¹ Jesu wase ucala kubafundzisa asebentisa imifanekiso. Watsi 'Umuntfu lotsite wahlanyela sivini, wasibiyela ngelutsango, wemba nendzawo yekuhluta liwayini. wakha nencaba yekulindza wase usicashisela balimi bemivini. Wase utsatsa luhamba loludze. ² Kwatsi ngesikhatsi lesifanele, watfuma sisebenti sakhe kuleticashi kutsi timnike incenye yetitselo tesivini. ³ Kodvwa tasibamba lesisebenti, tasishaya , tasihambisa singakaphatsi lutfo. ⁴ Waphindza futsi watfuma lesinye sisebenti, naso tasilimata kamatima enhloko tasihlazisa. ⁵ Watfuma futsi lesinye, sona ke tasibulala. Tatiphatsa kanjalo tonkhe letinye , batishaya letinye batibulala. ⁶ Munye kuphela umuntfu bekasesele kutsi angamtfuma, indvodzana yakhe layitsandzako. Ngiyo layitfumela kwekugcina. Watsi, 'batayihlonipha indvodzana yami'. ⁷ Kodvwa balimi bemivini batsi lomunye kulomunye, 'Nayi indlalifa. Wotani, asiyibulale, lelifa litabe seliba letfu. ⁸ Bayibamba, bayibulala, bayikhipha bayilahlela ngephandle kwesivini. ⁹ Ngako-ke, uyawukwenta njani lomnikati wesivini? Uyawubuya ababhubhise bonkhe labalimi besivini asinike labanye bantfu. ¹⁰ Aniwufundzanga yini lombhalo lotsi? 'litje lelaliwa bakhi batsi alinamsebenti walutfo selentiwe laba litje lekusimisa indlu. ¹¹ Loko kwentiwa yiNkhosi, lisimangaliso emehlweni etfu" ¹² Emvakwaloko Baholi bemaJuda bafuna indlela yekumbopha Jesu ngoba bacondza kahle kutsi ukhulume lomfanekiso kuphambana nabo. Kodwa babesaba sicuku. Ngako besuka bahamba. ¹³ Base batfumela labanye baFarisi nemaHerodi kutsi bayewumetsiya ngemagama. ¹⁴ Nabefika , batsi kuYe, "Mfundzisi, siyati kutsi wena awunendzaba nekutsi umuntfu utsini futsi awesabi buso bemuntfu. Ufundzisa indlela yaNkulunkulu. Kulungile yini kubhadala umtselo kuKhesari nobe cha?" ¹⁵ Kodvwa Jesu akwati kutentisa kwabo watsi kubo, "ningilingelani? Letsani kimi luhlavu lwadenariyu ngitolubuka." ¹⁶ Bamnika Jesu loluhlavu. Wase utsi kubo, "Wabani lomfanekiso nalombhalo lo?" Bamphendvula batsi, "waKhesari." ¹⁷ Jesu wase utsi, " Nikani Khesari tintfo letitaKhesari , ninike Nkulunkulu tintfo letitaNkulunkulu. Bamangala. ¹⁸ BaSadusi, labo labatsi akukho kuvuka kwalabafile, beta kuYe . Bambuta, batsi, ¹⁹ Mfundzisi, Mose wasibhalela kutsi, "Uma indvodza ifa ishiye umkayo, angenamntfwana, umnakabo kufanele angene lomfati wemnakabo, avusele lomnakabo inhlanyelo,' ²⁰ Kwakukhona telamani letisikhombisa; lona wekucala watsatsa umfati wase uyafa, kute inhlanyelo. ²¹ Kwatsi lowesibili wamngena naye wafa, washiya kute inhlanyelo, newesitsatfu ngalokunjalo. ²² Bosikhombisa abashiyanga nhlanyelo. Ekugcineni, wafa nalomfati. ²³ Ekuvukeni, nase bavuka futsi, uyakuba wabani lomfati? Ngobe bonkhe babe naye Njengemfati wabo." ²⁴ Jesu watsi, "Akusiko yini loku lokwenta neduke, ngobe aniyati imibhalo anati