¹ Rebhere morekanisa ro Antiokia, mbhoreho amabhamwe bhabho bho abharoti nha abharekereri mbhare Barnaba, Simeoni(arabhikirwa Nigeri). Lukio wo Kirene, Manaeni(umwabho unaho atanyi wo masahe wo Herode umkangati wo mkoa), na Sauli. ² Hano bhare bhasengera Omokoro na gwetengu kurangera, Akoro Antobhihu ikabhagha mnyahorore Barnaba nha Sauli, mubhatore rosicho, bhakore emeremo ghino nhebhabherere. ³ Akumsa yahakumara gwetenga kuraghera nha ghusabha, nha ghotora amabhoko ghabho ighoro ye emetwe ghwabhato bhayo, bhakabhatigha bhaghende. ⁴ Kughayo Barnaba bhanyi nha Sauli mbhaye sokere Akoro amabhehu nha mbhahengetire kwerekera Seleuka; Kurwa hayo mbaghendire munyancha kwerekere mweghenga rya Kipro. ⁵ Hano bhare mukyaro kya Salami, mbhaghambire ghochanguru ang'ana ya Gitemi mcha nyumba cha bhayahudi choghusengira Gitemi. Ghweke mbhore hamwe nha Yohana, Marko bhanyi kyabhuno abhasakeri bhabho. ⁶ Hano bhaghere mwighenga ryose kuheka Pafo, bhakabhona omoto umwi moturutumbi, Myahudi omroti wo bhorongo, unho are arabherekerwa Bar Yesu. ⁷ Omoturutumbhe uyo mghendi wa omutemi Sergio Paulus, unho are omoto wa mahebho amamangi. Omoto uyo nabharagheni Barnaba bhanyi nha Sauli ghukubha nendire kumgherera anga ya Gitemi. ⁸ Mare Elema"Omoturutumbe uri" (hang'u riyo niryo erina ryache rekubherwa) nabhako eheruko ehere, arasaki kumugharora omutemi uyo orwe mobhweserere. ⁹ Mare Sauli unho are ebherekerwa Paulo are echerwe nha Akoro Antobhihu, akamumoghorera, ¹⁰ nha akabhugha iye umwana wa risambwa, wichwe we nha obhukanakana bhose no obherere iye no amabhesa wo bhurenyerere bhose. Tughutukuna kuchegharora chanjira cha Omokoro, chino chemere, mare noghotora? ¹¹ "Rebhere rora, okubhoko komokoro nkonyi ighoro yacho, nha nokubha mohuku. Tukoririghi Iryobha koribhagha" rughendo rumwi eghetu nhe ekirema bhikaghwo ighoro ya Elimas akasimikwenera hayo arasabha abhato bhamkangati ghakomwaghata okubhoko. ¹² Hano omotemi aroche kiyo kwabhonekire aghusereri ghokubha narauchere ameghi kubha ghomokoro. ¹³ Rebhere Paulo nha bhasani bhache mbhaghendere mmanche kurwa Pafo bhakahika Perge mo Pamfilia. Mare Yohana nabhatighire nha akagharoka Yerusalemu. ¹⁴ Paulo nha msani wache mbhaghendere kurwa Perge nha bhakaheka Antiokia ya Pisidia. Hare mbhaghire moresinagogi(monyumba yo ghusabhera orosiho rwasabhato nha ghwekora hase). ¹⁵ Hano anare ghusoma imeghiro nha abharati, abhakangati bha sinagogi akabhatomera obhotumu bhabhugha, "Bha umwito akibha monyi nobhotumu bhokubhasesi abhato hana mobhughi" ¹⁶ Kughayo Paulo akemerera nha kubha ghughera okubhoko; akabhugha, "Abhosubhe bha Israeli nha ninywe bhano mmosokere Getimi, mtegherere. ¹⁷ Gitemi wa bhano abhato bha Israeli nha bhahware bhatata bheto nha akabhakoro abhato bharu hano bhukere mase ya misri, nha ghokubhoko kwache kuherebhu nabhakangatire anchi yache. ¹⁸ Ku miaka mirongo ene nabhikonyirere mwebhara iryomo. ¹⁹ Irano amare kughasare matongo mohungate mose ya bha Kanaani, nabhahere abhato bhito ase yabho kubha ubhughabhe. ²⁰ Hano akumara ghayo ghose ngabhombere kumiaka maghara anne nha mirongo etano koheta. Hano akumara ebheghero bhiyo bhyese, gitemi nabhahere abhatuni kohekera Samweli omoroti. ²¹ Aremara hayo abhato mbhasabhire bhabhere omtemi, hayo Gitemi nabhahere Sauli umwana wa kishi, omoto wo ekeheta kya Benjamini, kubha omotemi kumiaka mirongo enne. ²² Hano Gitemi amare komorusi bho bhutemi, na motore Daudi kubha omotimi Gitemi nabhughere, "Nembere Daudi umwana wa Yesu ghokubha nomoto unho akoro yanhe ichomirwe nawe; unho aghukora ekighoro kinho nseghire. ²³ Kwerwera mokeheta kyo moto uyo Gitemi na eretere Israeli omoto Yesu, kyabhuno araghire ghukora. ²⁴ Iyo yatangire kubhoneka ambere ya Yesu kucha, Yohana natangatire kughamba ghochanguru