Udah yok, seluruh ura diok ngemaik Yesus ngadap Pilatus. ² Sidok pun nemulo nuduh Yesus lalu madah, ''Kami nemu ura tuk nyesat ke banso kami serto nidah kami mayar pajak ngau Kaisar, piyok gok madah dirikneh Kristus seura Rajo.'' ³ Pilatus betanyok ngau Yesus, ''Apo benar Nuan Rajo ura Yahudi?'' Yesus nyaut, ''Nuan kedirik te madah.'' ⁴ Udah yok, Pilatus ngumung ngau imam-imam kepalo tamai ura basngat, ''Aku endo bisik nemu penyalah ngau Ura tuk.'' ⁵ Tapi, sidok nuntut samil mangkas sangat nyarin, ''Neh ngasut ura-ura ngau te di ajar-Neh diseluruh wilayah Yudea nemulo re Galilea sampai kituk!'' Yesus diba'i Ngadap Herodes ⁶ Waktu Pilatus menin'd pekaro tuk, neh betanyok apokah Yesus ura Galilea. ⁷ Serto, seudah neh ketauk ute Yesus berasal re wilayah kuaso Herodes, Pilatus pun ngirum Yesus ngau Herodes te saat yok tengah lagik di kuto Yerusalem. ⁸ Sento Herodes merati Yesus, neh sangat senang, neh udah lamah kok betemu ngau-Neh ute neh udah menin'd bangat hal tenta Yesus, piyok gok neh bearap Yesus tauk mulah mujisat te tauk dilaku ulih-Neh. ⁹ lalu, Herodes bangat ngaju te ditanyok ngau Yesus, tapi Yesus endo nyaut apo pun ngauneh. ¹⁰ Imam-imam kepalo tamai ahli-ahli Taurat te bediri diok nuduh Yesus ngau macam jenis te berat. ¹¹ kebok, Herodes tamai balo tentaroneh piyok gok ngerenah serto ngelulok Yesus. udah yok, sidok ngenok ke jubah te baek lalu ngirum-Neh bekalih ngau Pilatus. ¹² Subok, Pilatus tamai Herodes sajo bemunsuh, tapi pas ari yok gok sidok bekaban. Pilatus Bala Ngebibas Yesus ¹³ Udah yok, Pilatus ngumpul balo imam kepalo, balo pemimpin Yahudi, serto ura bangat, ¹⁴ lalu, ngumung ngau sidok, ''Kitak ngemaik Ura tuk nguso aku sebagai ura te nyesat ke bangat ura. Tapi, waktu aku merikso-neh di muo kitak, aku endo nemu penyalah upo te kitak tuduh ngau-Neh. ¹⁵ Herodes pun endo bisik nemu penyalah-Neh kebok neh mula Ura tuk agik ngau kito. Perati, Neh endo ngelaku penyalah te patut tauk diukum mati. ¹⁶ Kalau piyok, aku nyuruh balo tentaro encamuk-Neh, baru aku ngelepas-Neh.'' ¹⁷ [Setiap ari rayo paskah, Pilatus arus ngelepas mibas seura te di tan dalam penyaro ngau bangat ura.] ¹⁸ Tapi sidok pun mangkas besamo-samo, "Bunuh Ura tuk! Lepas Barabas ngau kami!'' ¹⁹ [Barabas yok seura te dipenyaro ute telibat tamai meruntak di kuto serto piyok gok suah munuh.] ²⁰ Ute Pilatus mauk ngelepas Yesus, kebok em sekalik lagik neh ngumung ngau sidok. ²¹ Tapi, sidok pun mangkas mukau, ''Salib ke Neh! Salib ke Neh!'' ²² Tuk ketigo kalik Pilatus betanyok ngau sidok, ''Ngapo? Penyai'k apo te udah dipulah Ura tuk? Neh endo besalah. Aku endo bisik nemu penyalah apo pun re-Neh te patut nerimok ukum mati. Ute piyok, aku udah nyuruh tentaro ngajar encamok-Neh lalu ngelepas-Neh.'' ²³ Tapi, sidok sajo entegin atineh serto nuntut ngau ingan nyarin isok Yesus di salib. lalu ingan sidok pun menang. ²⁴ akhirneh, Pilatus mutus isok menuh te dituntut sidok. ²⁵ serto neh mibas ke ura te dimintok ulih ura bangat, te dipenyaro ute meruntak tamai munuh. tapi, nyerah ke Yesus ngau kemauk sidok. Yesus disalib ²⁶ Waktu sidok tamai balo tentaro ngemaik Yesus angkat, sidok gok ngetan seura te bedamo Simon re Kirene te baru datai re desa. Balo tentaro ngeletak salib Yesus di bauneh lalu nyuruh ngesan salib di belaka Yesus. ²⁷ Bangat ura te nurut Yesus, di sentaro sidok bisik betinok te nangis serto ngenang ke-Neh. ²⁸ Tapi, Yesus malek ngau sidok serto madah, ''Hai, Betinok-betinok Yerusalem, nusah kitak nangis ke Aku. Tangislah dirik kitak kedirik tamai balo anak