani kinia ko koya: 24 ia ni sa vavinavinaka oti sa dovia, ka tukunia: koya na yagoqu sa dovi e na vukumudou; caka koya mo dou vananumi au kinia. 25 Sa vaka voki lia kinia na bilo, ni sa kania oti nai vakayakavi ko koya, sa tukunia, Na bilo koya na veiyalayalati vou e na noqu dra; e na gauna kece lia dou sa somia kinia, dou caka koya mo dou vananumi au kinia. 26 Io, e na gauna kecelia dou sa kania kinia na madrai koya, ka somia na bilo koya, dou sa vatakila kinia na nona mate na Turaga, ka yacovia na nona qai mai. 27 Ia ena tarogi kinia e na vuku ni yago ni Turaga kei na nona dra, o koya yadua ena kania na madrai koya, ka somia na bilo ni Turaga, ka yali ni doka. 28 Ia me dikevi koya mada na tamata vakai koya, me qai kania na madrai gona , ka somi e na bilo gona. 29 Ni sa kania ka somia na nona cudruvi ko koya sa kania ka somia ka yali ni doka, ni sa yali ni kila na yago ni Turaga. 30 E na vuku ni ka koya sa lewe levu kinia vei ikodou sa malumalumu ka tauvi-mate, ka lewe levu sa moce. 31 Ia, kevaka eda sa lewai ita, eda na yali ni lewai. 32 Ia ni da sa lewai, sa qai cudruvi ita na Turaga, me da kakua kinia ni lewai me cudruvi vata kei ira era sa vavuravura. 33 O koya koya ikodou na wekaqu, ni dou sa soqoni vata mo dou kana, dou veiwaraki mada. 34 Ia kevaka e dua sa viakana, me kana lia mai vale; mo dou kakua kinia ni soqoni vata mo dou cudruvi. Ia na ka sa vo kau na vadodonutakia niu sa qai yani.