¹ Hanu gayo gahwa Yesu akaeemuka, akabha arahita mumigi na mubhijiji yaringa arararikira abhantu ering'ana erijomu eguru ya obhukama bhwa Waryubha mbara gonsego yaaringa arasoorana abhatumwa bhaaye ekumi na bhabhiri. ² Kweki, yaagyanga na bhakari abhandi. Gati yabho Yesu yaaringa abharusirye abhihwa ebhibhibhi abandi yaaringa abhahwa nerye amarweri mubhakari bhayo, yaringa mo Mariamu Magdalena, unu Yesu yaringa arusirye ebhihwi muhungati ebhi bhibhi. ³ Kweki yaaringa mo Yohana, na muka kuja uyo ng'o yaringa amwimiriri omukuru wa emirimu gya omakama Herode. Kweki, yaaringa mo Susana, na abhakari abhandi abharu, bhanu bhaaringa bhara bhasake rya Yesu na abheehigira bhaaye, kwa okuruusya ebhintu bhyabho abheene. ⁴ Orusiku rumwi abhantu abhaaru okurwa mumigi mraamu bhakamujira Yesu bhakakumanya omuganda omunene. Kimwi Yesu akabhakeerya ekirengyo ega. ⁵ Yaaringa ho omubhusuri umwi omubhusuri uyo yaangya okubhusura egimbusuro mumugunda gwaye. Hanu yabhasuranga egimbusuro egindi gikagwira kunjira. Abhantu bhakagitaja na ebhinyonyi bhikaaja bhikagirya. ⁶ Egindi gikagwira mumagina. Hanu gyaamera gikabhurwa amanji gikooma. ⁷ Egindi gikagwira gati ya emiti gya amahwa. Hanu egimbuuro giyo gyaamera amahwa gakahiga egimbururo giyo kwa ego gitaakiga. ⁸ Egindi gikagwira ku riirobha erijomu gikamera na gikaama bhukong'u gikeeyongerya egana okukira ginu yaaringa abhuswiri Yesu hanu yaamara okugamba gayo akagamba kwa eriisi ega unu yaana amatwi yeegwe. ⁹ Abheetigira bha Yesu bhakamumburya ega. Ekirengya kiro ensonga yaaye niki. ¹⁰ Wonse akabha kyukya ega. Akare amang'ana ga obhukama bhwa Waryubha gaaringa geebhisiri. Nyakara bheenyu Waryubha abhahubhiri amang'ana gayo naho mugamanyi. Nawe abhandi oranyoora ndabhakeerya kwa ebhirengyo naho bharaamaahe bhatarora na bhareegwe bhatamanya ¹¹ Mbe ensonga ya ekirengyo kiyo ni ega egimbururo meging'ana rya Waryubha. ¹² Na egimbusuru ginu gyaagwirankunjira girahunkana kya abhantu bhanu bhareegwa ering'ana rya Waryubha hayo hayo erisambwa riraaja rirariruusya mumitima gyabho bhataja okurikirirya naho bhatuuribhwe. ¹³ Na egimbusuro ginu gyaagwira mumagina girahunkararya abhantu bhanu bhareegwa ering'ana rya Waryubha bhararikirya kwa obhujomerwa bhararikirirya kwa eribhaga ekego. Nawe hanu bharasakibhwa na erisambwa bhararitiga bhahunkeni kya emiti ginu gikyari okumera emiri. ¹⁴ Na egimbusuro ginu gyaagira mumaahwa girahunkana kya abhantu bhanu bhareegwa ering'ana rya Waryubha nawe bharanyankira obhuhoru bhwabho na orunamba rwa obhwami na okwijomya kubhuhoru bhwabho. Gayo ngo garakora eimani yaabho eetakuruuusya ga obhuheene. ¹⁵ Na egimbusuro ginu gyaagwira mu riirobha erijomu girahunkana kya abhantu bhanu bhareegwa ering'ana rya Waryubha bharaarigwata kwa omutima gwa heene na kwa egintungwa eribhaga ryonsego. ¹⁶ Atariho omuntu aragwatya ekorobhoi kimwi aikuendikirye na eridebhe kasi aituure mwirungu rya obhuriri. Araituura kukisuunga naho abhantu bhanu bharasoha munyumba bharore obhurabhu. ¹⁷ Ego ego amang'ana gonsego ganu geebhisiri garituurwa