¹ Yesus kauar ampat ka Bait Allah lalu dari waktu para murid-E atokng nojokatno' bangunan-bangunan Bait Allah ka Io. ² Lalu, Io batanyo' ka ne'ido' , "Ino' ge kau nanang samuo hal nyian? Aku ngatootn nang sabanare ka kau bahawo ino' ado sege batu pun di sio nang si biarotn ado diatas batu nang lain, nang ino' di runtuhatno." MULO-MULO BAJARO ³ Lalu, Yesus duduk ka atas bukit Zaitun, murid-murid atokng ka Io seko'-seko', lalu bakato, " Katootn ka kami, kamie kajadian hal-hal koo lalu dameo nang jadi tando-tando ka atangan Ngu ba ahir zaman nyian?" ⁴ Yesus nyahuti' ne'ido', "Paratianlah supayo ame ado urokng nang nyasatot kau. ⁵ Sabab, manyak nang atokngo atas damaKu lalu ba kato, 'Aku nyian Kristus,' lalu ne'ido' pasti nyasatotn manyak urokng. ⁶ Kau pasti nangar paparangan ba barito-barito tantang parang. Paratiotnlah supayo kau ino' gai' karamo hal-hal nyian arus tajadi, tapu nyian nape' kasudahatne. ⁷ Sabab, bangso pasti bangkit malawan bangso, karajaan pasti malawan karajaan, lalu di mae-mae tampat pasti ado kaparotn ba gempa bumi. ⁸ Samuo hal nyian pamulaan bajaro sakit baranak. ⁹ Ako' koo, ne'ido' pasti nyarohotn kau ka panyiksootn, lalu munuh kau, lalu kau di tegetotn saluruh bangso karamo dama Ku. ¹⁰ Pado waktu koo, manyak nangtakano', lalu saling nyarohotn, bategetotn seko' ba nang laine. ¹¹ Manyak nabi palsu ba muokatni' lalu nyasatotn manyak urokng. ¹² Sabab, palanggaran samakin batamoh, kasih kamanyakotn urokng pasti jadi dingin. ¹³ Tapi, urokng nang batahan sampe pangabisan pasti disalamatotn. ¹⁴ Lalu, Injil karajaan nyian pasti dibaritoitn ka saluruh duniosa' kasaksiotn samuo bangso, lalu ako' koo kasudahane pasti atokng. BAJARO NANG AYO' BA KRISTUS-KRISTUS PALSU ¹⁵ "Jadi, waktu kau nanang pambinaso kajam, angayo nang nabi Daniel ngatootn, badiri di tampat suci, para pambaco harus ngarati, ¹⁶ jadi, ne'ido nang ado di Yudea arus dari ka bukit. ¹⁷ Sape nang ado di atap rumoh, amelah io turutn ngicokngo' ameopun ampat kadoopm rumahe. ¹⁸ Sape nang ado ka ymo, ame puokngo' ngicokngo' jubahe. ¹⁹ Tapi, cilakolah ne'ido' nang babuntikng ba nang nyusui' kamuda'e pado ari-ari koo. ²⁰ Badoalah supayo waktu kau dari ame musim dingin atopun waktu ari Sabat. ²¹ Karamo ako' kootahadi musim bajaro ayo', angayo nang nape' suoh tajadi mulai pamulaan dunio sampe kanio', memang ino' akan suoh tajadi agi'. ²² Lalu, kalo' ari-ari koo ino' di konokotn, ini' ado idup nang akan di salamatotn. Tapi karamo ne'ido' nang tapilih, ari-ari koo pasti di konokotn. ²³ Ako' koo, kalo ado urokng bakato ka kau, 'Tanang, Kristus ado ka sio,' ato ' Io ado ka naun', ame picayo' ka io. ²⁴ Sabab, kristus-kristus palsu pasti ba muokatni' lalu pasti ngadootn tando-tando nang ayo' ba mujizat-mujizat nang nyasatotn, kalo mungkin, ne'ido' nang tapilihpun. ²⁵ Paratiotnlah, Aku dah ngatootn io ka kau sanape'e. ²⁶ Jadi, kalo ne'ido' bakato ka kau, 'Tanang, Io ado ka doopm utotn,' ame ampus ka naun, ato 'Tanang, Io ado ka doopm biik koo,' ame picayo' ka io. ²⁷ Sabab, angayo kilat nang mancar ampatka timur lalu ba sinar