kitak. ²⁹ Kebok sento waktuneh, bisik ura-ura tentu madah, ''Bahagia balo betinok te manul, te perutneh endo suah ngano beranak biak, serto te susuneh endo suah nyusu.' ³⁰ Pas saat yok sidok tentu madah ngau gunung-gunung.'Runtuhlah ninga kami!'' serto ngau bukit-bukit, 'Timbunlah kami!' ³¹ Ute, bilo sidok ngelaku hal-hal tuk ngau pun kayu agik idup, apo te tentu tejadi ngau pun kayu te mati rangkai?'' ³² Bisik gok duo ura penjahat te di ba'i ngau di ukum mati besamo-samo ngau Yesus. ³³ Sento sidok sampai enta sebuah tempat te bedamo ''Tengkorak,'' balo tentara nyalib Yesus besamo keduo penjahat yok, seura disepiak kanan-Neh tamai seura lagik disepiak kibok-Neh. Udah yok pun Yesus ngumung, ''Bapa, ampun sidok, ute sidok endo ketauk apo te sidok pulah.'' Lalu balo tentara cabut undi isok ngau magi pakaian-Neh di sentaro sidok. ³⁵ Ura bangat te bediri diok mantau semuoneh, tapi balo pemimpin Yahudi ngelulok Yesus samil ketawok sidok ngelulok. Jekuk sidok, "Neh nyelamat ura lain, jadi isok Neh nyelamat dirik-Neh kedirik bilo Neh yok Kristus, Ura te dipilih Allah!'' ³⁶ Balo tentara piyok gok ngelulok-Neh, lalu sidok datai lalu nawar ke angur masam ngau-Neh, ³⁷ serto ngumung, ''Bilo NUan Rajo ura Yahudi, selamat dirik-Nuan kedirik!" ³⁸ Bisik gok utan ditulis di darat-Neh: "TUKLAH RAJO URA YAHUDI.'' ³⁹ V 39Seura re penjahat te digantung diok pun ngelulok Yesus, jekukneh, ''Endokah Nuan Kristus? Selamat kedirik-Nuan tamai kami!'' ⁴⁰ Tapi,seura penjahat te lain ngeraro neh serto madah, ''Endokah nuan takut ngau Allah ute nuan gok nerimok ukum te samo? ⁴¹ Kito tuk sajo udah searusneh nerimok apo te udah kito pulah, Tapi Ura tuk endo ngelaku penyalah apo pun.'' ⁴² Lalu, neh ngumung ngau Yesus, ''Yesus, ingat ke aku bilo Nuan datai jadi Rajo.'' ⁴³ Udah yok jekuk Yesus ngau neh, ''Aku madah te sebenarneh ngau nuan, ari tuk gok nuan tentu besamo ngau Aku di dalam Firdaus.'' Pemati Yesus ⁴⁴ Kiro-kiro waktu nunyuk sekitar jam duo belas tengari, ari pun keleman nutup seluruh daerah yok sampai jam tigo malam ari ⁴⁵ ute mato ari jadi keleman lalu tirai rumah Allah terida tebelah duo. ⁴⁶ Lalu Yesus mangkas ingan sangat nyarin, ''Ya bapa, ke dalam tangan-Nuan Kuserah nyawo-Aku tuk.'' Seudah madah yok, Yesus mutus penyuan-Neh te pengabis. ⁴⁷ Sento balo pasukan mantau apo utan te udah tejadi, neh ngemulio ke Allah serto madah, ''Sunguh, Ura tuk endo besalah!" ⁴⁸ Waktu ura bangat te datai besamo-samo ngau mantau piyok nuntun kejadi tuk, sidok pulai samil mangko melasah dirik. ⁴⁹ Semuo te ngelalo Yesus tamai balo betinok te udah nurut-Neh re Galilea bediri jauh-jauh serto mantau semuo utan tuk. Yesus Dikubur ⁵⁰ Bisik seura lelaki bedamo Yusuf, neh anggota Dewan penasihat, seura te baek serto benar. ⁵¹ (Neh kedirik endo setuju ngau keputus tamai pempulah sidok) Yusuf asalneh re kuto Arimatea, sebuah kuto ura Yahudi. Neh gok seura te ngantik-nunguk Kerajaan Allah. ⁵² Neh angkat nguso Pilatus serto mintok mayat Yesus. ⁵³ Lalu, neh pun nurun mayat Yesus re kayu salib lalu mungkusneh ngau kain putih. Udah yok, neh ngeletak ngurin-Neh dalam sebuah kubur bukit batu te di tebok ngau pat. Diok, apan suah seura pun mayat digurin. ⁵⁴ Ari tuk yok neh Ari jum'at serto ari sabat ampir di te mulo. ⁵⁵ Balo betinok te datai besamo Yesus re Galilea tamai Yusuf. Sidok merati kubur yok serto upo keti mayat Yesus di gurin di dalamneh. ⁵⁶ Udah yok, sidok pulai lalu nyiap balo rempah-rempah serto minyak ngau ngoles mayat Yesus, pas ari sabat sidok betegok menurut ukum Taurat.