¹ Pajuhoot untu Labih dari Limo Ribu Urok'ng Dah udoh ang'koo, Yesus yabaran'gi dano Galilea, saparati dano Tiberias(Kadoop PL disabut dano Kineret,dano nang untu ngormati kaisar Tiberias). ² Manyak urok'ng nang nunaan Io karano ne'ido nanang tando-tando ajaib nang Io ngalakuo'ot ka urok'ng-urok'ng rongko. ³ Salanjute, Yesus naik ka atas bukit lalu duduk ka naan sabayo-bayo ba murit-murit'E. ⁴ Saat ang'koo, parayoot paskah urok'ng Yahudi dah samak. ⁵ Sambil nanang ka sakaliling'E lantas nanang urok'ng rami atok ka diri'E, Yesus bakato ka Filipus, "Kamae'ke diri biso mali'o roti supayo urok'ng-urok'ng ang'koo biso majuh?" ⁶ Yesus ngatoot jukut ang'koo untu gates'o Filipus karano sabanare Io sorok nahu'i dameo nang ma'o Io lakuoot. ⁷ Filipus nyahut, "Roti sarago 200 dinar ano pasti cukup untu ne'ido, biarpun masing-masing kahe namu satatak kenek ajo." ⁸ Saloh seko urok'ng murit'E, Andreas, kamaru Simon Petrus, bakato ka Yesus, ⁹ "Kasio ado seko urok'ng kamudo nang ado ba'limo roti jelai( Tanaman padi-padian panganti gandum nang kurang gagas ) ba duo ikot, tapi dameo paedahe untu urok'ng nang samanyak anyian?" ¹⁰ Yesus bakato, "Suruhlah samu'o urok'ng untu duduk." Ka tampat ang'koo manyak rumput, jadi urok'ng-urok'ng ang'koo duduk jumbalahe kiro-kiro limo ribu angaki. ¹¹ Salanjute, Yesus ngicok roti-roti ang'koo dah ako ngatoot tarimo kasih, Io magiot roti-roti ang'koo ka ne'ido nang badudukot; jako'o ugo nang Io majawat ka ikot-ikot ang'koo samanyak nang ne'ido mao'an. ¹² Pado saat samu'o urok'ng dah kanyang, Yesus bakato ka murit-murit'E, "Komoaan tatakot-tatakot nang tasiso supayo ano ado nang tabuok." ¹³ Karano ang'koo, samu'o murit ngomoaan'io lalu ngisi duo balas karanjang ba'tatakoot-tatakoot dari limo roti jelai nang ditinggot ne'ido nang dahudoh majuh. ¹⁴ Takallo urok'ng-udok'ng ang'koo nanang tando ajaib nang Yesus ngalakuo'ot, ne'ido bakato, "Io nyian pasti Nabi(Maksud ne'ido kamungkinan Io Nabi nang Tuhan matakot ka Musa) nang di'nyanjioot ma'o atoko ka dunio." ¹⁵ Karano nahu'i bahwo urok'ng rami ang'koo barancano atok ba makso'o Io jadi Rajo untu ne'ido. Yesus Bajoot ka Atas Ai ¹⁶ Takallo ari dah mulai maam,samuo murit nuju'o ka dano ¹⁷ dah udoh naik ka parahu, ne'ido mulai nyabarangi dano nuju'o Kapernaum. Ari udoh mula'i galap, tapi Yesus nape ugo atok namui ne'ido. ¹⁸ Dano mula'i baguruh karano angin barambus sidi koat. ¹⁹ Lantas, takallo ne'ido udoh gayuh parahu sakitar 25 ato 30 stadia( ukurot anyok sajauh 185 m), ne'ido nanang Yesus bajoot kaatas dano lantas nyamaki parahu nyabapot ne'ido ka'gaianan. ²⁰ Namun Yesus bakato ka ne'ido, "Nyian Aku, usoh ga'i!" ²¹ Ako ang'koo, ne'ido ma'o naik'koto Io ka doop parahu lalu tibo-tibo parahu ang'koo dah ngaramus ka tampat nang ne'ido ampusi'o. Urok Manyak Gagu'i Yesus ²² Ari ampagie, urok'ng manyak nang masih badiri ka sabarang dano nanang ano ado parahu lain ka'koo, kacuali sege parahu ajo nang murit-murit udoh taamo ka doop'pe. Namun, Yesus ano ampus taamo ka doop parahu ang'koo sabayo-bayo samu'o murit'E nang udoh barangkat sansiri. ²³ Atoklah parahu-parahu lain ampat ka Tiberias ka samak tampat urok'ng-urok'ng ang'koo makot roti, saudoh Tuhan nguvapot tarimo