kubhurabhu. Na gonsego ganu garakorerwa ekiini garitubhuka. ¹⁸ Ego ganu mureegwa mugeetegerere bhujomu omuntu unu aragwata ganu areegwa Waryubha arimutubhurira kora agandi. Nawe unu atakwigwa amang'ana gayo mbe uyo ariruribhwa kora obhung'eni bhunu arakanya ega yaanabho. ¹⁹ Eribhaga erindi ng'ina waabho Yesu na abhahiiri bhaaye bhakaaja okumurora. Nawe bhatamuhikIirira kwa okubha abhantu abhaaru bhaariga bhamuihundiriri. ²⁰ Abhantu abhandi bhakamukeerya Yesu ega ng'ina weenyu na abhahiiri bhaaho bharingi kibhara bhareenda okukurora. ²¹ Yesu akabhakyukya ega maari na abhahiiri bhaani mubhonsego bhanu bhareegwa ering'ana rya Waryubha na okurigwata. ²² Orusuku rumwi Yeesu akariina mubhwato hamwi na abheehigira bhaare. Akabhakerya ega twambuke enyanja tugye ng'ambo. Mbe bhakeemuka. ²³ Hanu bhambukaga Yesu akaraara akeehiriibhwa omuyaga omuhaari gukahuuta kunyanja obhwato bhwabho bhukaamba okwijura amanji bhakabha kung'anga ya okusika. ²⁴ Abheehigira bhayo bhakagya bhwangu okumubhurukya enu bharatema ekituri ega omusukwe wetu omusuka wetu turasika kimwi akabhuka akagukemera omuyaga n amabhoka rumwi ego bhikatenda. ²⁵ Mbe akabhabhwurya eya eimani yeenyu eringiha bhakaruguura na okwobhoha bhukangu. Bhakabhuuranya ega unu arakemerea kora omuyaga omuhaari na amabhoka rumwi ego bhiramwigwa mumuntu wa egaki. ²⁶ Yesu na abheehigira bhaaye hanu bhambuka enyanja ya Galilaya bhakahikirira ku kyaro kya Gerasi ng'ambo ya kubhiri ya ekyaro kya Galilaya. ²⁷ Yesu hanu yeeka okurwa mubhwato akasikana na omuntu umwi wa mumugi gurya unu yaaringa na ebhihwi ebhibhibhi. Kwa eribhaga eritambi omuntu uyo ateebhohanga emyenda kweki ateekaranga iika naho yeekaranga mugimbiihira. ²⁸ Ebhihwi ebhibhibhi bhiyo bhyaamusohereranga kaaru. Abhantu bhaasakyanga okumwangarira kwa okumubhoha na eminyororo na ebhirangani nawe yaaringa arabhutura eminyororo arakenya okugya kukibhara. ²⁹ Mbe Yesu akabhikemera ebhihwi bhiyo ega mumuhatire omuntu uyo hanu yaatangirirenya na Yesu akakuura kwa eriisi. Akeeyesa bhwibhumbike embere ya Yesu akamukeerya kwa eriisi ega uuwe Yesu omwana wa Waryubha wa eguru ya bhonsego ujiri okunyankya ndakusabha otanyankya. ³⁰ Yesu akamubhurya ega eriina ryaho muwe wi akagamba ega eriini ryani nani jeshi. Yaagamba ego kwa okubha yaaringa asoheerwe na ebhihwi ebhyaru bhukong'u. ³¹ Ebhihwi bhiyo bhikaamba okumwisasama Yesu ega otige okuhikenya tugye okusoha mukibhohe kya amasambwa. ³² Mbe hang'i hayo mbarika y enkuru ryaaringaho eriihijo rya egingurubhe girarisya. Kimwi ebhihwi bhiyo bhikamusasaama Yesu ega twikirirye tugende okusoherera egingurubhe giyo Yesu akeekirirya. ³³ Hanu bhyamuhatira omuntu uyo bhikagya bhikasoheerera egingurubhe giyo. Niigo bhyagisoheerera ego eriihijo ryonsego rikeeririmuka gikakeenya okurwa kunkuku gikaagya gikatubhira munyanja gikakwa chwe. ³⁴ Mbe abharirisya bha egingurubhe giyo hanu bhahaarira ganu gatukiri bhakakenya bhakagya mumugi na mubhijiji okurarika ganu bharuuji. ³⁵ Abhantu bhakagya okwimahira abheene amang'ana ganu gatukiri bhakamuhikirira