^{1 2} Urusiko urwonde urwa obhotoro, Yeesu yahetire mo-meghondo ogya engano abheega abhaaye bhaaghendanga bharatabhora ebheghara ibhya engano. Bhakabhibhunga mo-mabhoko, bhakarya seheke isyako. Ho abhafarisayo abhande bhaabhoorri Yeesu igha, "Nkwake mokokora emeremo ghiyo urusiko urwa obhotooro? Urusiko ruyo amaragherryo agheeto te-ghakwikerrya tokore emeremo he"? ³ Yeesu, akabhahonshora igha, "Te-mwakasomire kya bhoora Daudi yaakorre hano yaare na umweko hamwe na bharikyaye? ⁴ Yasohire mu-righutu irya Waryobha akaghegha emeghate emehoreeru, akagherya, akahaana- ko bhasikyaye, amaragheryo agha Mosa te-ghakwikerya abhanto abhande bharaaghere emekaate ghiyo he, na bhasengeri abheene igho mbo bhaagheryanga" ⁵ Yeesu akaghenderya okoghamba igha." Yeesu akaghenderya okoghamba igha, "Omoona uwa omonto we omotongi uwa urusiko urwa obhotooro." ⁶ Urusiko urwonde ghwiki urwa obhotooro Yeesu yasohore munyumba isya esango iya abhayahudi, akasimya ukweghya abhanto. Mo-sango muyo, yaare-mo omonto uwonde ono yaare na risusu kekobhoko ukwaye ukwa bhoryo. ⁷ Abheegya abha amaragheryo hamwe na abhafarisaayo, bhaatunanga, ensherea iya ukumushongera, Kubhuyo bhaamwitaahanga bhamaahe nyoore naahwenia omonto uyo urusiko neyo urwa obhotooro. ⁸ Kasi Yeesu akang'ura eseemya engogho eno bhaare nayo, kubhuyo akateebhya uwa okobhoko ukwa risusu oora igha, "Nsho wemere, ghateghate hano." Omonto uyo akaghya akemerra. ⁹ Yeesu akateebhya abha amaragherryo bhaara igha, "Tigha mbe mbabhori-ko eng'ana . Neng'ana ke ighwikerribhwa ekorwe urusiko urwa obhotooro? Okora amang'ana amaiya kasi amaghogho? Totoori abhanto ko okobhahwenia urusiko ruyo kasi twite?" ¹⁰ Yeesu akamoghora amaiso abhanto bhayo bhonswe igho." Ho bhoono akateebhya omonto uyo igha, "Rambora okobhoko ukwaho." Hano yaakorambooye, kokahwena kamwe igho. ¹¹ Abhanto bhayo bhakarerra bhokong'u, bhakasimya ukushumaashera kya bhono bhaakore Yeesu. ¹² Urusiko urwonde mu-sinsiko siyosiyo, Yeesu yaagheeye okosaasaama igho bhokakya kyo. ¹³ Hano bhwakeeye, akabherekera abheegha abhaaye. Akasora -mo abhanto ikomi na bhabhere mo-bheega abhaaye muyo, akabhabherekera igha abhatomwa. Amasiina agha abhatomwa bhayo ngaano hano. ¹⁴ Simoni ono Yeesu yaabherekeeye igha Petero, Andrea mura uwabho Simoni, Yakobho, Yohana, Filipo, Bartolomayo, ¹⁵ Mathayo, Tomaso na Yakobho omona wa Alfayo, Simoni ono yaabherekeywe igha Zelote, ¹⁶ Yuda uwa Yakobho na Yuda Iskariote, ono yakoreeye Yeesu iniko ko abhabhisa abhaaye. ¹⁷ Yeesu akang'aaraara ukurwa kunguku koora hamwe na abhatomwa abhaaye. Hano yaahikire ko-kebhara bhanshe akaimerra hayo haare-ho abheegha ahaye abhaaru, na rikomo rinene irya abhanto abhande resangeraini ho. Bhaarwereeeye