¹ Besekusele emalanga lamabili kungakefiki lilanga leliPhasika nemkhosi wekudliwa kwesinkhwa lesingenamvubelo. Bapristi labakhulu nebabhali belivi bebahlela kwekutsi bangambopha njani Jesu baphindze bambulale. ² Ngoba bebatsi, ''ngeke kusenemkhosi, kute kungavuki lutfutfuva nemsindvo.'' ³ Ngesikhatsi Jesu ase Bethany asendlini ya Simone lobekane bulephelu ,ahleti etafuleni, kwefika umfati weta kuye aphetse lijeke le alabhasta lelalinemakha ladulile. Lomfati wefike wetfula lelijeke , wase utsela lamakha enhloko yaJesu. ⁴ Kepha kwaba khona labagcwala intfukutselo ekuboneni loku, bakhuluma emkhatsini wabo batsi, ''Yini sizatfu salokumosha? ⁵ Lamakha ngabe atsengiswe ngemali leyengca emakhulu lamatsatfu ema denarii, kwase kuniketwa labeswele." Base bayamtsetsisa. ⁶ Kepha Jesu watsi, ''Muyekeleni. Nimhluphelani? Ngoba ungentele intfo lenhle. ⁷ Labeswele nitohlala ninabo, nanifisile ningabentela lokuhle nanabo, kepha mine ngingeke ngibe nani onkhe emalanga. ⁸ Wente labengakwenta. Ugcobe umtimba wami angilungiselela kungcwatjwa. ⁹ Ngicinisile ngitsi, yonkhe indzawo emhlabeni wonkhe lapho liyoshunyalelwa khona Livangeli, lokwentiwe ngulomfati kuyawukhulunywa ngako, kukhunjulwa yena.'' ¹⁰ Judas Iscariot, lobekangulomunye webafundzi, wahamba waya kuba pristi labakhulu kute atonikela Jesu kubo. ¹¹ Emvakwekutsi bapristi labakhulu beve loku, bajabula bate betsembisa kumuniketa imali. Wase ubuka indlela yekunikela Jesu kubo. ¹² Ngelilanga lekucala lekudliwa kwesikhwa lesingenamvubelo, bafundzi baJesu, sebanikele imvana lengumhlatjelo weliPhasika, bambuta batsi,'' ufuna siye kuphi siyewulungiselela , kute siyowudla sidlo seliPhasika?'' ¹³ Jesu watfumela bafundzi bakhe lababili watsi kubo,'' hambani niye edolobheni, indvodza leyetfwele ludziwo lwemanti itawuhlangana nani. Nimulandzele. ¹⁴ Kulenyondlu lapho atofike angene khona, ningene naye nifike kumnikati waleyondlu nitsi, ''umfundzisi utsi, ''likamelo lami lelilungiselwa tivakashi liphi, lapho ngiyodla khona sidlo seliPhasika nebafundzi bami?'' ¹⁵ Utonikhombisa indlu lengenhla, lenkhulu nalelungele. Senteleni emalungiselelo khona. ¹⁶ Labafundzi besuka baya edolobheni. Befika batfola konkhe kunjengoba Jesu abatjelile, base bayalungisela lesidlo seliPhasika. ¹⁷ Nasekuyi ntsambama, Jesu weta nalaba lishumi nakubili. ¹⁸ Basesehleti etafuleni badla, Jesu wase utsi, ''ngicinisile ngitsi kini, munye wenu lodla nami utangitsengisa.'' ¹⁹ Bonkhe badzabuka babanelusizi, ngamunye ngamunye batsi kuye, ''kungete kwaba ngimi?'' ²⁰ Jesu waphedvula wase utsi kubo, ''ngumunye walaba lishumi nakubili, nangu lowenya sinkhwa kanye nami kulendishi. ²¹ Indvodzana yemuntfu itawuhamba njengoba kubhaliwe ngayo. Nako kuyo leyo ndvodza le, indvodzana yemuntfu itowutsengiswa