¹ Sapailah datn nok suborank sungi, nok daerah nyo-nyo Gadara. ² Tika Yesus monok sok ohut, samah copat nyo sok kuburan dik rasukan minu najis depit Yesus. ³ Diapm tinggal nok wah kubur-kuburan. kai biatn nyo dik sanggup ngisiatnya gik, bahkan samah rantai. ⁴ Sebab, diapm gik anal ngisiat samah belenggu kojok ngant rantai, tapi diapm mutuskan rantainya ngant makas belenggunya. kai biatn nyo pun dik cukup kuat ngadok butunuknya. ⁵ Tiap hanu ngant ngehupm, diapm makas nok kuburan ngant nok dohik-dohik ngant nyohok diapm dediap samah botuh. ⁶ Tika nyo hant honong Yesus sok ojuk nok, diapm sukoduh ngant busujud nok jowi Yesus. ⁷ Lalu, samial makas samah caho doeh diapm nyonok, ''Oniah urusan antara kuk samah muk, Yesus, nak punopo dik mahatinggi? Kuk mohon nganu-Muk demi Punopo, kai nyiksakuk!'' ⁸ Sebab, Yesus jeh nyonok nganunya ''Kuluarlah sok nyo hant, hai minu najis!'' ⁹ Lalu, Yesus nyonok nganu nyo hant, ''Osiah Odatn muk?'' Ngant, diapm jawab, ''Odatn kuk Legion karna mik obeh.'' ¹⁰ Diapm bukali-kali mohon nganu Yesus supaya kai ngosar datn sok daerah hant ¹¹ Nok nyih biatn kayau doi lek gik duak nok somak dohik. ¹² Lalu, minu-minu bek hant mohon nganu Yesus, samah nyonok, ''Sanoklah mik nganu lek-lek hant hingga mik nomok koni wahnya.'' ¹³ Yesus ngabulkannya. karna hant, minu-minu najis hant obu ngant namok lek-lek. kayau dik kudulah kira-kira du hibu hant obu koni tobink pahonk sapai koni sungi, lalu milip nok wah sungi. ¹⁴ Kumudian, pujaga-pujaga lek hant obu tediapm ngant nyonoknya koni kota ngant koni opuak. Ngant, nyo-nyo kuluar samah honong oniah dik jeh tujodi. ¹⁵ Lalu, nyo-nyo hant monik nganu Yesus ngant honong diapm dik jui kerasukan minu bek, dik puk legion, gik guhuk, ngant jeh bubojuh, ngant diapm jeh kembali waras. Ngant, datn pun jodi golak. ¹⁶ Lalu, datn dik saksi kejadian hant, cihito hant nganu nyo-nyo makiah hal hant jodi nganu nyo dik kerasukan minu bek ngant tentang lek-lek hant. ¹⁷ Karna hant, nyo-nyo mulai mitok Yesus samah togatn daerah datn. ¹⁸ Kumudian, pada onu Yesus samah simak koni ohut, nyo dik hant kerasukan minu bek hant mohon supaya diapm lua busamah Yesus. ¹⁹ Namun, Yesus kai ngizinkannya, laink nyonok nganunya, ''Mohiklah nganu balo posikmuk. cihito lah nganu datn sumua hal dik jeh Tuhan lakukan nganu muk ngant bahwa Tuhan bubolas kasihan nganumuk.'' ²⁰ Lalu, nyo hant obu ngant mulai bucihito nganu nyo-nyo nok Deka_polis tentang sumua hal dik jeh Yesus lakukan nganunya. Ngant, sumua nyo jodi heran. ²¹ Tika Yesus nyebrang gik samah ohut koni suborang, nyo obeh bupulua nok somak-Nya, ngant Diapm biatn nok sonik sungi. ²² Lalu, nyo pemimpin sinagoge dik bunama Yairus monik ngant setelah honong Yesus, diapm busujud nok kojok-Nya. Ngant, diapm mohon ²³ samah sungguh nganu Yesus, kuatnnya, ''nak dikdayuakuk dik maseh cink hampir kobek. Monik ngant lotakkan tongan-Muk somunya supaya diapm depit dikbaik ngant midiap.'' Lalu Yesus obu sama Yairus. ²⁴ biatn begitu obeh nyo dik ngajah Yesus ngant mengerumuni-Nya. ²⁵ Ngant, biatn nyo dayua dik pendarahan selama du bolas sowok. ²⁶ Diapm jeh bukali-kali menderita oleh obeh tabib, ngant jeh nguluarkan sumua dik nok puknya, tapi kai biatn gunonya ngant keadaanya malah butamah bek. ²⁷ Setelah ngopink tentang Yesus, dsyua hant nganu Yesus sok kona nok tudo-tudo kurumunan nyo ngant jamah jubah-Nya. ²⁸ Dayua hant nyonok, ''Kalau kuk depit jamah jubah-Nya saja, kuk dok sembuh.'' ²⁹ Tika hant gik pendarahannya togak ngant diapm ngasakan bahwa opuknya jeh baiksok punyakitnya. ³⁰ Yesus lansong tau sok diapm-Nya maih bahwa biatn kuasa dik jeh kuluar sok-Nya. diapm boboliak nok antara kerumunan hant ngant nyonok: ''Osiah dik mukuat jubah-kuk?'' ³¹ Lalu nabuah-nabuah Yesus nyonok nganu-Nya, ''Muk honong kerumunan nyo desak-desak-Muk ngant nyo nyonok, Osiah dik jamahkuk?''' ³² Lalu, Yesus monik kulilink samah honong osiah dik jeh lakukannya. ³³ Namun, jeh tau oniah dik jeh terjadi pada muknya, dayua hant jodi golak ngant guguat. Diapm monik ngant busujudnok jowi Yesus serta nyonok Yesus sumua kubonarnya. ³⁴ Kumudian, Yesus nyonok nganu dayua hant, ''Nak kuk, imanmuk jah nyelamatkan kuk.obulah wah damai sejahtera ngant baiklah sok punyakitmuk.'' ³⁶ Dok tapi, Yesus kai ngopinkan oniah dik jeh nyonok, Diapm nyonok nganu pumimpin sinagoge hant, ''yok golak, pucaya jak.'' ³⁷ Lalu, Yesus kai ngizinkan nyo pun ngajak-Nya, kucuali petrus, ngant Yakobus, ngant Yohanes, posik Yakobus. ³⁸ Lalu, datn sapai nok homing kupala sinagoge hant, ngant Diapm honong budohuk, ngant nyo-nyo nongis jeh ngolo samah caho nyahink. ³⁹ Kumudian, tika Yesus namok, Diapm nyonok nganu datn, ''Ngoniah muk nohuk ngant nongis? nak hant kai kobek, tapi gik bis.'' ⁴⁰ Tapi datn notaukan Yesus. Namun, Diapm ngadok datn sumua kuluar ngant Diapm matn ma ngant nok nak hant, serta nyo-nyo dik samah-Nya, lalu nomok koni ruangan ahok nak cink hant biatn. ⁴¹ Kumudian, nimugit-Nya tongan nak cink hant ngant Diapm nyonok nganunya, ''Talita kum!'' (Artinya, ''Gadis cink, Kuk nyonok nganumuk, mokatlah!'') ⁴² Nak dayua hant copat tekit ngant mulai bujalant-jalant, karna diapm buumur du bolas sowok, ngant copat sumua nyo sangat takjub. ⁴³ Lalu, Yesus minyuk pihitah dik hiya nganu nyo mutuh nak hant agar yok biatn nyo pun dik tau hal te, ngant nyonok nganu datn agar nak hant nidok duak.