mu-mughi ughwa Yerusalemu, na abhande bhaarwereeye ko-sembaara isya ko-morambo ughwa Tiiro na ughwa Siidoni. ¹⁸ Abhanto bhayo mbaishire hayo ukwiteghera Yeesu, na ukuhwenibhwa amarooye. Kora akabha arahwenia, bhaara bhaanyankibhwanga na amasambwa amagogho. ¹⁹ Abhanto bhonswe igho bhaatunanga bhakuni Yeesu okore bhahwenibhwi, ko okobha singuru seno syaarwanga ku-Yeesu nsyabhahwenianga bhonswe igho. ²⁰ Yeesu akamaahera abheega abhaaye, akabhateebhya igha, "Nyakara bheenyu abhatobhu, ko okobha bheenyu m-bheenyu abhanto abha obhokama ubhwa Waryobha. ²¹ Nyakara bheenyu bhano moona umweko bhoono igho, ko okobha mwiighotibhwa. Nyakara bheenyu bhano mukukuura bhoono igho, ko okobha moreeseka. ²² Nyakara bhenyu hano abhanto bharebharegha, hano bharebha ahora, hano bharebhatoka na okobhaghamba ghoghogho ku ukughira ukwa omoona uwa omonto. ²³ Enkaagha iyo bheenyu mushomerwe mushenge kora mubhina embeghete. Momanye kwemwe mbe igha, nurinyoora mobheekeeywe ituho iyeenyu enene ku-ryobha, ko okobha, ni-ighoigho na abhaibhori abhaabho bhonswe bhaakore abharooti abha kare. ²⁴ Kasi haho bheenyu abhaame! ko okobha mwamara kunyoora eghosoryo iyeenyu. Haaho bhenyu abhaighotu abha bhoono igho ko okobha moreesengera! ²⁵ Haaho bheenyu bhano mokoseka bhoono igho ko okobha musiikuura igho kora mushesheke. ²⁶ Haaho bheenyu, hano abhanto bhonswe igho bharaabhakumi ko okobha ni ighoigho na abhaibhori abhaabho bhonswe bhaakumyanga abharooti abharongo. ²⁷ Mbenyu nkoteebya bhano mukunyiteghera mohanshe abhabhisa abheenyu abhanto bhano bhakobharegha, bheenyu mobhakore bhuuya. ²⁸ Mong'oore bhano bhakobhaihiima, bhano bhakobhanyankya bheenyu mobhasaasaamerenga ko-Waryobha. ²⁹ Hano omonto araakosere akoteme orohe ko-mboto, umusyori na embeto iyende. Hano omonto araakuruusi ekooti yaaho mohaane kora ishaati yonswe agheghe. ³⁰ Hano omonto wowonswe igho akosabhire ekento. Omohaana hano omonto araakosake ebhento ibhyaaho, otakaamosabha akukyori. ³¹ Mokore abhanto kya bhono mukutuna bhabhakore. ³² Hano mosaahanshe bhaara bhabhahanshire bheenyu abheene igho nke oraanyere mokore? kora abhanyanku bhonswe nkohansha bhane bhano bhabhahanshire. ³³ Na hano moraatoori bhaara bhakobhatorya abheene igho, nke oraanyore mokore? Kora abhanyanku bhonswe ni-igho bhakokora. ³⁴ Na hano moraahaane isiire bhaara mukwiteghera igha bhareebhahaka abheene igho, nke oraanyore mokorre? Kora abhanyanku bhonswe nkohaana bhare bharikyabho isiire, bhaamanyire igha mbarehakwa isiire iyaabho yonswe igho. ³⁵ Kasi bheenyu mohanshe abhabhisa abheenyu mobhatoorigha. Mohaanenga abhanto isiire metakwitenghera igha moreehakwa. Hayo ho misituhwa ituho enene na hayo ho morebha abhana abha Waryobha ono akere bhyonswe