kasih. ²⁴ Takallo urok'ng manyak nanang bahwo Yesus ba samu'o murit'E ano ado agi ka'koo, ne'ido naik ka parahu-parahu ang'koo lalu barangkat ka Kapernaum untu ngagu'i Yesus. Yesus adolah Roti Idup ²⁵ Sawamtu urok'ng manyak ang'koo namuan Yesus ka sabarang dano, ne'ido batanyo ka Io, "Rabi(Guru), kamie Kito atok ka sio?" ²⁶ Yesus nyahuti ne'ido lalu bakato, "Sasungguhe Aku bakato ka kau, kau ngaggui Aku buke karano kau udoh nanang tando-tando ajaib, malainkan karano kau udoh majuh roti sampe kanyang. ²⁷ Usoh bakarajo untu ngago pajuhoot biao binasa, malainkan untu pajuhoot nang biso batahan sampe idup nang kakal, nang Anak Manusio ma'o bareato ka kau karano ka Anak Manusio ang'koo, Bapo, yaitu Allah, udoh mareo'ot pangesohot'E." ²⁸ Lantas, ueok'ng manyak ang'koo batanyo ka Yesus, Ameo nang ma'o kami laku'ot supayo kami ngarajaan pakarajaan nang dimao?"an Allah ²⁹ Yesus nyahut lantas bakato ka ne'ido, "Anyianlah pakarajaan nang simaoan Allah: picayolah ka Io nang udoh si nyuruh Allah." ³⁰ Ne'ido batanyo ka Io, "Kade ja'koo, tando ajaib ameo'ke nang ma'o Kito lakuo'ot supayo kami nanang lantas picayo ka Kito? pakarajaan ameo nang kito lakuo'ot? ³¹ Nene moyang kami majuh manna(makanan lang'hoe nang dimare'ot Allah ka urok'ng Israel ka padok gurun) ka padok balantaro, saparati nang tatulis, 'Io mare ne'ido roti ampat ka Subayot untu di pajuh."' ³² Yesus bakato ka ne'ido, "Sasunguh'e, Aku bakato ka kau, buke Musa nang mare kau roti ampat ka'subayot, malainan Bapo Kulah mare kau roti nang sasidie ampat ka'subayot. ³³ Sabab, Roti(maksut'E Yesus sandiri) ampat ka Allah adolah Io nang turut ampat ka'subayot lantas mare idup ka dunio." ³⁴ Ne 'ido bakato ka Io, "Tuhan, sega barelah kami roti ang'koo." ³⁵ Kato Yesus ka ne'ido, "Akulah roti idup; urok'ng nang atok ka Aku ano ihane kaparot agi, ba urok'ng nang picayo ka Aku ano ka'ausoto agi. ³⁶ Tapi ang'koo, Aku usoh ngatooto ka kau bahwo sakaipun kau udoh nanang Aku(kau udoh nanang tando-tando ajaib nang Aku ngalakuo'ot), kau tatap ano picayo. ³⁷ Samuo nang dimareot Bapo ka'5Aku ma'o atok ka'Aku, lantas nang atok ka'Aku ano ihane paranoh Aku usir. ³⁸ Sabab, Aku turut ampat ka subayot buke untu ngalakuo'ot kamaoaan Ku sandiri, malainan kamaooan Io nang nyuruh Aku. ³⁹ Lantas, anyianlah kamaoaan Io nang nyuruh Aku: supayo samuo nang udoh Io mareot ka'Aku ang'koo ano ado nang angit, tapi Aku umpat'tato ka ahir zaman. ⁴⁰ Sabab, anyianlah kamaoan Bapo'Ku, bahwo satiap urok'ng nang nanang Anak ba picayo ka'Io ma'o namuo idup kakal, lalu Aku ma'o ngumpat'tato ka ahir zaman." ⁴¹ Karano ang'koo, basangape urok'ng Yahudi mulai basungut mangana'ai Io karano Io bakato, "Akulah roti nang udoh turut ampat ka'subayot ang'koo." ⁴² Ne'ido bakato, "Buke'ke Io anyian Yesus, anak Yusuf, nang bapo ba uma'E diri kanal? Jamae mungkin Io biso bakato, 'Aku udoh turut ampat ka'subayot?"' ⁴³ Yesus nyahuti ne'ido lalu bakato, "usoh basungut ka antaro kito sandiri. ⁴⁴ Ano seko urok'ng pun biso atok ka'Aku, kacuali Bapo nang nyuruh Aku narik'io, lantas Aku ma'o ngumpat'tato io ka ahir zaman. ⁴⁵ Ado tatulis ka'doop kitab samuo nabi: 'Lantas, ne'ido samuo ma'o diajar oleh Allah. 