¹ Nkyaari nindora malaika oundi omukuru neeka ansi okusoka murwire, ariga abhoyerwe kumere, obhukoma bhwa ingubha bhwariga bhuri iguru ya omtwe gwaye. Obhusu bhwaye bhwariga bhuri rwa risubha na amaguru gaye galiga gari rwa ingujo yo mururo. ² Agwatirie egombo etoto mkubhoko kwaye linu ryariga lifundukuwe, omwene atuye okuguru kwaye okwebhuryo iguru ya inyanja na okuguru kwaye okwebhumosi iguru wekyaro ekyumu. ³ Kimwi namwaya kwobhuraka bhwa iguru rwa indwi kutyo eing'ona, akabhaga kanu amwayaga kwa obhuraka ginkubha mungati ngirunduma. ⁴ Akabhaga nkubha mungati ngirunduma nariga ninfogera okukaama, nawe, nonguwe obhuraka okusoka murwire niyaika, "Bhika ibhe mbisike ganu ginkubha mungati gyaika. Siga kukaama. ⁵ Kimwi malaika unu nalorere ayambaye iguru ya inyanja na kyaro ekyumu, emusishe okubhoko kwaye iguru murwire. ⁶ Naraira kuunu karama kajanende na kajanende, unu abhumbire orwire na bhyone bhinu bhirimo, ekyaro na bhyone bhinu bhirimo na inyanja nabhyone bhinu bhirimo. Kutakubhao kukora kweki. ⁷ Woori orusuku ruyo akabhaga kanu malaika wa mungati alifogera okubhuma itarumbeta yaye, niwe imbisike ya Nyamuwanga ilibha ikumisibhwe, rwakutyo arasishe kubhajuma bhaye abharagi. ⁸ Obhuraka bhunu nonguwe okusoka murwire kweki niimbwira; Genda gega ligombo litoto linu lifundukuwe linu libheye mkubhoko kwa malaika unu ayambaye iguru wa inyanja na iguru wekyaro ekyumu. ⁹ Kimwi ingenda kumalaika nimubhwira anane ligombo litoto. Ambwiriye gega ligombo litoto ulye. Elikora inda yawo ibhe na obhururu, nawe mkanwa wao elibha ejomu rwa obhuki. ¹⁰ Nagegere ligombo litoto okusoka mkubhoko kwa malaika nindilya. Lyariga libheye ejomu rwa obhuki mkanwa wani. Nejire narya inda yani yabheye na obhururu. ¹¹ Kimwi bhuriwo obhuraka bhwa mbwiriye, "Uwendwa ukure obhuragi kweki kubhanu bhafu, ebhyaro, na abhatungi.