¹ "Ako'koo, Karajaan Sarugo pasti di umpamaan ba sapuluh andaro nang nabanan tensan- tensane ampus batamu ba panganten angaki ² Limo di antaro ne'ido' kok bodo lalu limo nang laine bijaksano. ³ Waktu nang bodo koo nabanan tensan-tensane, ne'ido' ino' nabanan minyak. ⁴ Tapi, nang bijaksano nabanan minyak kadoop tapayot enek ba tensan-tensan ne'ido'. ⁵ Kanio', waktu panganten angaki koo ngundurotn ka atangane, samuo ne'ido' ngatuk lalu tatidur. ⁶ Tapi, pado tangoh maam ado nang ngampak, 'Panganten angaki atokng! Kauarlah ampusi'! ⁷ Ako' koo, samuo andro koo umpat lalu ngamasi' tensan-tensane. ⁸ Lalu, nang bodo bakato ka nang bijaksana, 'Bareot ka kami sadikit minyakngu karamo tensan-tensan kami ampir padopm.' ⁹ Tapi, nang bijaksana nyahut, 'Bai', ino' cukupo' sa' kami ba kito'. Labih baik, ampuslah ka urokng nang nyuo minyak lalu malilah sa' diri' ngu sorokng." ¹⁰ Samantaro ne'ido' ampus malio', panganten angaki koo atokng, lalu ne'ido' nang dah siap, taamo' barage ba io ka pesto panganten, lalu pintu di tutup. ¹¹ Ako' koo, atokng pula' andaro-andaro nang laine lalu bakato, 'Tuan, tuan! Bukai'lah kami.' ¹² Tapi, io nyahuti', 'Sasungguhe, aku bakato ka kau, aku ino' kanal ka kau.' ¹³ Karamo koo, ba jago-jagolah karamo kau ino' nahui' arie ato waktue." PARUMPAMAAN TANTANG TALU PALAYAN ¹⁴ "Sabab, Karajaan Sarugo sabayo angayo urokng ampuso'ka luar nagari, nang nyaru' amba-ambae lalu nyarohotn barange ka ne'ido'. ¹⁵ Ka nang seko', io mare'ot 5 talenta. Ka nang laine, 2 talenta, lalh ka nang laine agi' 1 talenta. masing-masing sasuai kamampuane. Ako' koo, io dari. ¹⁶ Urokng nang narimo' 5 talenta koo langsung dari, lalu majaanan talenta koo, lalu ngaselotn 5 talenta agi'. ¹⁷ Jakoo ugo' urokng nang narimo' 2 talenta, io ngaselotn 2 talenta agi'. ¹⁸ Tapi, urokng nang narimo' 1 talenta koo ampus, ngai' ubokng ka tanoh, ¹⁹ Lamo ako' koo, tuan ambi-ambo koo atokng lalu ngamuat paretonganba ne'ido'. ²⁰ Urokng nang dah narimo' 5 talenta koo ngadap io nabanan 5 talenta agi', jare, 'Tuan, kau nyarohotn 5 talenta ka aku. Tananglah, aku dah ngaselotn 5 talenta agi'. ²¹ Tuane bakato ka io, 'Gagas sidi, ambo nang baik ba nang taat. Kau taat ba hal-hal enek, aku pasti ngangkat kau ka atas manyak hal, taamo'lah ka doopm sukacita tuanngu.' ²² Lalu, urokng nang narimo' 2 kapintarotn ugi' ngadap sambil bakato 'Tuan, kau nyarohotn 2kapintarotn ka aku. Tanang, aku dah namu 2 kapintarotn agi'.' ²³ Tuane nyahuti, 'Gagaslah, ambo nang baik ba taat. kau taat ba hal-hal enek, aku pasti ngangkat kau ka manyak hal, taamo'lah kadoopm sukacita tuanngu.' ²⁴ Ako' koo, urokng nang narimo' sete kapintarotn ugo' ngadap sambil bakato, 'Tuan, aku nahui' kauburokng nang kajam, bahanyi ka tampat nang ino' kau amur, lalu ngumpulotn ka tampat nang ini' kau amuri' banih. ²⁵ Karamo koo, aku gai' lalu ampus napukotn kapintaratn ngu kadoopm tanoh. Tanang, kau