'Satiap urok'ng nang udoh nangar lalu balajar ampat ka'Bapo pasti atok ka'Aku. ⁴⁶ Jukut ang'koo buke ba'arti ado urok'ng nang udoh suoh nanang Bapo, kacuali Io nang atok ampat ka'Allah; Io'lah nang udoh nanang Bapo. ⁴⁷ Aku bakato ka'kau, 'Sasungguhe, satiap urok'ng nang picayo namuo idup kakal.' ⁴⁸ Akulah roti idup. ⁴⁹ Nene moyang'yu udoh majuh manna ka padok balantaro, tapi ne'ido mati. ⁵⁰ Anyianlah roti nang turut ampat ka'subayot, supayo satiap urok'ng majuho'io lalu ano mati. ⁵¹ Akulah roti idup ang'koo nang udoh turut ampat ka'subayot. Kade urok'ng majuh roti anyian, io pasti idup salama'e; lalu roti nang ma'o Kubareot dami kaidupot dunio ang'koo iolah tubuh'Ku." ⁵² Urok'ng-urok'ng Yahudi mulai batangkar seko ba nang laine, ne'ido bakato, "Jamae biso urok'ng anyian mareot tubuh'E untu di pajuh?" ⁵³ Yesus bakato ka ne'ido, "Aku bakato ka kau, sasungguhe kade kau ano majuh tubuh Anak Manusio ba nyocok darah'E(ungkapot simbolik untu narimo Yesus), kau ano ado ba'idup ka doop diri'nyu. ⁵⁴ Satiap urok'ng nang majuh isi'Ku ba nyocok darah'Ku ado ba'idup kakal, lantas Aku ma'o ngumpat'tato io ka ahir zaman. ⁵⁵ Sabab,isi'Ku iolah paju'hot nang sasidie ba darah'Ku iolah cocokot nang sasidie. ⁵⁶ Sape nang majuh isi'Ku ba nyocok daroh'Ku diop ka doop diri'Ku ba Aku diop ka doop diri'e. ⁵⁷ Saparati Bapo nang idup nyuruh Aku, lantas Aku idup oleh karano Bapo, ja'koo ugo io nang majuh Aku, io ma'o idup karano Aku. ⁵⁸ Anyianlah roti nang turut ampat ka'subayot, buke roti nang saparati udoh di pajuh nene moyang'nyu lalu ne'ido mati, urok'ng nang majuh roti anyian ma'o idup salamo-lamo'e." ⁵⁹ Yesus gatoot samuae anyian ka Kapernaum saat Io gajar ka sinagoge(tampat sambayang urok'ng Yahudi). Manyak Pangikut Ningoot Yesus ⁶⁰ Takallo manyak nangar ampat ka murit-murit jukut anyian, ne'ido bakato, "Ajarot anyian talalu karas. Sape nang sangup narimo'io?" ⁶¹ Karano nahui bahwo samuo pangikut'E basungut manganaai jukut anyian, Yesus bakato ka ne'ido, "Dameo'ke pakato'ot-Ku anyian majawat kau tasinggung? ⁶² Kade ja'koo, jamae'ke kade kau nanang Anak Manusio puok naik ka tampat asal'E? ⁶³ Rohlah nang mare idup sadangkan isi ano baguno sadikit pun(kadoop kaitane kadoop kasalamatot,isi ato tubuh ano baguno). Pakato'ot-pakato'ot nang Ku ngatoot ka kau iolah roh ba idup. ⁶⁴ Tapi ang'koo, ado basangape kaantaro kau nang ano picayo."sabab, ampat kasamulo, Yesus nahui sape nang ano picayo ba sape nang ma'o ngianati Io. ⁶⁵ Yesus bakato, "Anyianlah sabap'e Aku ngato'ot ka kau bahwo ano seko urok'ng pun biso atok ka'Aku, kacuali jukut ang'koo dikarunio'ot ka'io oleh Bapo." ⁶⁶ Samanjak saat ang'koo, rami pangkut'E ngundurot diri lalu baranti nunaan Io. ⁶⁷ Karano ang'koo, Yesus bakato ka'duo balas murit'E, "Ma'o ampuso ugo ke kau?" ⁶⁸ Simon Petrus nyahuti Io, "Tuhan, kasape'ke kami ma'o ampus? ngato'ot kaidupot kakal Kito'lah nang ado. ⁶⁹ Kami udoh picayo ba nahu'i ka'Kito, bahwo Kitolah nang kudus ampat ka Allah." ⁷⁰ Yesus nyahuti ne'ido, "Buke'ke Aku sandiri nang milih kau, duo balas urok'ng anyian? Maski ja'koo saloh seko ampat ka kau iolah setan." ⁷¹ Nang Io maksutot iolah Yudas, anak Simon Iskariot, sabab Yudas iolah salah seko ampat kaduo balas mirit ang'koo, tapi io ma'o gianati Yesus.