obhatizo bhobhusengori mubhato bhose bha Israeli. ²⁵ Nawe Yohana hano are aramara emeremo ghya nobhughire, "Mokoniture kubha enhe ne wewe? Ene ntenyi uru. Mare mtegherere, mno akucha anyuma yane, nughwisi kuru ntekumasa kuru kwehenya nha ghusasora ebhikwera moghoro ghache. ²⁶ Bhaowito, abhana bha ahamoto ya Ibrahimu, nha Bhuri ghate yanyu mokomsengera Gitemi, nkoghini yetwe otomi bhweno bho bhotori bhotomirwe. ²⁷ Kubhare bhano bhakere Yerusalemu, nha bhakangate bhabho, tamwahokeri chwee, nha ghweki bhatabhweheheri obhotomi bhwa are abharoti gho koghotemera ekina kyo orukorwa Yesu. ²⁸ Nanghabha bhatabhwene ino ghere bhunchomu moroku rwache, mbhasubhere Pilato amwete. ²⁹ Hano bhamare amang'ana ghose gharendekeru kwawe, mbhamwekire kurwa momote bhakamrare mombhehera. ³⁰ Mare Gitemi anaryokeri kurwa mubhaku. ³¹ Akarorwa ghochasiku charu kubhari bhaghire nawe hamwe kurwa Galilaya kwerekira Yerusalemu. Abhato bhayo mbhere nibho abhakachore bhabhato. ³² Kughayo tubharetere amang'ana amachomo kubha amaraghano ghano bhahabhuru bhasokoro bhitwe. ³³ Gitemi natore maraghano ghayo kwitwe, abhana bhabho, koriyo namayokiri Yesu nha kumgharoki ghwiki mobhuro. Riyo nghwiki ndyandekerwa musabhuri ya kobhere: Eye no mwanawanhe, rerombhere isso wacho. ³⁴ Ghwe kubha ubhere kubha namryokiri kurwa mubhaku ghukubha omobhere wache utasareka, naghambhere hang'u: Nughukuha agongo no urabhango chanchenere cha Daudi. ³⁵ Iyo niyo ighere kughamba ghwike mozabuni toghotora komwesereri umtobhihu wache kuregha obhubhoro. ³⁶ Ghokubha hano Daudi amare kuhokeri amigha gha Gitemi musegha yache akamisi, bhakanarari sohe hamwe nha bhese, nha maroche obhosereku. ³⁷ Mare uno aryokibhwe nha Gitemi toroche usarako." ³⁸ Kughayo imenywe kwenywe bhawo mwito, kohetera omoto uyo kwabhera kumabhe wo mabhe nughamberwe. ³⁹ Kwawe uno wose aghwesereri nakubharera obheghene nha mang'ana ghose ghemighero ghwa Musa ghirangabha bhonere mbherengere. ⁴⁰ Mbhehe rebhere mubhe miso kubha akigho kino bhakeghambire abharoti ghitabhoneka kwenywe. ⁴¹ Moreghi enywe bhano mokutaraha nha mkura ucha nha ghoserekerera, ghukubha neghukora emeremo mchasiko chanyu, emeremo ghino mtaghotoro koghesereri, kuru omoto ang'abhabhorera. ⁴² Ribhagha Paulo na Barnaba bhacha kurwaho, abhato bhakabha sabha bhambhe amang'a ghayo urosiku rwa sabato inho ekucha. ⁴³ Ribha eghikoro kya sinagogi kyamara ghusira, Abhayahudi nha obharoribhwa henehene ribhabhatumbene Paulo bhanyi nha Barnaba bhakambhana nhabho bhakabhakurumereri bhakoryeremu Gitemi Waryobha. ⁴⁴ Rikang'a rino ryarubhere nanga orubheri rosa ndwasangere, ndwiehere ghutegherera ang'ana ya Gitemi Waryobha. ⁴⁵ Abhayahudi hano bharoche rikinda, bhaghichorwa nha rihari nha kughamba amang'ana ghoghusari ebheghero bwengamberwe na Paulo na bhakomotoka. ⁴⁶ Mare Paulo nha Barnaba mbhaghambhere ko ghesubhe subhe nha kobhugha," yamati kubha angano ya Gitemi Waryobha ighambherwa singa kwinywe. Ghukubha mokumsangirira kure kurwa kwenywe na kwereghe kubha mtakwenderu obhuhuru bhwa irare, mkabhahe ntokwegharore amatongo. ⁴⁷ Kya abhono o mutemi aturaghereri arabhugha, 'Nebhatorire enywe kubha o murengari ku bhato bha matongo. Kubha mrete obhotori ka mabhara ghose ghase." ⁴⁸ Matongo bhachakoghwa rino, bhagha chomeru nha korekumu ring'ana rwo o mutemi. Abharu bhahurwe ko abhuru bhwa irore mbhesereri. ⁴⁹ Ang'ana yo omutemi omokoro yasoghire ase yose. ⁵⁰ Mare Abhayahudi mbhobhotemeri bhano bhirusiri nha abhakori abhotondoroku hamwe nha abhakangati bho moghi. Ghayo ngeghireri anyako ya Paulo na Barnaba na bhakabhorekera anchi yo moghi. ⁵¹ Mare Paulo bhanyi na Barnaba mbha kongotire orotu mumaghoro ghabho. Akumara mbhaghere mo moghi wo Ikonia. ⁵² Na Abhanabhegha mbhachomerwe chwee na Akoro Anthobhihu.