¹ Amare Sauli akenderera kobhugha chahaho moroku kubhanafunzi bhi Iryobha haghire komkangati omokoro. ² Nasabhire cha nyarobha cha masengero iyo Damaski hayo ararubhona omoto uyo anchi monchera abhe mkari ama omosubhe abhabhohe no kubhareta Yerusalemu. ³ Na hano are morughendo ikabha hano egherire Damaski ribhagha isuhu ubhero bhukamoreka kurwa mwi Iryobha. ⁴ Akabha aghire hase na akogwa amaraka gharabhugha Sauli Sauli ndighi nokuha anyako ino. ⁵ Sauli akabhugha u niye wewe Bwana? Bwana akabhugha neni Yesu uno wanahire. ⁶ Amare nobhoke usohe momoghi na mchakokobhorera ghano ukwenda ukore. ⁷ Abhato bhano bhaghindire ne Sauli bhaghakira kiri bhakabha bharategherera amaraka amare bhataroche moto. ⁸ Sauli akabhoka hase na igwire amiso taroche eghighero bhakamgwata okubhoko bhakameta Dameski. ⁹ Ghuchasiko isato tare ararighi wa kunywa amanche. ¹⁰ Akabha anyiho umwanafunzi Dameski erina ryache Anania, Iryobha ndiaghambene nawe mmaroto Anania akabhugha numohereri hano nenyi Bwana. ¹¹ Iryobha rikabhugha bhoka ughende ribhera rya omoghi uno bhako obherekera Nyofu, na monyumba ya Yuda na obhori omoghi uno okobherekeru Tarso arabherekeru Sauli ghokubha akere arasabha. ¹² Na na moroche mmaroto omoto uno akobherekera Anania aghasoha na akamotorera amabhoko ighoro yache amenye korighi. ¹³ Amare Anania akabhugha Bwana neogwire amang'ana gho moto uno ku bhato abharu. Kwe ribhagha ryaru na arabhakorera amang'a amabhe abhatobwiru we ribhara riyo rya Yerusalemu. ¹⁴ Hano nanyi obhutemi kurwa momukangati omokoro agwate kira uyo akwibherekera erina ryacho. ¹⁵ Amare Iryobha rikamobhorera noghi ghokubha iye nekighero kino neghiseghire ikyane agheghe erina ryane ambere ya matongo na abhatemi na abhana bha Israeli. ¹⁶ Ghokubha nekubhereki ghano ghanyi amare ghano gha kwendera mbhone anyako morina ryane. ¹⁷ Anania akaghi aghasoha akamotorera amabhoko akabhugha omwito Sauli Bwana Yesu uno iyerekeri kwiye hano wane uracha na ntomire orighi na gwiki bagwichori Akoro Anthobwiru. ¹⁸ Ikabha bhegwire momiso ghache ebhighero byanga amaghoko na akarighi akimerera na akibhoro mara ya kabhere nakaraghera na akabhona changuru. ¹⁹ Aghikara hase hamwe na abhanafunzi iyo Dameski ghu chasiko charu. ²⁰ Ribhagha riyo nare arighamba erina rya Yesu nimasengero arabhabhorera uwe numwa wi Iryobha. ²¹ Na bhayo bhose bhogwire mbatangarire na bhakabhugha tanyi omoto uno are aranyaki abhato bhose bherekire erina rino hari Yerusalemu? na hano nichere gho kugwata abhato no kubhabhoha na akabhahira kubhakangati. ²² Amare Sauli nakorire kukora ring'ana riyo ri Iryobha bharebhibhiri na righakora abhayahudi bhano bhere Damaski bhachore na bhakamenya uno niwe Kristo. ²³ Hano chahetire chasiko charu abhayahudi bhakarwacha bhamwite. ²⁴ Amare ekina kyabho mbakimenyire bwango na Sauli mbamwikengire omwise na bhotiko mwegheseku iri bhamwite. ²⁵ Amare abhanafunzi bhache mbamgheghire obhotiko bhakamwiki kohetera momuryango na bhakamotora mwekehoncho. ²⁶ Na Sauli hano ahikire Yerusalemu nasaki kubhanafunzi, amare mbare bharamotina na bhatiseriri kubha wose numwanafunzi. ²⁷ Amare Barnaba akamwimoki na akamohira mo abhatobhiru na akabhabhore kya bhuno Sauli aroche Iryobha monchera na kyabhine, Iryobha ryaghambene nawe naa kyabhena Sauli are arabhugha ring'ana ko bhuhari kwe rina rya Yesu iyo Dameski. ²⁸ Aghatemerana nabho hano bhare bharasoha kurwa Yerusalemu akamba kobhuri korina rya Bwana Yesu. ²⁹ Bhakabhorani na abhayahudi wa kiyunani amare bhakasaki komwita. ³⁰ Hano abhahiri bhamenyire ring'ana rino bhakamghegha bhakamohura kaisaria na bhakamohira aghi Tarso. ³¹ Amasengero ghose gho Bhuyahudi, Galilaya na Samaria rikobha rihorerire bhakaryobhoke na bhakaghenda morubheho Iryobha na obhuchomu bwa akoro yobhatobwiru na amasengero gha ghakora na ghakera bhato. ³² Petro akacha hano are arinera mwe mughi akabharingiti abhisereri bhano bhahikera mo moghi wa Lida. ³³ Akamorighi omoto umwe erina ryache nare arabherekeru Ainea Yesu Kristo omoto uyo nare mobhorere imeaka enane nare abherire. ³⁴ Petro akamobhorera Ainea Yesu Kristo amuhori no bhoke ware obhorere bwacho ribhagha riyo akabhoka. ³⁵ Na bhato bhayo bhose bhano bhare bhari kara Lida na Sharoni hano bhamoroche omoto uyo bhaghisorori Iryobha. ³⁶ Nareho umwanafunzi Yafa na aribherekeru Tabhitha rino bhari menyire kama Dorcas, "Omukari uno nare ichwire emeremo emichomu ne ebhisegho bhyo rubhango akorire mubhahabhe. ³⁷ Ikabha orosiko ruyo akabharara aghakwa hano bhamwisabhiri bhakamotiri ighoro na bhakamohinderi. ³⁸ Ghokubha Lida yare aghuhe na Yafa na abhanafunzi bhakogwa Petro nare hayo bhakabhatoma abhato bhabhere akabhusasame bhache awabho bhata ghukechera. ³⁹ Petro akabhoka na akaghi hano ahikire mbha mnetire mwikyomba kighero na bhano bhose bhakwereru na abhasubhe bhose bhakimerera haghuhe yache bhakarera bhakamwereki koti na changibho chino Dorcas abhatumire hano bhare hase hamwe. ⁴⁰ Petro akabharusi bhose anchi ya nyumba aghatema amaru aghasabha akamara aghishorori omobhere akabhugha, "Tabitha nobhoke." Akaramoki amiso ghache hano amoroche Petro aghikara hase. ⁴¹ Petro akamha okubhoko kwache akamughegha ighoro hano abharekire abhisereri na bhano abhusubhe bhakure akabhaha nare muhoru. ⁴² Ring'ana rino mbarimenyire Yafa yose na abhato bharu bhaghisereri Iryobha. ⁴³ Ikabha Petro aghikara chasiko charu Yafa bhanyu no moto uno ahabherekeru Simon omkori wa amasero.