ngaye! Bekutoba ncono kube akatalangwa.'' ²² Basadla, Jesu watsatsa sinkhwa, wasibusisa wase uyasihlephula. Wasiniketa kubafundzi bakhe, watsi, ''tsatsani la. Lona ngumtimba wami.'' ²³ Wase utsatsa inkomishi, wayibusisa, wase uyabaniketa, banatsa kuyo bonkhe. ²⁴ Wase utsi kubo, ''Lena yingati yami yesivumelwano, ingati lecitsekele labanengi. ²⁵ Ngicinisile ngitsi kini, ngingeke ngiphindze nginatse kulesitselo semvini, kute kube ngulelilanga lapho ngitosinatsa sisisha embusweni waNkulunkulu. ²⁶ Nasebahlabelele ingoma, baphuma baya kulentsaba yema Olives. ²⁷ Jesu watsi kubo, ''nine nonkhe nitawuhlakateka, ngoba kubhaliwe, 'ngitawushaya umelusi netimvu titawuhlakateka.'' ²⁸ Kepha uma sengivusiwe, ngitawuhamba embikwenu ngiye eGalile.'' ²⁹ Phetro watsi kuye, ''noma ngabe bonkhe bangahlakateka, mine ngingeke.'' ³⁰ Jesu watsi kuye, ''ngicinisile ngitsi kuwe, namuhla ebusuku, lingakakhali kabili licudze utobe sewungiphike katsatfu.'' ³¹ Kepha Phetro watsi, ''noma kungabita kutsi ngife kanye nawe, ngingeke ngikuphike.'' Bonkhe benta setsembiso lesifanako. ³² Befika endzaweni leyayibitwa ngekutsi yiGetsemane, Jesu watsi kubafundzi bakhe, ''hlalani lana mine ngisayothandaza.'' ³³ Wesuka wahamba na Phetro, Jakobe na Johane wase ucala kukhatsateka nekwesaba. ³⁴ Wase utsi kubo, ''umphefumulo wami ukhatsateke kakhulu, kwekufa. Lindzani lana nibuke. ³⁵ Basachubachubeka, Jesu wawela phansi wase uyathandaza kutsi kube bekungenteka lelihora belingendlula kuye. ³⁶ Wase utsi, ''Abba, Babe, konkhe kuyenteka kuwe. Susa lendzebe kimi. Kepha kungasiyo intsandvo yami, kepha yakho.'' ³⁷ Wabuya wabatfola sebalele, watsi ku Phetro, ''Simone, ulele na? Bewungete walindza ngisho lihora linye? ³⁸ Lindzani nithandaze kutsi beningete nangena ekulingweni. Umoya wona uyavuma, kepha inyama ibutsakatsaka.'' ³⁹ Wesuka phindze wabuyela kuyothandaza, wasebentisa emagama lafana nalawasebentise ekucaleni. ⁴⁰ Uma abuya futsi, wabatfola sebalele, ngoba emehlo abo abesindza. Abatanga kutsi batsini kuye. ⁴¹ Wabuya kwesitsatfu wase utsi kubo, ''ngabe solo niselele futsi niphumulile na? Kwanele! Lihora selifikile. Bukani! Indvodzana yemuntfu itsengiselwa etandleni tetoni. ⁴² Vukani; asambeni. Bukani, lona lotongitsengisa usedvutane. ⁴³ Ngesikhatsi Jesu asakhuluma, kwefika Judas, lobekangulomunye walaba lishumi nakubili, weta nesicuku sebantfu lesasifaka ekhatsi bapristi labakhulu, nebabhali belivi nalabadzala, baphetse tinkemba netindvuku. ⁴⁴ Lomtsengisi abebanike indlela labatambona ngayo, watsi, ''Lona lengitomcabula nguye yena. Mubambeni nimuhole nihambe naye nimgadzile.'' ⁴⁵ Uma Judas afika, masinyane weta kuJesu watsi, ''Mfundzisi,'' wase uyamcabula. ⁴⁶ Base bayambamba bamtsatsa. ⁴⁷ Kepha munye webafundzi lobekasedvute wakhipha