Yesu. Hanu bhamuhikirira bhakarora omuntu unu ebhihwi ebhibhibhi bhyaaringa bhimurwiriko yeekeri hang'i na Yesu yeebhuheri emrenda yaaringa ahweneri; Abhantu bhayo bhakoobhoha. ³⁶ Bhakatonderwa kya ego omuntu uyo ahweniibhwe. ³⁷ Abhantu bhonsego ku kyaro kya Gerasi bhanu bhaaringa bheekumenye hayo bhakamusabha Yesu arwe ku kyaro kyabho kwa okubha bhaaringa bhoobhoheri bhukong'u kwa ego akariina mubhwato naho yeemuke okurwa hayo. ³⁸ Omuntu unu yaaringa arusibhwe ebhihwi akakomererya Yesu ega tugende bhonsego nawe Yesu akanga akamukeerye ega. ³⁹ Hinda iika okeerya abhantu ganu Waryubha akukoreeri. Nho omuntu uyo akareka hayo akagenda araraarika mbara gyonsego gya mumugi ganu Yesu amukoreeri. ⁴⁰ Yesu hanu yaahinda akagenibhwa na omugande gwa abhantu bhanu bhaaringa bharamugamjirira. ⁴¹ Hayo akaajaho omuntu umwi yaabhirikirwanga Yairo. Yairo uyo ng'o yaaringa omukuru wa erisinagogi. Akatema ebhiru embere ya Yesu akamukomererya ega; Nju iika waani. ⁴² Kwa okubha omuhara waani omumwemwe wa emyaka ekumi na ebhiri asiingiri. Yesu hanu yaaringa aragya iika waaye omuganda gwa abhantu gukagya, hamwi nawe bhakabha bharamwihundirira bhukong'u. ⁴³ Gati ya abhantu bhayo yaaringa ho omukori yaaringa na obhureegu kwa eribhaga rya emyaka ekumi na ebhiri. Yaaringa amariri ebhintu bhyaye bhyonsego ku bhakumu nawe ataaringa ho kora oumwi unu yaatura okumuhwenya. ⁴⁴ Mbe omukari uyo akaaja anyuma ya Yesu akakunya eripindo rya omwenda gwaye. Rumwi ego akahwena. ⁴⁵ Yesu kabhuura omuganda guyo ega niwi yankunirye abhantu bhonsego hanu bhahakaana Petro akamukeerya ega omusuukwa wetu mubhantu abhaaru bhanu bhakwisinguriri na okukwihundirira. ⁴⁶ Nawe Yesu akagamba ega mumanyiri ariho omuntu unu yankunirye kwa okubha ndeigwa nhwenerye omuntu kwa eginguru gyani. ⁴⁷ Omukari uyo hanu yaarora ega atakutura okwibhisa akamujira Yesu ararigita. Akatema ebhiru akamukeerya embere ya abhantu bhayo bhunsego, ekisigo kya okumukuri na kya ego yaahwenibhwa. ⁴⁸ Yesu akamukeerya ega uuwe omuhara otuuribhwe kwa okubha unyikirirye ogende na omurembe. ⁴⁹ Hanu Yesu yaaringa akyahaira akaaja umuntu umwi okurwa iika wa omukuru uyo w erisonagogi akamukeerya ega omuhara naaho guhweri mo otamunyakya kweki omwihigirya. ⁵⁰ Yesu hanu yeegwa amang'ana gayo akakeerya Yairo ega otoobhoha obhe na eimani na omuhara waaho arahwena . ⁵¹ Yesu hanu yaahika iika wa Yairo akakariya abhantu abhandi okusoh hamwi nawe munyumba akabheekirirya Petro, Yohana, Yakobo, ese wabho na ng'ina waabho omuhara uyo. ⁵² Abhantu bhonsego iika hayo bhaaringa bharakuura na okwaraama oruku rwa omuhara uyo. Nawe Yesu akabhakeerya ega mutige okukuura unu atakwiri yeehiriibhwe. ⁵³ Nawe abhantu bhayo bhakaamba okumuseka kwa okubha abhaaringa bhamanyiri ega yaaringa amariri okukwa. ⁵⁴ Yesu akamugwata okubhoko akamubhirikira muhara hyuka. ⁵⁵ Rumwi ego omooyo gukaja mo akemirira. Yesu akabhakeerya ega mumuhaane ebhyakurya. ⁵⁶ Abheebhuri bhaaye hanu bhaarora gayo bhakaruguura bhukong'u. Yesu akabhakariya ega bhatakakeerya omuntu uyo wonsego ganu gatukiri.