¹ Yesu yaroshe abhashasha abhame bharatoora sesadaka isyaabho murisandeko irya emongo. ² Akamaha numusino omwe omotobhu aratoora mo esadaka iyaaye amatongoro abhere. ³ Kuigho akabhateebhya igha, "Obhohene ndabhateebhya, umusino omothobhu ono arusiri insharu kokera abhande bhonse. ⁴ Bhano bhonswe mbarusiri kukurwa kubhyaru bheno bhanabhyo. Kubhuyo umusino omotobhu ono umwene arusiri bhyonse bheno yaare nabhyo." ⁵ Enkagha eno abhande bhashumasheraanga risengeero, kyabhono ryareenga rekonirwe namaghena amaiya na mairusyo akabhateebhya. ⁶ Amang'ana ghano ghonse mokomaha, shenkagha shirisha seno reghena retarilighara kighoro kuryende ghonse igho ngareteemorwa. ⁷ Kuigho bhakamobhorya umweghya ghayo ndohe gharebha? N-kemanyeryoke keno kiritorokeerya igha hang'e ghare okobha? ⁸ Yeesu akabhahonshora igha, "Mwangrre motakashakong'ainwa. Bharisha abhanto abhaaru kondokwa yane bharaghamba nini naenkagha yahikire motakabhasoraana. ⁹ Hano murighwa rihe na maghara nshoro agha abhamangaru, motakobhoha. Kobhono ghayo ghonswe nigha gheehoke tangata, numuhiko tighurisha bhongohe." ¹⁰ Gwiki akabhateebya, "Ikyaro nkiryemoka kwituna nikyaro ikyende nobhokama mburitana nobhokama bhonde. ¹¹ Mbherebhaho ibhirighiti ebhenene inshara namarooye mbelebha mubhyaro, mberebhaho ebheghwa bhyokoroghoorya nebhemanyeeryo bhyokobhohya kukurwa kighoro. ¹² Kasi ghayo ghonse ghare ghatara abha, mbare bhaghoota bhabhahire musinyumba isya esango iya abhayahudi nokobhabhoha musijeera, bharabhateesa, mbarebhahira kobhakama nabhatongi, kobhono morenge abhasorani bhane. ¹³ Hano morehanwa umweya ugwa ukunyimereera. ¹⁴ Kubhuyo mwamore mosenkoro syenyu motakaitegheera kobhono moraghambe kubhiina bhyenyu, ¹⁵ Kobhono nendabhahane amang'ana nobhong'aini, kora abhabhisa abheenyu bhataretora ukwanga hande okobhanyeera senkani he. ¹⁶ Murinyeerwa iniko nabhaibhori bhenyu, abhamura abheenyu, abhahiri abheenyu, nabhasani bheenyu mbarebhaita abhande. ¹⁷ Abhanto bhonse mbarebharegha kurina ryane. ¹⁸ Kuigho toroho heta rutukya romwe kometwe ghenyu rono rurisirahe. ¹⁹ Hano moreghomerrya homoretooribhwa munyoore obhohoru. ²⁰ Hano moremaha Yerusalemu enaribhwi nabhasirikare, momanyigha inkaagha iya okotemorwa ukwa Yerusalemu hang'eere. ²¹ Bhono hayo bhano urinyoora bharenge Yudea bhang'osere musinguku, na bhano urinyoora bharenge mumughi ghateghate bhatanorre na motakatigha bhano bharenge mukishisho bhasohe. ²² Siyo nsyo sinsiko sikisiyomba, nakuigho amang'ana ghonswe ghano ghandekirwe ghahekerane. ²³ Haaho abhakari bhano ulinyoora bharengenda na bhano urinyoora bharaghonkya kusinsiko siyo! Kobhono nerebhaho etaabhu enene kighoro yikyaro, na inyanko kobhanto bhano. ²⁴ Nambariitwa kokogheshwa na mbaregheghwa abhatomwa kubhyaro bhyonse, na Yerusalemu neretashwa nabhanto bhibhyaro, okohekeera ukwa enkagha iya abhanto bhayo ²⁵ Bherebhaho ebhemanyeeryo kuryobha, kumweri na kusinyonyoori. Nakukyaro nkorebhaho ninyanko na ehako kokoghera ukwa okoheera nokoghoghoha ukwa inyansha. ²⁶ Nkorebhaho abhnto ukushesheka kukobhoha, bharitenge'era ukunyoorwa na mang'ana amaghogho mukyaro, kokobha iryobha, umweri, na sinyonyori mbirisingisibhwa. ²⁷ Gwiki mbaremaha omono womonto arasha arenge momasaro ana singuru nemereengari ighya ubhuhika ubhurito. ²⁸ Hano ghayo ghonswe gharisimya mwimere, mwinyoki emetwe ghyenyu, kokobha ukutunguribhwa kwenyu kusughitaribhwi." ²⁹ Yeesu akabhateebhyakukutubhanhya, momahe omote, nemete ghyonswe. ³⁰ Hano gharusya amasebhokerak, murimahera abhene nokomanya igha emaaho hang'i erre. ³¹ Ighoigho hano mwamaha amang'ana ghayo gharasha momanye igha obhokama ubhwa Waryobha hang'ibhore. ³² Obhohene, ndabhateebhya, rikora reno terehete, okohekera ghayo ghonswe ghatarahekerana. ³³ Kighoro na ikyaaro mbereheta kasi amang'ana ghane teghare heta he. ³⁴ Kasi mwimahe abhene, senkoro syenyu setakasha kuritoherwa na obhoghogho, ubhunywi bhwa amarwa, na sinyanko syobhohoru. Kobhora urusiko ruyo ndorashe bhungu. ³⁵ Kyomotegho. Kobhora nerebha kighoro yakera omwe ono akomenya kubhusyo bhwaikyaro kyonswe. ³⁶ Kasi mwangarre enkagha yonswe mosabhe mobhe bhuya, kwibhasha ghayo ghonswe hano gharisha , nukwimeera kobhoronge bhomona wo monto." ³⁷ Kuigho enkagha yomobhaso yeghyanga mwisengero nubhutiko yarishokire kebhara, nukuya kwikara kunguku eno ekobherekerwa Mzeituni. ³⁸ Abhanto bhonswe bhakamweshera nyinkyo kukumwitegheera monse ya risengero.