¹ "Sabab, Karajaan Saruga angayo ampu' kabon nang oop-oop dah ampus ngago pakarajo-pakarajo kabon anggure. ² Waktu io dah sapakat ba para pakarajo koo sa dinar sa ari, io nyuruh ne'ido' ka kabon anggure. ³ Lalu, kiro- kiro pado jam katalu io ampus lalu nanang nang laine gi' badiri nganggur ka tampat umum. ⁴ Lalu, io bakatoka ne'ido', 'Kau, ampuslah ugo' ka kabon anggur lalu dameo nang pantas aku bare'ot ka kau." Lalu, ne'ido'pun ampus. ⁵ Sakai agi', sakitar jam ka anam lalu ja ka sambilan io ampus ngarajaan hal nang sabayo. ⁶ Lalu, kiro- kiro jam ka sabalas,lo ampus lalu batamu ba nang laine tangoh badiri lalu io bakato ka ne'ido', 'Dameo kau badiri ka sio nganggur ba saarianan?' ⁷ Ne'ido' ba kato ka io, 'Karamo nape' ado nang nyuruh kami bakarajo.' Ampu' kabon koo ba kato ka ne'ido', 'Kau, ampuslah ugo' ka kabon anggurku.' ⁸ Waktu ari dah mao' maam, ampu' kabon koo bakato ka mandore, 'Saru'lah para pakarajo lalu bayarotn ka ne'ido' upahe mulai' nang pangabisan sampe nang partamo .' ⁹ Waktu ne'ido' nang bakarajo jam ka sabalas, atokng,masing-masing urokbg narimo' 1 dinar. ¹⁰ Waktu ne'ido' nang bakarajo partamo kai, atokng, ne'ido' kiro narimo'o labih manyak. Tapi, ne'ido' masing-masing narimo' 1dinarugo'. ¹¹ Waktu narimo' io, ne'ido' marotes ka ampu' kabon. ¹² Ne'ido' ba kato, 'Urokng-urokng nang masok pangabisan kahe bakarajo salamo 1jam, lalu kau ngamuat ne'ido' sabayo ba kami, nag dah nanggong baban ba darokng ba saarianan.' ¹³ Tapi, ampu' kabon ko nyahuti lalu ba kato ka nang seko' 'Kamaru' aku ino' basaloh ka kau. Buke' ge kau dah sapakat ba aku 1 dinar? ¹⁴ Icoklah nu'ngu darilah, tapi aku mao' mare' ka urokng nang pangabisan nyian, sabayo ba nu' ngu. ¹⁵ Ano' di banarotn ge' aku ngarajaan dameopun nang ku mao' ka barangku sorokng? Ato, matangu jahat, karamo aku baik?' ¹⁶ Jadi, nang pangabisan pasti jadi nang pamulo,lalu nang pamuli pasti jadi nang pangabisan." YESUS BAKATO AGI' PASAL KAMATIOT-E ¹⁷ Waktu Yesus mao' ampus ka Yerusalem, Io nabanan dua balas murid-E sacaro ba pisoh-pisoh. Doop pajaanan Io bakato ka ne'ido', ¹⁸ "Tananglah, diru' noroko' Yerusalem lalu Anak Manusio mao' di sarohotn ka imam-imam kapalo ba ahli-ahli Taurat. Ne'ido' pasti ngukum Io ba kamatiotn. ¹⁹ Lalu, ne'ido' pasti nyarohotn Io ka bangso-bangso lain sa' ngoloan, nyambuki', lalu nyalipotn Io. Lalu, pado ari ka talu, Io di bangkitotn." PAMINTOOT INU' ANAK-ANAK ZEBEDEUS ²⁰ Ako'koo, inu' anak-anak Zebedius ba anak-anake atokbg ka Yesus lalu nyamboh ba pinto' ka Yesus. ²¹ Lalu, Yesus ba kato ka io, "Dameo nang kau mao'an?" Inu'e koo nyahut, "Parentohotnlah biar ka duo anakku biso duduk doop Karajaan-Ngu, seko' sabaloh kanan-Ngu lalu seko' ka sabaloh keba'-Ngu." ²² Tapi, Yesus nyahuti' "Kau ino' ngarati dameo nang kau minto'. Sanggup ge kau nyocoki' galas nang Ku nyocoki'?" Ne'ido' ba kato ka Yesus, "Au' kami sanggup." ²³ Yesus bakato ka ne'ido', "Kau memang nyocok ampat ka galas-Ku, tapi duduko' ka kanan-Ku ba keba' - Ku, buke'lah hak-Ku mareotno' io, malainkan sa' ne'ido' nang dah disiapotn Bapa-Ku." ²⁴ Waktu sapuluh murid nang lain nangarot Io, ne'ido' bero ka duo baradi' koo. ²⁵ Tapi, Yesus nyaru' ne'ido' lalu bakato, "Kau nahui' bahawo para panguaso bangso-bangso lain ba kuaso ka ne' ido', lalu urokng-urokng ayo' majaanan tugas ka ne'ido'. ²⁶ Sabanare ini' jakoo ka antaro kito' tapi sape nang mao' jadi ayo' ka antaro kito, io arus jadi palayanngu. ²⁷ Lalu, sape sajo' nang mao' jadi nang pamulo ka antaro kito', io arus jadi ambo ngu, ²⁸ sabayo angayo Anak Manusio nang atokng buke' dilayanio' , tapi mao' malayani' ba mare'ot nyawa-E sa' nabus manyak urokng." DUO UROKNG BUTO' DISAMUHOTN ²⁹ Lalu, waktu ne'ido' ningootn Yerikho, karumunan urokng rami nunootn Io. ³⁰ Lalu, duo urokng buto' nang duduk ka sisi marago, waktu nangar bahawo Yesus ngaintas, ne'ido' ngampak, "Tuhan, Anak Daud, kasihani'lah kami!". ³¹ Urokng rami nyabut ne'ido' supayo ne'ido' diam. Tapi, ne'ido' mangkin koat ngampak, " Tuhan, Anak Daud, kasihani'lah kami!" ³² Lalu, Yesus baranti nyaru' neido'. Io bakato, "Dameo nang kito' maoan ka Aku nyian?" ³³ Ne'ido' ba kato ka Io, "Tuhan, kami mao' mato kami dibukootn," ³⁴ Yesus tagarak karamo kasihotn ka ne'ido',lalu nyameh mato ne'ido', waktu koo ugo'lah ne'ido' narimo' pananangane agi', lalu, nunootn Yesus.