sampe ka barat, jakoo ugo' kaatangan Anak Manusio pasti tajadi. ²⁸ Di tampat nang ado bangke, di koolah burukng nasar pati bakomo'." KAATANGAN ANAK MANUSIO ²⁹ "Kanio' ihan , ako' musim bajaro koo, 'Mata ari dijaiotn galap, lalu buotn ino' di bare' sinare, Bintokng-bintokng bajantotni' ampat ka angit, lalu kuaso-kuaso ka angit pasti di guncokng.' Yesaya 13:10; 34:4 ³⁰ Lalu, tando Anak Manusio pasti muok ka angit ba suku-suku ka bumi pasti ngaratap. Ne'ido' pasti nanang Anak Manusio atokng ka awan- awan ka angit, ba kuaso ba kamuliaan nang ayo'. ³¹ Lalu, Io pasti ngirim malaekat-malaekat-E ba suaro sarompet nang nyarekng, lalu, ne'ido' pasti ngumpulotn umat pilihan-E dari ka ampat panjuru bumi, dari ujukng angit nang sege' ka ujukng nang lain agi'. ³² Kanio' palajari'lah parumpamaan puhutn aro' waktu pdahatne jadi lamut lalu dauk-dauknge ba combok, kau nahui' bahawo musim timaro dah samak. ³³ Jakoo ugo' waktu kau nanang samuo hal nyian, kau nahui' bahawo Io dah samak, ka muho pintu. ³⁴ Sasungguhe, Aku ngatootn io ka kau bahawo katurunan nyian ino' lewat sampe samuo hal nyian tajadi. ³⁵ Angit ba bumi pasti lanyap, tapi firman-firman-Ku ino' akan lanyap." WAKTU KAATANGAN ANAK MANUSIO ³⁶ Tapi, kalo ari ba waktue, ino' seko'pun nang nahui, malaekat-malaekat ka Sarugo ugo' ino' nahui', Sang Anak pun ino' ugo', tapi Sang Bapo' ajo'. ³⁷ Sabayo angayo nang tajadi waktu jaman Nuh, jakoo ugo ka atangan Anak Manusio pasti tajadi. ³⁸ Sabab, ayo pado ari-ari sanape' ai' bah, ne'ido' makotn ba nyocok, panganten ba dimangantenan, sampe pado ari Nuh taamo' ka doopm bahtera. ³⁹ Lalu, ne'ido' ini' ngarati sampe ai' bah atokng lalu di ngalanyapotn ne'ido' samuae; jakoo ugo'lah kaatangan Anak Manusio pasti tajadi. ⁴⁰ Ako'koo, pasti ado duo urokng ka umo; nang seko' pasti di icokng lalu nang seko'e pasti di tingootn. ⁴¹ Duo ambini ngiling ka batu paberek, nang seko' pasti di icokng lalu nang seko'e pasti di tingootn. ⁴² Karamo koo, bajago-jagolah karamo kau ino' nahui' pado ari dameo Tuhan ngu atokngo'. ⁴³ Tapi, tahui'lah nyian bahawo kalo tuan rumoh dah nahui' kamie, pado waktu maam, si pangait atokngo', io pasti bajago-jago pasti ino' miaratno' rumahe di bungkar. ⁴⁴ Karamo koo, kau ga'e arus siap karamo Anak Manusio atokng pado waktu ini' jau sangko. AMBO NANG SATIA BA AMBO NANG JAHAT ⁴⁵ "Lalu, sape ge' ambo nang satia ba bijaksana, nang tuane ngangkat atas saluruh rumahe sa' mare' ne'ido' makanan pado waktu waktu nang tapat? Dibarakati'lah ⁴⁶ ambo koo, nang waktu tuane atokng, tuane koo napati' io tangoh bakarajo jakoo rupae. ⁴⁷ Sasungguhe, Aku bakato ka kau bahawo tuan koo pasti ngangkat ambae koo atas samuo hake. ⁴⁸ Tapi, kalo ambo nang jahat koo bakato ja doopm atie, 'Tuanku ino' jadi atokng,' lalu io mulai mangkongi' ambo- ambo nang lain, ⁴⁹ lalu makotn ba nyocok sabayo ba nang kamabuk; ⁵⁰ tuan ambo koo mao atokngo' pado ari waktu nang ino' io arapotn ba pado waktu nang ino' io tahui', ⁵¹ lalu mancongo io, mao di tampatotn sabayo-bayo ba urokng munafik. Di tampat koo, pasti ado tangisotn ba garek gigi.