nemandla aNkulumkulu? ²⁵ Ngobe nase bavuka kulabafile, abasatsatsani futsi abendziswa, kodvwa sebanjengetingilosi ezulwini. ²⁶ Kodvwa mayelana nalabafile ekuvukeni, anitange nifundze yini encwadzini yaMose, ngendzaba yesihlahla, kutsi Nkulunkulu wakhuluma naye atsi, 'NginguNkulunkulu wa Abrahama naNkunkulu wa Isaka naNkulunkulu wa Jakobe'? ²⁷ Akasiye Nkulukulu walabafile, kodvwa walabaphilako. Nine nisephutseni mbamba. ²⁸ Lomunye webabhali wasondzela wayiva lenkhulumo ; wabona kutsi Jesu ubaphendvule kahle. Wambuta watsi, " Ngumuphi umyalo longuwona ubaluleke kunayo yonkhe? ²⁹ Jesu wamphendvula watsi, "Lobaluleke kakhulu nangu, 'Lalela, Israyeli, Simakadze Nkulumkulu wetfu munye, ³⁰ Kufanele umtsandze Simakadze Nkulunkulu wakho ngayo yonkhe inhlitiyo yakho, nangawo wonkhe umphefumulo wakho, nangayo yonkhe ingcondvo yakho, nangawo onkhe emandla akho'. ³¹ Wesibili umyalo utsi, 'Kufanele utsandze makhelwane wakho njengoba utitsandza wena.' Kute lomunye umyalo lomkhulu kunaloyo." ³² LoMbhali watsi, "Kuhle, Mfundzisi! Ukhulume liciniso nawutsi Nkulunkulu munye, nekutsi kute lomunye ngaphandle kwakhe. ³³ Kumtsandza ngenhlitiyo yakho yonkhe nangako konkhe kucondza kwakho nangawo onkhe emandla, nekutsandza makhelwane wakho njengoba utitsandza wena kwendlula yonkhe iminikelo nemihlatjelo." ³⁴ Kwatsi Jesu nakabona kutsi uphendvule ngekuhlakanipha, watsi kuye, "awukho khashane nembuso waNkulunkulu." Emvakwaloko , akubange kusabakhona lowafisa kumbuta lutfo. ³⁵ Jesu asafundzisa ethempelini, watsi, "Basho kanjani babhali kutsi Khristu uyindvodzana yaDavide? ³⁶ Davide cobo lwakhe, akuMoya, watsi, 'INkhosi yatsi eNkhosini yami, "Hlala ngesekudla sami ngite ngente titsa takho tibe senabelo setinyawo takho." ³⁷ Uma Davide ambita ngekutsi ' Nkhosi' pho Khristu angaba yindvodzana yakhe kanjani? Ticuku letinkhulu tebantfu tatimlalele ngekujabula. ³⁸ Ekufundziseni kwakhe Jesu watsi, "'Caphelani babhali, ngobe batsandza kuhamba bembetse imijiva lemidze babingelelwe etimakethe, ³⁹ bahlale etitulweni letisembili emasinagogeni netindzawo letihloniphekile emadzilini. ⁴⁰ Badla tindlu tebafelokati, bente imithandazo lemidze khona batobonwa bantfu. Labantfu bayokwemukeliswa kulahlwa lokukhulu. ⁴¹ Jesu wahlala phansi macondzana nelibhokisi lemnikelo ethempelini; abebukela ngesikhatsi bantfu bafaka iminikelo yabo ebhokisini. Bantfu labanyenti labanjingile babefaka timali letinkhulu. ⁴² Kwase kufika umfelokati lophuyile wafaka tinhlavu letimbili temali , letenta isenti. ⁴³ Wabita bafundzi bakhe watsi kubo, " Ngicinisile ngitsi kini, lomfelokati lophuyile unikele kubedlula bonkhe labanikele kulelibhokisi lemnikelo. ⁴⁴ Phela bona banikele batsatsa kulokunyenti. Kodvwa lomfelokati , ekwesweleni kwakhe , ufake yonkhe imali labengaphila ngayo'.