igho. Ko obhoora, Waryobha mbuuya akokora abhakora amaghogho na kora te bhaana umukumo he. ³⁶ Mwabhere abhanto kya bhono suweenyu uwa ku ryobha akwabhera abhanto. ³⁷ Motakaabhotora, abhande ibhiina ibhyabho na bheenyu te mobhotorwe ibhiina ibhyeenyu he. Motakatuna abhande bhashibhibhwi okore motakaashibhibhwa. Mwabhere bhano bhakobhasarya okore na bheenyu mwabherwe. ³⁸ Mohaanenga abhanto ebhento, na bheenyu bhonswe moraahanwe. Morahanwe ekerengere ikiiiya bhokong'u keno kirisingisibhwa na ukwieghaterwa, okore kyenshore kora kyetekere. Mbe, ekerengere keno mokahaanera -mo abhande nkyo na bheenyu bhonswe morehaanerwa mo." ³⁹ Yeesu akabharengerya ekerengeryo keno gha, "Kasi umuhukuru naatora okotangata umuhukuru musikyaye? Ndamanya m-bhonswe igho bharaaghwe mu-riiroooma? ⁴⁰ Umwegha ta-manye aheteere umweghya uwaaye he. "Kasi hano araikong'eri ku ukweghibhwa ghonswe ho araareng'aane na umweghya uwaaye. ⁴¹ Ndara aramaahera bhokong'u akatihaashoro kano karenge mu-riiso iiya mwikyaho, kasi tu kwiteghera rihinda reno rerenge mu riiso iryaho he? ⁴² Iyake oraakore oteebhi musikyaho igha, "Tigha nkuruusi akatibhaashero mu riiso iryaho, n aeno mbe uwe umwene to komaaha rihinda reno rerenge muriiso iryaho he? Ore mwikori ruusya tangata oramaahe bhuuya omanye ukuruusya akatibhaashero akake mu riiso irya murikyaho. ⁴³ Te ghooho omote umuuya ghono ghukwama sehagho sengongo he. Na ighoigho, te ghooho omote omoghogho ghono gukwama sehagho sinshiiya he. ⁴⁴ Sehagho seno seekoreebhwa ti sikutwebhwa ko bhehore he. Ebhesaka ibhya amahwa ti bhikwama sezabhibhu he, omote nsehagho. ⁴⁵ Omonto uwa heene, amang'ana aghaaye amaiya nkuruwa ghare mo maiteghera aghaaye agha heene ghano anagho mo nkoro iyaaye. Na omonto omoghogho wonswe amang'ana aghaaye amaghogho nkurwa ghare mo maiteghera aghaaye amaghogho ghano anagho mo nkoro iyaaye. Mbe, amang'ana ghano omonto akoghamba ngaara ghaishooye monkoro iyaaye. ⁴⁶ Nkwake mokomberekera bherekera igha, "Omonene uweeto', Omonene uweeto kasi ghano nkobhateebhya te mokoghakora he? ⁴⁷ Igha mbarengeri ekerengyo, ikya omonto ono akwiteghera amang'ana aghaane na ukunyighwera kya bheno atuubhire. ⁴⁸ Atuubhaini kya omohaghaashi ono yaatukire obhorosa, akahikya ko rotare akahaghaasha mo bhorosa. Hano imbura yaatooye, omoghera ghokeeshora, amashe ghakaghera, ghakaitema inyumba iyaaye iyo. Kora te ghaghisingisiri he, ko okobha ya ahangha ashirwe bhuuya. ⁴⁹ Kasi omonto ono akwiteghera amang'ana aghaane na ta kunyighwera he, uyo atuubhaini na omonto ono yaahaghaashire inyumba iyaaye ku-risense, atatukire obhorosa, hano imbura yaatooye, omoghera ghokaghera, amanshe ghakaitema inyumba iyaaye iyo, inyumba iyo ekaihongorya hanse yenswe igha.