ado dameo nang jadi nu'ngu.' ²⁶ Tapi, tuane nyahut sambil bakato ka io, ' Kau ambo nang jahat ba malas! Kau nahui' bahawo aku bahanyi ka tampat nang ini' aku amuri' lalu ngumpulotn ka tampat nang aku ino' ngamuri banih. ²⁷ Karamo koo, saharuse kau nohatni' duit ku ka ka bank lalu waktu aku puokng, aku pasti narimo' nu'ku agi' ba bungae. ²⁸ Icoklah 1talenta kooampat ka io lalu bare'ot ka io, nang nang ado 10 kapintarotn koo. Sabab, urokng ²⁹ nang dah ado kali di bare' agi', io pasti io balabihotn. Tapi, dari urokng nang ino' ado, ameo nang io ado pasti di icokng. ³⁰ Buoknglah ambo nang ino' doopm kagalapotn nang paling kakap. Ka tampat koo pasti ado tangisotn ba garek gigi." PANGAKIMAN ANAK MANUSIO ³¹ "Waktu Anak manusio atokng doopm kamuliaan-E, lalu para malaekat sabayo-bayo ba Io, lalu Io pasti duduk ka takhta kamuliaan-E. ³² Samuo bangso pasti di kumpulotn ka adapatn-E, lalu Io pasti misoh-misohotn ne'ido', angayo gambala nang misohotn domba ba kambing-kambing. ³³ Lalu,Io pastimuangan domba-domba ka sabaloh kanan-E, lalu kambing-kambing ka sabaloh keba'-E. ³⁴ Ako' koo Rajo pasti ba kato ka ne'ido' nang ka sabaloh kanan-E, 'Jeklah, kau nang dimarakati' Bapa-Ku, warisi'lah Karajaan nang dinyadiootn tok kau mulai' pamulaan dunio. ³⁵ Karamo waktu Aku kaparotn, kau mare' Aku makotn. Aku aus lalu kau mare' Aku nyocok. Aku urokng asing, lalu kau ngundang Aku taamo'. ³⁶ Aku batianyokng lalu kau majui' Aku. Aku rongko' lalu kau nabo' Aku. Aku ka pinjaro lalu kau atokng ka Aku.' ³⁷ Lalu, urokng-urokng banar koo nyahuti' Io, 'Tuhan, kamie kami nanang Kau kaparotn lalu mare' Kau makotn, ato aus lalu mare' Kau nyocok? ³⁸ Kamie kami nanang Kau ayo urokng asing lalu ngundang Kau taamo', ato batianyokng lalu makeotn kau pakean? ³⁹ Kamie kami nanang kau rongko' ato ka pinjaro lalu kami atokng ka Kau?' ⁴⁰ Rajo koo pasti nyahut, 'Aku bakato nang sabanare ka kau, jamae ga'e kau dah ngamuat seko' dari kamaru- kamaru'ku nang paling enek nyian, karamo Aku kau ngarajaan koo.' ⁴¹ Ako' koo, Io pasti bakato ugo' ka ne'ido' nang ka sabaloh keba'e, 'Dari ampat kaadapatnKu, kau nang dinyumpoh, ka doopm api kakal nang dah di nyiapotn sak iblis ba malaekate. ⁴² Sabab, Aku kaparotn lau kau ino' mare' Aku makotn. Aku aus lalu kau ini' mare' Aku nyocok. ⁴³ Aku urokng asing lalu ino' ngundang Aku taamo'; batianyokng lalu kau ino' makeotn Aku pakean; rongko' lalu dipinjaro,lalu kau ino' nabo' Aku.' ⁴⁴ Ako'koo, ne'ido' pasti nyahut, 'Tuhan, kamie kami nanang Kau kaparotn ato aus,ato urokng asing, ato rongko' ,ato batianyokng, ato di pinjaro, lalu ino' ngalayani' Kau?' ⁴⁵ Ako' koo, Io pasti nyahuti' ne'ido', "Aku bakato nang sabanare ka kau, jamae ugo' kau ino' ngarajaan io ka ne'ido' nang paling enek nyian,kau ino' ngarajaan io ka Aku.' ⁴⁶ Lalu, ne'ido' nyian pasti taamo' ka pangukuman kakal, tapi urokng- urokng banar ka doopm kaidupotn kakal."