¹ Dji prexbit_la Gai, ha ki mo telmã kõtã lãdã lavehite. ² Mo fue, phuie pu u hete benisie lãdã tut bagaj, pu u lãsãte hete pi benisie ãke u nam. ³ Mo hete boku kõtã kã fue_iela hive pu bai temwē dji lavehite, dji kumã u ka maxe lãdã lavehite. ⁴ Mo pa gãiē kõtatmã ki pi gho dji ki sa: kã ga tãde ki pitit_iela ka maxe lãdã lavehite. ⁵ Mo fue, u ka fe bagaj ki jis kã u ka fe thavai palakós dji no fue_iela, mem ki ie sa ēthãje. ⁶ Ha ki ka bai temwē dji u kõtatmã djivã dji legliz. Fe biē i voie ie pu ie voiaz dji un mãiē ki jis djivã dji Bõdjie. ⁷ Ēbe palakós dji Nõ dji JEZI ie sutxi, sã husuve ãie dji mun dji tã_la ⁸ Ēbe, no djivét hamase no fue_iela pu ie sa un thavaio dji lavehite. ⁹ Mo ekhi un bagaj pu legliz_la, mē Diótref, no kõtã sa phomiē lamitã dji ie pa husuve. ¹⁰ Apuha, so mo vinī, ke fe i xõje dji thavai ki i ka fe, is pale pahól mal kõt nū, i pa ka hete kõtã ke ha mãie_la, i pa ka husuve fue_iela, i tuju i ka ãpexe mun_iela husuve_ie, i ka txihe_ie dji legliz_la. ¹¹ Gai mo kamahad, pa fe mal, mē fe biē. Mun ki ka fe biē i sa dji Bõdje; i ha ki ka fe mal i pa jē ue Bõdje. ¹² Akã Demét, i ka husuve bõ temwē dji tut, juk mem phop lavehite_la ka pale biē dji li. I nõ men usi ka bai temwē, i u save ki no temwē alavehite. ¹³ Mo te gãiē buku bagaj pu mo te ekhi pu to, mē mo pa ule fe ke lap i ke txīt. ¹⁴ Mē mo ka ãtan pu mo uel ãko, no ke koze viaz ke viaz. ¹⁵ pas ke to. Kamahad_iela ka voie saudasiõ pu to. I u men usi voie um saudasiõ pu xãke un dji ie.