¹ Kimwi omujuma wa katano nabhuma ritarumbeta ryaye. Narorere injota kusoka murwire inuyariga eguye ku kyaro. Injota yariga ino rufunguro rwe ekyobho kinu ekigenda muryobho rinu ritari na bhutero. ² Eguye ekyebho kinu kitari na bhutero na ingesi nirinya iguru kwa isafu okusoka musiye ekyebho, rwa ingesi inu eisoka mwitanuru rinene. Omumwi no rwire mbiinduka mbhibha kisute ku songa ya ingesi inu yasokaga mukyobho. ³ Musi ya ingesi gimige gyasokeremo ngija iguru ku kyaro, one mbayanwa amanaga rwa aga inge iguru ye ekyaro. ⁴ Mbabhwirwa bhasige okunyamura amanyasi ku kyaro noro omumea gyone gyone ogwa kijani noro eti, tariira abhanu bhanu bhatari na rubhano rwa Nyamuwanga ku bhisusu bhyebhwe. ⁵ Bhatayaywe ekibhari ekyo kubheta abhanu bhayo nawe bhabhanyashe era ku mwanya gwa amesi gatano. Obhusungu bhwebhwe bhwariga bhuri rwo omunu okurumwa na inge. ⁶ Ku siiku giyo abhanu abhajo okwagora orufu, nawe bhatakurubhona. Abhajo kubha no obhwera bho kufwa. Nawe orufu orujo okubhabhirima. ⁷ Ginzige gyasusanaga na gifaransi ginu gyariga gyauriwa ku bhita. Ku mitwe gyebhwe kyariga kiriko ekinu rwa itaji ya injaabhu na gisura gyebhwe gyariga ngisusuna rwo omwana wo munu. ⁸ Bhariga bhari na gifwiri rwe gya abhagasi na Ameno gebhwe gariga gari rwa aga indwi. ⁹ Bhariga bhari ne ebhifubha rwe ebhifubha bhye ebhisisira. Na isauti ya amabhabha gebhwe yaiga iri rwa isauti ya gimotoka nyafu egye ebhita na gifaransi ginu egibhirima okuja ku bhita. ¹⁰ Bhariga bhari ne emikira ginu gyarumaga rwa ginge. Ku mikira gyebhwe gyariga gina amanaga ago okudhuru abhanu ku mesi gatano. ¹¹ Bhariga bhanage rwo omukama iguru yebhwe omujuma we ekyebho kinu kitari na bhutero. Risina ryaye kiebrania na Abadoni, ku kiyunani ana risina Apolioni. ¹² Ago kwamba gatura ringira! baada ya rinu gariwo amabhibhi gabhiri agaja. ¹³ Omujuma wa sita abhumire ritarumbeta ryaye na ninungwa isauti nisoka kumbari ya amadhabhau ga injaabhu inu iri imbele ya Nyamuwanga. ¹⁴ Isauti nimubhwira omujuma wa sita unu ariga ari na ritarumbeta, "Bhayatire abhajuma bhana bhanu bhabhoyerelwe ku ruji runene Efrata. ¹⁵ Abhajima bharya bhana bhariga bhauriwe ku mwanyago, ku rusuku ruyo ku kwesi kuyo na ku mwaka guyo, bhabhayatiye bhabhete abhanu theluthi. ¹⁶ Riesabhu rya abhasirikare bhanu bhariga bhuri iguru ya gifaransi yariga iri 2,000,000,000. Nonguwe riesabhu ryebhwe. ¹⁷ Kutya kokutyo narorere gifaransi ku mburinu yani na ku bhanu bharinyire iguru yebhwe. Ebhifubha bhyebhwe bhyariga bhiri bhikangaru rwo omuriro. Iburuu inu iiye na injano inu iitaiye. Emitwe gya gifaransi gyariga ngususana ne mitwe gya indwi, na mukanwe yebhwe gwasokagamo omuriro, ingesi na Salfa. ¹⁸ Theluthi ya abhana bho omunu bhafuwe ku mapigo gasatu, omuriro, ingesi, na salfa inu yariga nisoka mukanwa yebhwe. Kwo kubha amanaga ga gifaransi gariga gari ku minwa gyebhwe na ku mikira gyebhwe ¹⁹ kwo kubha emikira gyebhwe gyariga giri rwe ebhisoro, na bhariga bhane emitwe ginu bhatumiaga okubhakorera amajeraa abhana bha abhanu. ²⁰ Abhanu bhanu bhasigaye bhanu bhatafuwe na amapigo ganu, bhate sasamire amatendo gyebhwe ganu bhariga mbakora, noro kusiga okwinamira ebhiwi na emiungu gya injaabhu, gipirya, shaba amagina na amati ebhinu bhinu bhitakutura kurora, okungwa noro kuribhata. ²¹ Noro kusasamira obhwiti bhwebhwe , obhusherati bhwebhwe noro njira gyebhwe egyo bhwifi.