inkemba wajuba indlebe yesisebenti sempristi lomkhulu. ⁴⁸ Jesu watsi kubo, ''Nitelani kimi, netinkemba netindvuku, kwangatsi nite kumuntfu losigangi, lowebako? ⁴⁹ Ngesikhatsi nginani onkhe emalanga nginifundzisa ethempelini, aningibophanga. Kepha loku kwenteka kute kutofezeka imibhalo.'' ⁵⁰ Bonkhe labebana Jesu bamshiya babaleka. ⁵¹ Lelinye lijaha, belimbetse indvwangu yelineni , belilandzela Jesu. Uma lamadvodza abamba Jesu, ⁵² lelijaha lashiya phansi lendvwangu yelineni labaleka lingcunu. ⁵³ Baholela Jesu kumpristi lomkhulu. Lapho bekuhlangene bonkhe bapristi labakhulu, nalabadzala kanye nebabhali belivi. ⁵⁴ Phetro abeloku alandzela, emele bucalu, wate wefika ebaleni leMphristi lomkhulu. Wefika wahlala emkhatsini wabogadzi, dvute nemlilo atotigcina ashisa. ⁵⁵ Bapristi labakhulu neLiqoqo lemaJuda bebafuna bufakazi lebebangabusebentisa kute babulale Jesu. Kepha ababutfolanga. ⁵⁶ Labanyenti baletsa bufakazi lobungemanga ngaJesu, kepha lobufakazi babo abuvumelananga. ⁵⁷ Labanye basukuma baletsa bufakazi lobungemanga ngaye; batsi, ⁵⁸ ''Simvile atsi, 'ngitolibhubhisa leli thempele lelakhiwe ngetandla, futsi ngemalanga lamatsatfu ngitowakha lelinye lelakhiwe ngephandle kwetandla.'' ⁵⁹ Kepha nakhona bufakazi babo abuvumelananga. ⁶⁰ Umphristi lomkhulu wema emkhatsini wabo wase ubuta Jesu, ''Ute imphendvulo na? Yini lena leshiwo ngulamadvodza lawa ngawe? ⁶¹ Kepha wathula wangaphendvuli lutfo. Umphristi lomkhulu waphindze wambuta watsi, ''ungu loKhristu yini, Indvodzana yalo Busisiwe?'' ⁶² Jesu watsi, ''Nginguye; futsi utoyibona Indvodzana yemuntfu lapho ihleti ngesekudla semandla eta ngemafu asezulwini.'' ⁶³ Umphristi lomkhulu wadzabula tembatfo takhe watsi, ''Sisabadzinga bofakazi na? ⁶⁴ Nikuvile lokuhlambalata. Sitsini sincumo senu?'' Bonkhe bambeka licala njengaloyo lofanelwe kufa. ⁶⁵ Labanye bacala bamkhafulela bambonya nebuso bamushaya batsi kuye, ''Phrofetha!'' Bogadzi bamtsatsa base bayamshaya. ⁶⁶ Ngesikhatsi Phetro asesebaleni, yinye intfombatane leyayisisebenti semPhristi lomkhulu yeta kuye. ⁶⁷ Yabona Phetro atifutfumalisa, yambukela edvute yatsi kuye, ''Nawe bewunalo mnazaretha, Jesu.'' ⁶⁸ Kepha waphika, watsi, ''Angati phindze angicondzi kutsi ukhuluma ngani.'' Wase uyahamba uyophumela ngase kungeneni. ⁶⁹ Kepha lentfombatana leyayisisebenti yambona yaphindze yatsi kulabo bebeme lapho, ''Lendvodza lena ingulomunye wabo.'' ⁷⁰ Kepha waphindza waphika. Emva kwesikhatsi labo bebeme lapho batsi ku Phetro, ''Ngempela ungulomunye wabo, ngoba ungumGalile.'' ⁷¹ Kepha wase uyaticalekisa waphindze wafunga, ''Angiyati lendvodza lenikhuluma ngayo.'' ⁷² Masinyane licudze lakhala kwesibili. Phetro wase ukhumbula emagama Jesu lawasho kuye: ''Lingakakhali kabili licudze, utongiphika katsatfu,'' wakhala.