¹ Simakadze wakhuluma ku Mosi naku Aroni, atsi, ² ''Uma kukhona lonekuvuvuka esikhumbeni semtimba wakhe noma kucina lokomile kwesikhumba noma libala leligcamile, phindze liyatseleleka bese kuba nesifo sesikhumba emtimbeni wakhe, kumele aletfwe ku Aroni umphristi lomkhulu, noma kumunye weba phristi. ³ Utobese umphristi ucilonga lesifo esikhumbeni semtimba wakhe. Uma lesikhumba kulendzawo lenalesifo seyigucuke yaba mhlophe, phindze uma lesifo sibukeka sijulile kunekuba sesikhumbeni, lapho ke sisifo lesitsatselwanako. Emvakwekutsi umphristi amcilonge, kumele asho kutsi lomuntfu ungcolile. ⁴ Uma lelibala leligcamile esikhumbeni sakhe limhlophe, nekubukeka kwalo kukwekutsi alikajuli kunesikhumba, phindze uma letinwele kulendzawo lenalesifo ingakagucuki yaba mhlophe, lapho ke umphristi kumele ahlukaniswe nebantfu loyo lonalesifo emalanga lasikhombisa. ⁵ Ngelilanga lesikhombisa, umphristi kumele amcilonge kubona kutsi ngembono wakhe kutsi lesifo asisiko bucayi yini, futsi uma singakandzi esikhumbeni. Uma singakate, utobese umphristi umhlukanisa nebantfu emalanga lasikhombisa lamanye. ⁶ Umphristi utomcilonga futsi elangeni lesikhombisa kubona kutsi lesifo sesincono yini nekutsi asikandzi esikhumbeni. Uma singakate, utobese umphristi utsi uhlobile. Kucubuka. Kumele awashe timphahla takhe, emvakwaloko utobe ahlobile. ⁷ Kepha uma lokucubuka sekwandzile kulesikhumba emvakwekutsi atikhombise kuba phristi ngekuhlotjiswa kwakhe, kumele abese uyotitjengisa ku mphristi futsi. ⁸ Umphristi utomcilonga kubona kutsi lokucubuka akukandzi yini kulesisikhumba. Uma kwandzile, kumele umphristi asho kutsi ungcolile. Kusifo lesitselelanako. ⁹ Uma sifo sesikhumba lesitsatselanako sikumuntfu, kumele aletfwe kuba phristi. ¹⁰ Umphristi utomcilonga kubona kutsi kukhona yini kuvuvukala lokumhlophe esikhumbeni, kutsi tinwele tigucuke taba mhlophe, noma kunesilondza lesivulekile kulokuvuvuka. ¹¹ Uma kukhona, kusho kutsi kusifo sesikhumba lesichubekako, ne mphristi kumele asho kutsi ungcolile. Angeke amkhiphe ebantfwini ngoba sewuvele ungcolile. ¹² Uma lesifo sibhedvuka esikhumbeni siphindze simbonye sonkhe lesikhumba salomuntfu lonalesifo kusukela enhloko kuya elunyaweni, khashane nalapho abona khona umphristi, ¹³ umphristi kumele amcilonge kubona kutsi lesifo sesiwumbonye wonkhe yini umtimba wakhe. Uma ngabe sikile, umphristi utobese uyasho kutsi lomuntfu lonalesifo uhlobile. Uma ngabe sigucuke sonkhe saba mhlophe, utobe sewuhlobile. ¹⁴ Kepha uma tilondza tivela kuye, utongcola. ¹⁵ Umphristi kumele abuke lesilondza aphindze asho kutsi lomuntfu ungcolile. Kusifo lesitselelanako. ¹⁶ Kepha uma lesilondza sigucuka siba mhlophe phindze, kumele bese lomuntfu uya ku mphristi. ¹⁷ Umphristi utomcilonga kubona kutsi lesikhumba sesigucukile saba mhlophe yini. Uma ngabe sikile umphristi utokusho kutsi loyo muntfu uhlobile. ¹⁸ Uma umuntfu anebuhlungu esikhumbeni phindze nasesiphilile, ¹⁹ nasesikhundleni salobuhlungu besikhumba kunekuvuvuka lokumhlophe noma libala leligcamile, lelibovu sakuba mhlophe, kumele bese itjengiswa ku mphristi. ²⁰ Umphristi utosicilonga abuke kutsi sibukekasijule ngephansi kwesikhumba, nekutsi tinwele khona setigucuke taba mhlophe. Uma kunjalo, umphristi kumele asho kutsi loyo ungcolile. Kusifo lesitselelanako, uma ngabe sivele endzaweni lapho bekunebuhlungu besikhumba khona.