¹ Inkyo shiri urusiko urwambere urwa obhotooro mbaishire kombehera bhakasha neekoroso eno wanyore bhaseemeri. ² Bhakanyoora reghena rihingirwe kukurwa koombehera kuya hare. ³ Bhakasoha monse kasi tebhanyore mo itondo he irya omonene Yeesu. ⁴ Yaabhaya igha hano waanyore bhaaroghoore koreno kamwe igho mbaitakeri abhanto bhabhere okanyoora bhaimeereye ghateghate yaabho bhaibhohire shingibho sheno shigwoka. ⁵ Abhakari bhakari bhakabha irinyantareki bhahinya haanse ubhusyo bhwabho bhakateebya abhakari ngoke mukutuna ono arenge mo bhaku? ⁶ Tahanohe, kasi aryookire muhiile bhono yaghambire hano mwaare nawe mokeerenge Galilaya, ⁷ Yaghambire igha omona wa Adamu nararusibhwi kwa nguru momabhoko gha abhanto bha ebhebhe. Aitwe urusiko rwa katato aryooke gwiki." ⁸ Abhakari bhaara bhakahiita amang'ana ghaye. Na mbaaringire kukurwa kombehera. ⁹ Mbateebheri amang'ana ghayo ghonswe abhanto ikomi na omwe bhara na abhande bhonswe. ¹⁰ Mbe Maaria Magdalena, Joana, Maria nyakwabho Yakobo, na bhakari bhande bhano bhaare abhatomwa. ¹¹ Ghasi abhatomwa bhaara mbaroshe igha amang'ana gara mbushema tebhakumiri abhakari bhaara he. ¹² Petero yaimokire akakenya kuya kombeheera akasyomerya akamaha moonse esanda iyeene. Gwiki Petero akaya waaye rogoore keno kebhaye. ¹³ Na gwiki omaahe mbaremo abhanto bhabhere bhano bhayanga urusiko ruyoruyo ku-kibhure keno kebherekerwanga igha Emmau keno kyare shikilometa merongo esansabha kukurwa Yerusalemu. ¹⁴ Mbhaishunshire abhene komang'ana ghayo ghaikore. ¹⁵ Yaabhaye igha hano bhaishunshanga amang'ana na bharaghamba Yeesu yahikire hang'i akaghenda nabho. ¹⁶ Kasi amaiso ghabho ngare bhereywe bhange komomanyeerya. ¹⁷ Yeesu akabhabhoorya enke mukushumashera bheenya abhanto bhabhere naeno moraghenda?" bhakaimeera naeno bhasoroimbeye. ¹⁸ Murikyabho omwe yabherekerwanga igha Cleopa akahonshora igha, "Nuuwe umwene Yerusalemu hano ono otamanyire amang'ana ghano ghaikora iyo nsiko sheno?" ¹⁹ Yeesu akabheteebya, "Mang'ana ke? Bhakamohonshora amang'ana agha Yeesu Mnazareti ono yaare omoroti ono yatoranga na oghokora ghonswe na amang'ana ko-mbere ya Waryobha na abhanto bhonswe igho. ²⁰ Na kobhono abhasubhi na abhatangati abhanene bhono bhamurusiri na kumushibya uruku na bhakamwita. ²¹ Kasi ntwaitegeye igha nawe arabhatunguri abha Israeli hare. Na ghayo ghonswe bhoono ni nsiko isato kurwa ghayo bhabhaye. ²² Ghasi gwiki abhakari bande kukurwa mwikomo ryeto mono mbantoroghori hano bhamahekanini inkyo shiri koombehera. ²³ Hano bhaabhoore omobhere bhakasha bharaghamba igha aroshe ekoroto ika bhamalaika bhano bhaghambire igha mohoru. ²⁴ Abhashasha bhano bhaare hamwe nabheeto mbagheye koo mbeehera." Bakanyoora nkyabhoora abhakari bhaare koghamba. Kasi tebhaamoroshe he. ²⁵ Yeesu akabhateebya, "Bheenyu mbato bhakangi more bhano moona shenkoro