¹ Hangu, Agripa akamobhorera Paulo, "Mbakwisere ughambe, Niho Paulo akaghorora okubhoko kwache akaghamba hangu. ² Nekwirighi nenyi kobhuchomeru, Mtemi Agripa ibhere kukora ekina kyane ambere yacho rero ighoro yamang'acheru ghose gha Abhayahudi. ³ Mare kokubha iye mtaki onyi wa amesera gha Abhayahudi na amabhori. Hangu nekusabha untegherere ko kwikonyereri. ⁴ Mahene abhayahudi bhose mbeche kibhuno nikere kurwa obhobhureni bwane mwi tongo ryane iyo Yerusalemu. ⁵ Mbeche kurwera kutanga yenyi ighoro yabhe kwisereri kubha nikere kebhuno Omufarisayo risengero rino renyi no abhongeri bhuri kobhusengiri bwito. ⁶ Ribhere nyimerire hano kontenera ekina ko kubha eni nyaroche amaraghano ghano Waryobha akorire kubhatato bhito. ⁷ Rino ni riraghano rino amatongo ghito ikomi na abhere komwisegha kughegha kebhuno bhakomusengera Waryobha ko changuru obhotiko no omwise. Ni ko kubha ya amisegho ghayo, Omtemi Agripa, kubha Abhayahundi mbandekorire ekina. ⁸ Kwa ke uno wose ghate yinywe mokwituri ngukong'u kubha Waryobha naharyoki abhaku? ⁹ Ribhagha rimwe nyituriri ene mwene kubha nyangakorire ebhisegho bhyaru ighoro ko rina re Yesu wa Nazareti. ¹⁰ Nyakorire ghayo iyo Yerusalemu, Nyabhabhohire abhiserere bharu mraghereza, nyare kubha na obhotora kurwa ko abhakoro bha makohani kukora hang'u, na ribhagha bharitwe nyabhatemire akura ighoro yabho. ¹¹ Nyinga cheru nyabhatenire ekina mu masinagogi ghose na mbasakiri kukora kwenda kwanga obwisereri bwacho. Nyare kubha nikarere chwee ighoro yabho kubhahebha ko mchaka cho bhugheni. ¹² Ribhagha nyere kubha ndakora ghayo nyaghire Dameski nenyi na obhotora na amahamo kurwa komakuhani abhakoro. ¹³ Hano nyare mochera ribhagha ryomwise Omtemi narocho emirengari kurwa ighoro mumasaro ware mheri kokera Iryobha na kunanihi kotwinere eni na abhato bhano bhare mu sabwari hemwe na nane. ¹⁴ Itwe bhose hano twaghire hase nyogwire riraka riraghamba ki ryane rirabhugha ko kighambo ke kiebrania Sauli, Sauli, Neke neke okunyaki? Ngukongu kweye kutema omuseghere mchokoo. ¹⁵ Niho nikabhugha, iye niye we Omokoro? Omokoro akaghorokeri Eni neni Yesu uno akunyaki. ¹⁶ Ibhere bhoka wimerere ku amaghoro ghacho ko kubha yi kwenda rino eni yerochwe kwiye nikwahwire kubha amhoki na omutanani ighoro ye ebhesegho bhino weche koribha ryane eni ribhere ne ebhesegho nekucha kwereki ribhagha erende. ¹⁷ Na nekokotori kurwa ku bhato na abhato bha amatongo ghano nekokotoma. ¹⁸ Kuramoki amiso ghabho na kubha rusi ekirema kughi ku bwero kurwa ku changuru che omusari kumwerekora Waryobha mare bhabhoni kurwa ko Waryobha amabhera gha amasari na kughabha nibhahere bhari nyahwire ku kwenda kwane. ¹⁹ Hangu omtemi Agripa ntetorire kwanga amerekibwa gha mwisaro. ²⁰ Mare kubhari bhanyi Dameski obhumbere, na kumarera Yerusalemu na ase yose ye Yudea na hamwi ku bhato bha amatongo aghende nyaghambire ring'ana kubha bhakanga amabhe na kumwerekera Waryobha bhakore amakora ghano gherekire kwanga amabhe. ²¹ Ko kubha eriyo Abhayahudi bhakangwata hekaluni bhakenda konyita. ²² Waryobha nasakiri na ribhere ku ghayo nimerire na korighi ku bhato muhorichu na ku bhari abhakoro ighoro ye bhari bhanyi na abharoti na Musa mbabhughire mbakotoka ni tanyi bhonde. ²³ Kubha Kristo kochanguru nakunyakibwa na nakubha mtange wo kuroka kurwa ku abhaku na kughamba ubhwero bhwa Abhayahudi na abhato bha amatongo. ²⁴ Paulo hano kughamba, Festo akabhugha ku riraka ikoro, "Paulo iye mochuri anyi! Amaso ghacha ghakukorire ubhe mochuru. ²⁵ Mare Paulo akabhugha, eni ntenyi mochuru. Mose kwa Festo mare ko changuru nekughamba amang'ana gha maheni tu. ²⁶ Ko kubha mtemi nweche ku mang'ana ghayo na hangu nekughamba ku mweya wache, ko kubha nekumenya kubha ritanyiho rino rekobwiswa kumwene ko kubha rina ritakorire wre rubhecho. ²⁷ Mare nokobhisereri abharoti mtemi Agripa? Nyeche kubha nekwisereri. ²⁸ Agripa akamobhorera Paulo, "Ko ribhagha ighuhe nokotora konchinga eni nire Mkristo? ²⁹ Paulo akabhugha, nekomusabha Waryobha ko ribhagha ighuhe hamwe ire tanyi iyetu mare hamwe bhose bharo bhakunyagwa rero na niye kebhuno eni. Mare tanyi ino eminyororo ghe amagereza. ³⁰ Niho Omutemi imerire no omkerani na Bernike hamwe na bhari bhikere hamwe nabho. ³¹ Bhakabhoka mwibharacha mbaghambire abhene ku bhene bherabhugha, "Omoto uno tareng'ine no oroku hamwe ekibhohu. ³² Agripa akamobhorera Festo, omoto uno yangatorire kutachorwa atatenire kughi ambere ko Kaisari.