¹ Acaz pe jjainae nüta veitne (20) pa wai beje pakujinae itoroba reinü kuene, itoroba dieciseis (16) pa wai beje Jerusalén jota. ² Apo itsi pejjania kuene Diosonü itajjutua, Pakuenia David piaja monaenümü itsi. ³ Pijinia, ajara ponü peyatujju jjanewaitsi jawa tajuita Ben Hinom ibo korotusatota yajawa pejji pe itajurujawi isotota tajuita, pakuenia itsi tsabiabi pamonae Diosonü jukalia piaja ira jawelia Israel tomara itabü nejewa. ⁴ Ajara ponü to bia y to tajuita pe tujjujjuwi jawanü petsuto, unuanü y kae naejawa piasaünae büjjüpana kanakujitsia. ⁵ Ajara jjua yabara Diosonü, Acaz piaja Dioso, Aram piaja reinü pekobeta tó kanawiata. Aramitawi ameyaba wekua kaliatsi ayai bitsaüto pe taikaewitsi, Damasco jawaberena. Acaz pijinia pekobeta jopa Israel piaja reinü yajawünü werebiabatsi ayai bitsaüto. ⁶ Peka pejjünato Remalías, beyajjuaba Judá jota ciento mil (120 000) pa wajabitsaünü beje kae matakabita, dajjita pamonaeje pepo pe apaajjayonüanü, Tsipaji Diosonü wekua natsata, Piajamonaewimi piaja Dioso. ⁷ Zicri, dajjita kuene jjainaenü Efrain jawata, beyajjuaba Maasías jawabelia pejjünato Azricam reinü, reinü piaja bo jota pe itorobanukaenü, Elcana, pe yawenonaenü reinü jawabelia. ⁸ Israel piaja wajabitsaü taika piaja monae wekua dosciento mil (200 000) pamona pejjainae wanü, pewajji wajji y pewajji nüjji. Pijinia pamonaeje nota piayai kuene penamotamatsi jawa, Samaria jawabereka kanawiaba. ⁹ Diosonü piaja profetanü pewajüna nuka, pewünü Obed. Kopia pitanüka wajabitsaü pe patanajetarubenaewi Samaria jota. Ajaraponü jumaitsi pamonae jawabeliaje: "Diosonü, pa nija monaewimi piaja Dioso, Judá bará anaepanatsi, pakayawenona pane amaneyabi nejja. ¹⁰ Pajjami baitsi jane itajjutejema pa beyejebame pane anaepanae jawa pata atjübiabetsia. Pijinia pajjamü pa najamatabü jjainame pane ejjanae jawa pa nija pianiwi nejja powanüje y pa pebi jiwije Judá y Jerusalén piajiwi. Itsiata, ¿Apo pató nanekonitsimü Diosonü jawabelia pane itsijjae ajarajjuanüje? ¹¹ Bajarajjuata, panejumetaema: Pane kaponaewi rena kae wualia pakanawiabare, pamonae pajjamü pataikame pa nija monae jawerena, tsipaji Diosonü pe anaepanaejawa paka tsijopa." ¹² Nejjata Efrain pia jiwi itsa monae pe itorobinüanü, Azarias pejjünato Johanán, Berquia pejjünato Mesilemot, Ezequias pejjünato Salum, yajawa Amasa, pejjünato Hadlai, najumetane pe jumaitsi nejja pamonae penabe kujinae nawiaba najetarubena. ¹³ Pamonaeje jumaitsi ajara pamonae jawabelia: "Akuenebi pane kaponae jawa berenaje pane taikaewi, tsipaji pajjamü pane najamatabü jjainae jawa tó nanekonitsipatsi Diosonü jawabelia, akuenebi bebeliyo jawa natsimatajjuba ponae jawa pebisia kuene, tsipaji waja nekoni baja ayai kuene bitsó, Israel tomara baja bitsó anaepanaya ejjana." ¹⁴ Nejjata, wajabitsaünüanü pe itorobiwi tomara y dajjita itabü nejewa kopabanuba pe yamaü kaponae wi rena y buata otjopa petó notsi jawanü. ¹⁵ Pa pebijiwi itapetatsi pe wünüanü kanakujitsia nonobapuna, kopia pita peyamaü kaponaewitsi, jumajjataba dajjita pa monae jumasa ajarapa monae juka penamotamotsi jawata. Jumajjataba yajawa rajuta penatajjujjatatsi jawanü. Rajuta pejjae jawa yajawa peapae nejja. Pamonaeje tó waüba pe wajunüanü rajuta burojji apo pekapanepaewi peponae nejja. kapona piaja monaeta kaewüalia Jericó jawabelia, (Paruma monae tomara). Nejjata nawiaba Samaria jawabelia. ¹⁶ Bajara pamatakabi jawalia reinü Acaz to najume itorobalia Asiria piaja reyewi jawabelia pe yawenonae nejjatsi. ¹⁷ Tsipaji edonitawi ikatsia tsimajjü ponarena Judá, yajawünü yamaü kaponaliatsi. ¹⁸ Filisteowi pijinia junua Judá piaja tomaranü pe enae jawa wayafua yajawa Neguev jawata. Pamonaeje pita Bet Semes, Ajalón; Gederot, Soco yajawa piaja tomarajji, Timna yajawa piaja tomarajji, pijinia Gimzo yajawa piaja tomarajji. pamonaeje ponalia pe jinawanapae nejja ajara pa nakuanü jawa. ¹⁹ Tsipaji Diosonü bijiobi ejjana Judá piaja nekoni Acaz, Israel piaja reinü; tsipaji pe bisia kuene itsi Judá jota piayai kuene Diosonü jawabelia to nanekonita. ²⁰ Tilgat Pilneser, Asiria piaja reinü, tayojoparenatsi y büjai ejjanatsi be peyawenae jawatsi. ²¹ Tsipaji Acaz dajjita tó nota Diosonü piaja bo jota, yajawa reinü y pitorobiwi piaja bonü jawa, penamotamatsi jawanü pe rajutsi nejja Asiria piaja reyewi jawabelia. JJuanüje apo yawenonaetsi. ²² Bajara ponü reinü Acaz to nanekoinita bitsó Diosonü jawabelia pa matakabita bijiobi. ²³ Tsipaji, ayai matamo jawa rajuta Damasco piaja diosowi jawabelia, pa diosowi ba amaneyabatsi. Bajara ponü jumaitsi: "Baitsi diosowi Aram piaja reyewi yawenonatsi, jjanü to najamatabü kuene rutsianajü ajara pamonaeta, tane yawenonae nejja ." Itsiata pamonae bijiobia ejjanatsi yajawa dajjita Israel pia jiwi. ²⁴ Acaz kaetuata dajjita Diosonü piaja bo jawata pe boenajawa ukababeyeta. Baupa jjataba Diosonü piaja bo nató ejjana barajaponü nejja ibojuma jawanü petó tajuitsi nejja piaja diosowi dajjita Jersalén jawa. ²⁵ Kae tomara kanakuijitsia Judá jawata bajaraponü itsi petsutónü jawa petó tajuitsi nejja itsa diosowi. Anaepanaya ejjana Diosonü, piaja monaewimi piaja Dioso, anaepana. ²⁶ Pijinia, pe itsijawanü, dajjita jjuanü ejjana, yakinaruba Judá yajawa Israel piaja reyewi bajjuto jawata. ²⁷ Acaz tüpa, pamonaeje mutjüta tomarata, Jerusalén jawata, pamonaeje apo kaponae pa mutjü belia Israel piaja reyewi mutjütabia. Ezequias, pejjünato, juya reinü kuenia itorobanuka.