ndito bhano mukukumya ghonswe ghano abharoti bhakoghamba! ²⁶ Kasi ti yaare Kiristo anyankibwi na asohe muubhuhika bwaye?" ²⁷ Hayo akasimwa kukurwa wa Mosa na abharoti bhonswe. Yeesu akabhasesoora amang'ana ghano. ²⁸ Hano bhahiikiri haang'i na ikibhure kiyo bhayanga Yeesu akaikora igha we nembere akughya. ²⁹ Ghasi mbamohaamereyi bharamoteebya ikara hamwe nabheeto koobhoora omoghorobha ghuhikire urusiko rohooye neho Yeesu yasohire kuya kukara nabho. ³⁰ Ekabha igha hano yaikaye koraghera nabho akaghegha omoghate akaghosabhura akaghobhotora akabhahaaana. ³¹ Gwiki amaiso ghabho ghakaramokya bhakamomaaha bhakamomanya kamwe igho akasira komaiso bhabho. ³² Bhakateebhaniya abhene ko bheene igha shenkoro sheto tethorabire monsehe. Enkagha eno yaashumashire na bheeto hano twagheendanga konshera akatosesoora amandeko?" ³³ Enkaagha iyoiyo bhakaimoka kuringa Yerusalemu. Bhakanyoora iko nu naomwe bhaara bhasikaini hamwe, nabhaara bhare hamwe nabho, ³⁴ Bharaghamba, "Omonene aryokire. Maheene, ebhokeeye Simioni." ³⁵ Na igho yabhateebheri amang'ana ghano ghaabhaye konshora bharaghenda, bhonoa Yeesu yaiyorokeri koobho bhono yabhotoye omoghaate. ³⁶ Hano yaghambanga amang'ana ghayo Yeesu umwene yaaimereye ghateghate yaabho akabhateebhya omorembe ghobhe ko bheenyu. ³⁷ Ghasi mbobhohiri bhaka na irinyantereki igha bharooshe umwika. ³⁸ Yeesu akabhateebhya nkwake mosorombaye nkwake mukwiibhorya moshenkoro shenyu? ³⁹ Momahe amabhoko ghane na amaghoro ghaana igha nooni. Umweene munkunigwiki momahe, kobhora enkoro etana maghuha na nyama kyabhuyo mokomaha oni nenabhyo." ⁴⁰ Hano yamaare koghamba igho akabhaorokya amabhoko na amaghoro ghaye. ⁴¹ Hano waanyore bhashomeywe na okoroghora ukwanga ghukumya, Yeesu akabhateebya, Moona eghento kyonswe kyaokorya? ⁴² Bhakamohana ekekongoro ikya inswe ensaambe. ⁴³ Yeesu akakeghegha akarya mbele yabho. ⁴⁴ Akabhateebya, "Hano naare nabheenyu nabhateebheri igha ghano ghonswe ghang'orweng'orwe kuumighiro ghya Mosa na abharoti na amakora ngarabhe kwa nguru." ⁴⁵ Neho yabhareremooye obhong'aini bhatore komanya amandeko ghano bhaandekeeywe. ⁴⁶ Akabhateebya igha Kiristo narinyaanka kwa nguru na wiki naryooka urusiko rwa ghatato. ⁴⁷ Ukuhighama ebhebhe na ukwabherwa mberararekwe kubyaaro bhonswe kwanguru kusimirya kurwa Yerusalemu kurina ryaye. ⁴⁸ Bheenyu nabhaimeereri bha amang'ana ghano. ⁴⁹ Ighoro yenyu ndabharetera ekerang'aniyo kya tata kasi moghanye muukibhure hana nahano ariibhoha shinguru kukurwa ighoro. ⁵⁰ Neho Yeesu yabhatangatire ko bharongosha kuhika haang'i na Bethania. Akaghorokya amabhoko ghaye ighoro akabhasabhura. ⁵¹ Hano yaare kobhasabhuura yabhaye igha, akabhatigha akaghegwa kuya ighoro mwisaro. ⁵² Na hayo akamukumya na kwinga Yerusalemu ashomeeywe bhokong'u. ⁵³ Mbaghendereyi kobha mwisengero bharasabhuura Waryobha.